Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

قازاقستاندىق جۋرناليستەر كوروناۆيرۋسقا قارسى ۆاكسينا سالدىرىپ جاتىر

17 May 2021 17:45

نۇر- سۇلتان. قازاقپارات - تانىمال قازاقستاندىق جۋرناليستەر كوروناۆيرۋسقا قارسى ۆاكسينا الۋدى جالعاستىرۋدا، دەپ حابارلايدى قازاقپارات.

تەلەجۇرگىزۋشى، بيزنەسۆۋمەن دينارا ءساتجان كەشە رەسەيلىك سپۋتنيك- V ۆاكسيناسىنىڭ ءبىرىنشى كومپونەنتىن سالدىردى.

«جاعدايىم جاقسى. دەنە قىزۋى كوتەرىلگەن جوق. ەش جەرىم اۋىرعان جوق. ۆاكسينادان كەيىن جۇمىسقا كىرىستىم، ءتىپتى ۆاكسينا العانىمدى ۇمىتىپ تا كەتتىم. مەن اعزامداعى انتيدەنەلەر تاۋسىلعاندىقتان، ۆاكسينا سالعىزدىم. ويتكەنى، قايتادان اۋىرعىم كەلمەيدى. ادامزات وبا، تىرىسقاق، قارا شەشەك، سۇزەك، تۋبەركۋلەز اۋرۋلارىن قالاي جەڭدى دەپ ويلايسىزدار؟ كوروناۆيرۋس تا - جاپپاي ۆاكسينالاۋدى قارۋ ەتۋگە بولاتىن ءبىرىنشى جاۋ ەمەس. مەنىڭشە، سەكەمشىل ادامدار تۇيىق شەڭبەرگە تۇسەدى. ولار نەعۇرلىم كوپ ۇرەيلەنسە، سوعۇرلىم ءالسىز بولادى. جەلىدەن G5 تۋرالى اقپارات پەن وزدەرى سەكىلدى كۇدىكشىل ادامدار جازاتىن ءمانسىز اڭگىمەلەردى ىزدەيدى. قالىپتى ءومىر سالتىنا ورالعىسى كەلەتىندەر، العاشىندا «قارسى» بولىپ جۇرگەندەر دە ۆاكسينا جاساتادى»، - دەپ جازدى دينارا ءساتجان ءوزىنىڭ Instagram پاراقشاسىندا.

ال جۋرناليست ازامات ەرعالي QAZVAC ۆاكسيناسىنىڭ ەكىنشى دوزاسىن 21 كۇننەن كەيىن سالدىرعان. « QAZVAC ۆاكسيناسىنىڭ ەكىنشى دوزاسىن الۋ ءۇشىن نۇر- سۇلتان قالاسىنىڭ 9-ەمحاناسىنا كەلدىم. ادامدار از ەمەس. ەمحانانىڭ مەديتسينالىق قىزمەتكەرلەرى شيراق جۇمىس ىستەپ جاتىر. تۇرعىنداردىڭ بارلىعى تىركەلەدى جانە قانداي ۆاكسينانى تاڭداعانىنا بايلانىستى ءارتۇرلى كابينەتتەرگە جىبەرىلەدى. QAZVAC نەمەسە سپۋتنيكتىڭ ءبىرىن سالدىرۋعا بولادى. ەكپە پروتسەسى جولعا قويىلعان، ەش قاربالاس جوق»، - دەپ جازدى ازامات ەرعالي Facebook پاراقشاسىندا.

سونىمەن بىرگە جۋرناليست دينا تولەپبەرگەن جاقىندا سپۋتنيك- V ۆاكسيناسىنىڭ ەكىنشى كومپونەنتىن العان.

«بۇگىن ەكىنشىسىن (ۆاكسينا - رەد.) الدىم. 45 مينۋت ءوتتى. وسى پوستتى جازىپ وتىرعانىما قاراعاندا، شۇكىر، اياق- قول دىرىلدەپ جاتقان جوق، سانام وياۋ. ارى قاراي قالاي بولارىن بىلمەيمىن. ءبىراق جاقسىلىققا سەنەمىن. سپۋتنيك V العاشقى كومپونەنتىن سالدىرعان سوڭ، 7 كۇن بويى قىزۋىم كوتەرىلىپ ەدى. ءتىپتى 5-6 كۇندەرى تۇرا الماي، جاتىپ قالدىم. ەكىنشى كومپونەنتتىڭ اسەرى جەڭىلدەۋ بولسا يگى. كوروناۆيرۋس سالدارىنان ەڭ جاقىن ادامدارىڭدى جوعالتىپ العاننان كەيىن، كۇدىكتەنە، سەسكەنە باستايدى ەكەنسىڭ. امان بولايىق، بار بولايىق»، - دەيدى د. تولەپبەرگەن.

ايتا كەتەيىك، قازاقستاندا كوروناۆيرۋسقا قارسى ۆاكسينا العاندار سانى 2 ميليونعا جۋىقتادى.

اۆتور: ايجان سەرىكجان قىزى

Keywords: قوعام,
Up