Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

ق ر ۇ ق ك اتىراۋ وبلىسىنداعى شەكارا داۋىنا قاتىستى مالىمدەمە جاسادى

19 April 2021 21:28

نۇر-سۇلتان. قازاقپارات - ق ر ۇ ق ك شەكارا قىزمەتى ديرەكتورىنىڭ ءبىرىنشى ورىنباسارى ايدار ايمۋرزين اتىراۋ وبلىسىنىڭ كوپتوعاي اۋىلى تۇسىنداعى شەكارالىق قورشاۋعا قاتىستى تۋىنداعان ماسەلەگە تۇسىنىكتەمە بەردى، دەپ حابارلايدى قازاقپارات ءتىلشىسى.

«ينتەرنەتتە ايتىلعانداي، مەملەكەتتىك شەكارا سىزىعى 70-90-جىلدارداعى كارتاعا ساي كەلەدى. كەلىسىمشارت 2005-جىلى قول قويىلىپ، راتيفيكاتسيالانعان جانە تاريحي قالىپتاسقان اكىمشىلىك شەكارانى ەسكەرەدى. زاڭناماعا سايكەس، شەكارا قىزمەتىنىڭ اتالعان ۋچاسكەدە ەنى 100 مەتر بولاتىن شەكارا جولاعىندا قورشاۋدان ينجەنەرلىك قۇرىلىس جۇرگىزۋگە قۇقى بار. ياعني، قورشاۋ وتكەن جەرمەن مەملەكەتتىك شەكارا سىزىعى وتەدى دەگەندى بىلدىرمەيدى. قورشاۋ مەملەكەتتىك شەكارا سىزىعىنان 100 مەتر قاشىقتا. 2008-جىلى جەرگىلىكتى تۇرعىنداردىڭ وتىنىشتەرى بويى ورناتىلعان ەدى. ويتكەنى، مالدىڭ قارسى بەتكە ءوتۋ جاعدايى ءجيى بولدى جانە بۇل ماسەلە ەكى تاراپتىڭ وكىلدەرىمەن شەشىلەتىندىكتەن ءبىرشاما قيىندىق تۋدىردى. ال بۇل جولى 2009-جىلى دەماركاتسيا جۇرگىزىلگەننەن كەيىن قورشاۋدىڭ كەسىپ ءوتۋىن تۇزەتۋ قاجەت بولدى. اۋماققا قاتىستى قانداي دا شەگىنىس جوق»، - دەدى ول تاراتىلعان ۆيدەودا.

ونىڭ اتاپ وتۋىنشە، 2008-جىلى كوپتوعاي اۋىلىنىڭ تۇرعىندارى ر ف اۋماعىنا مالدارى جايىلىپ كەتپەۋى ءۇشىن قورشاۋ تۇرعىزۋ تۋرالى ءوتىنىش بەرگەن.

«جەرگىلىكتى تۇرعىندار قيعاش وزەنى سۋاتىنا شىعا الادى. ول شامامەن وڭعا قاراي 150 مەتر عانا. وزەننىڭ ول تۇسى تەرەڭدەۋ جانە مال ر ف اۋماعىنا ءوتىپ كەتە المايدى. دەگەنمەن، جەرگىلىكتى تۇرعىنداردىڭ قالاۋى بويىنشا اكىمدىكپەن سۋاتقا قولايلى ءارى ىڭعايلى قول جەتكىزۋ ماسەلەسىن شەشەمىز. قورشاۋدىڭ ءوزىن ورناتۋ - بۇل جاڭالىق ەمەس. ول حالىقارالىق تاجىريبە سانالادى. كەز كەلگەن ەل قورشاۋ ورناتۋعا قۇقىلى. نەگىزىنەن ول شەكارا رەجيمىن، ونىڭ ىشىندە كارانتيندىك رەجيمدى قامتاماسىز ەتۋگە باعىتتالعان. ءبىزدىڭ شەكارا قورشاۋىن ۋاقىتشا الىپ تاستاۋعا قاتىستى كوپجىلدىق تاجىريبەمىز بار. ونى كيىك، اقبوكەن سىندى جانۋارلاردىڭ ماۋسىمدىق كوشى-قونى كەزىندە قولدانامىز. سوندىقتان بۇل شەشىلەتىن ماسەلە»، - دەدى ايدار ايمۋرزين.

ەسكە سالايىق، بيىلعى 14- ساۋىردە اتىراۋ وبلىسى، قۇرمانعازى اۋدانىنىڭ كوپتوعاي اۋىلىندا رەسەيدىڭ استراحان وبلىسىمەن شەكاراسىندا جاڭا شەكارالىق قورشاۋ تۇرعىزىلا باستاعان بولاتىن. جۇمىستاردى ق ر ۇ ق ك اسكەري قىزمەتشىلەرى جۇرگىزدى. ال بۇگىن شەكارا قىزمەتكەرلەرى ورناتقان باعانالاردى قايتا الىپ تاستاعانى بەلگىلى بولدى.



Up