Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

ەۆەرەستكە شىققان ەكى اياعى جوق قازاقستاندىق: ۇرەي كوپ بولدى ...

19 April 2021 17:03

نۇر- سۇلتان. قازاقپارات - استانالىق ماريا اۋەزوۆا ەكى اياعى جوق مۇگەدەك. سوعان قاراماستان جەرلەسىمىز ەۆەرەست بازالىق لاگەرى مەن كالا- پاتحار تاۋ شىڭىن ورمەلەپ باعىندىردى.

10 كۇنگە سوزىلعان ەكسپەديتسيانىڭ قىزىعى مەن قيىندىعى تۋرالى قازاقپارات ءتىلشىسى اۋەسقوي ءالپينيستتىڭ ءوزىنىڭ سۇراپ بىلگەن بولاتىن.

تاعدىردىڭ سىناعىنا ىلىككەن ەلوردا تۇرعىنى ماريا اۋەزوۆا قوس اياعىنان وسىدان 6 جىل بۇرىن ايىرىلعان. دەگەنمەن ءومىر سۇرۋگە دەگەن قۇلشىنىسى مەن جاقىندارىنىڭ قولداۋىنىڭ ارقاسىندا ماريا ءوز ارمان- ماقساتتارىنا قول جەتكىزىپ كەلەدى.





«ەۆەرەست بازالىق لاگەرىنە ورمەلەپ باعىندىرۋ مەنىڭ باستى ماقساتتارىمنىڭ ءبىرى بولدى. دايىندىقتى جەتەكشىم ۆاديممەن بىرگە وسىدان 6 اي بۇرىن باستادىق. جالپى تاۋ باسىنا شىعۋ ەكسپەديتسياسى 10 كۇنگە سوزىلدى جانە وسى ۋاقىت ارالىعىندا ءبىز ەكى قاشىقتىقتى باعىندىردىق. ءبىرىنشى، ەۆەرەست بازالىق لاگەرى 5364 مەتردى قۇرايدى جانە كالا- پاتحار تاۋىنا باسىنا شىقتىق ول 5640 مەتر. كۇنىنە شاشامەن 300 مەتردى باعىندىرىپ، بارلىعى 60 شاقىرىم جول ءجۇرىپ وتتىك»، - دەدى ماريا اۋەزوۆا.

تاۋ شىڭىن باعىندىرۋدا استانالىق اۋەسقوي ءالپينيستتىڭ قاسىندا جەتەكشىسىمەن قاتار ومىرلىك جولداسى بولعان.





«جول بويى شارشاعاندا نەمەسە وزدىگىمنەن وتە المايتىن جەرلەردە جەتەكشىم مەن كۇيەۋىم كومەكتەسىپ وتىردى. ارينە جول وڭاي بولعان جوق، بيىككە كوتەرىلگەن سايىن اۋا جۇتۋ دا قيىنداي ءتۇستى جانە سۋىق بولدى. ونىڭ ۇستىنە جول- جونەكەي وتە كوپ قوداس (ياك) توبىن كەزدەستىردىك، جابايى جانۋارلار ۇستىمنەن باسىپ وتە مە دەگەن ۇرەي كوپ بولدى. قاي جاعىنان الىپ قاراساقتا جول اۋىرعا سوقتى، ءبىراق ول ءۇشىن ەش وكىنبەيمىن»، - دەيدى ول.

سونداي- اق، جەرلەسىمىز اينالىساتىن نەگىزگى كاسىبى جانە بولاشاقتاعى ارمانىمەن ءبولىستى.

«جالپى تاۋعا ورمەلەۋدە ازداپ تاجىريبەم بار، بۇعان دەيىن بۋرابايداعى ءۇش بىردەي تاۋ شىڭىن باعىندىرعام، ونىڭ ىشىندە ەڭ بيىك كوكشە (سينيۋحا) تاۋى دا بار. نەگىزى ءوزىم مۇگەدەكتەر قوعامىنىڭ ديرەكتورى بولامىن، ودان بولەك ءوزىمنىڭ پوليگرافيالىق كاسىبىم بار. ەندىگى ارمانىم حان- ءتاڭىرى شىڭىن باعىندىرۋ»، - م. اۋەزوۆا.

اۆتور: ءالي يبرايەۆ


Keywords: الةم,
Up