Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

سولتۇستىك كورەيادا وقۋشى بولۋ دەگەن نە؟

13 May 2021 16:23

نۇر-سۇلتان . قازاقپارات - سوڭعى جىلدارى سولتۇستىك كورەيا سىرتقى الەمگە اقىرىنداپ اشىلىپ، تۋريستتەردى قابىلداي باستاعانىنا قاراماستان، ول جەردە قاراپايىم ادامدار قالاي تۇرىپ جاتقانىنان حابارىمىز جوقتىڭ قاسى.

شەتەلدىكتەرگە جەرگىلىكتى حالىقپەن ارالاسىپ- قۇرالاسۋعا تىيىم سالعان، ولارعا ەلدى جاقسى جاعىنان عانا تانىتاتىن نارسەلەردى كورسەتەدى. مىسالى، ۇلگىلى ءبىر- ەكى مەكتەپتى قايتا- قايتا كورسەتە بەرەدى. ورتاشا ستاتيستيكالىق سولتۇستىككورەيالىق وقۋشى تۋرالى اقپارات الۋ مۇمكىن ەمەس دەۋگە بولادى.

ءبىز شىنايى جاعدايدى انىقتاۋعا تىرىسىپ، ساياحاتشىلاردىڭ بلوگتارىن، دەرەكتى فيلمدەردى، قاشقىنداردىڭ ايتىپ بەرگەندەرىن، جۋرناليستتەر مەن فوتوگرافتاردىڭ سولتۇستىك كورەياعا جاساعان ساياحاتتارى تۋرالى رەسمي ەسەپتەمەلەرىن زەردەلەپ شىقتىق. دۇنيە ءجۇزىنىڭ ەڭ جابىق ەلىندە وقۋشى بولۋدىڭ قانداي ەكەنىن تۇسىنۋگە، ءبىر تابان بولسا دا، جاقىنداي تۇستىك دەگەن ويدامىز.

وقۋشىلار مەكتەپتە 12 جىل وقيدى جانە ساباق كەستەسى مەملەكەتتىڭ قاجەتىنە قاراي اۋىسىپ تۇرادى

سولتۇستىك كورەيادا مەكتەپتىك ءبىلىم بالانى 4 جاستان باستاپ بەرۋگە بولاتىن دايىندىق سىنىبىنان باستالادى، ءبىراق تەك 1 -جىل - 5 جاستان 6 جاسقا دەيىن مىندەتتى بولىپ سانالادى جانە باستاۋىش مەكتەپتىڭ ءبىر بولىگى بولىپ تابىلادى.

سولتۇستىككورەيالىق مەكتەپتەردە وقۋشىلار 12 جىل وقيدى. نەگىز رەتىندە 1950 -جىلدارى كەڭەستىك وقىتۋ جۇيەسى الىنعان، ءبىراق 2012 -جىلى زاماناۋي قاجەتتىلىكتەردى وتەۋ ءۇشىن ورتا ءبىلىم جۇيەسىنە رەفورما جۇرگىزىلدى. قازىر بالالار باستاۋىش سىنىپتا 6 جىل، ورتا سىنىپتا 3 جىل، جوعارى سىنىپتا تاعى 3 جىل وقيدى.





سولتۇستىك كورەيادا 6 كۇندىك وقۋ اپتاسى بەلگىلەنگەن، ءبىراق سەنبى كۇنى، ادەتتە ساباقتار از بولادى. ساباق ادەتتە ساعات تاڭعى 8 دە باستالادى، ءبىراق كەيدە وقۋشىلاردى اۋىل شارۋاشىلىعى جۇمىستارىنا جىبەرەدى - بۇنداي جاعدايدا ساباق كەستەسى وزگەرەدى. مىسالى، 2017 -جىلى ەلدىڭ سولتۇستىگىندەگى اۋدانداردا بولعان قۋاڭشىلىق كەسىرىنەن جەرگىلىكتى ستۋدەنتتەر مەن وقۋشىلار تاڭعى ساعات 5 تەن 10 عا دەيىن ەگىستىكتى سۋعارۋعا قاتىسۋعا، ال ساعات 11 دە ساباققا بارۋعا ءتيىس بولدى.

وقۋ جىلىندا ەكى سەمەستر بار: ءساۋىردىڭ 1 باستاپ شىلدەنىڭ 31 دەيىن جانە قىركۇيەكتىڭ 1 نەن باستاپ ناۋرىزدىڭ اياعىنا دەيىن. جالپى ۇزاقتىعى 3 ايعا ءسال جەتپەيتىن جازدىق، قىستىق جانە كوكتەمدىك دەمالىستار بار. بۇدان بولەك، جىل ىشىندە جوعارى سىنىپ وقۋشىلارى وقۋ- وندىرىستىك پراكتيكادان ءوتۋى، ال جازعى دەمالىس كەزىندە - اسكەري بولىمدەردە پراكتيكادان ءوتۋى ءتيىس.





جازدا، باعى جانىپ جاتسا، سولتۇستىككورەيالىق بالا «سوندوۆون» حالىقارالىق لاگەرىنە - ەكىنشى «ارتەككە»، ءتىپتى ودان دا اسىپ تۇسەتىن ەل ماقتانىشىنا بارا الادى. «سوندوۆونعا» ءالى كۇنگە دەيىن باسقا ەلدەردەن: رەسەيدەن، قىتايدان، پاكىستاننان، ۆەتنامنان، برازيليادان جانە افريكا ەلدەرىنەن بالالار كەلىپ تۇرادى. كورەيالىق بالالار ءۇشىن لاگەر تەگىن، ال شەتەلدىكتەرگە 2 اپتا لاگەردە بولۋ €450 بولادى.




سولتۇستىك كورەيادا مەكتەپ فورماسىن مەملەكەت بەرەدى

اتا- انالارعا بالالاردىڭ مەكتەپ فورماسىن ساتىپ الۋعا نەمەسە تىگۋگە تىيىم سالىنعان: ەل كوشباسشىسى كيم چەن ىن بارلىق بالالارعا بەلگىلەنگەن ۇلگىدەگى مەكتەپ فورماسىن جىل سايىن مەملەكەت بەرىپ تۇراتىنىن مالىمدەدى. ءبىراق بۇل ۋادە ءاردايىم ورىندالا بەرمەيدى. كەيدە كيىم بارىنە جەتپەي قالىپ جاتادى، ال ونىڭ ساپاسى كوڭىلدەن شىعا بەرمەيدى. پحەنياندا بالالاردىڭ مەكتەپ فورماسى بولۋىن مۇقيات قاداعالايدى، ال شەتەلدىك تۋريستەردىڭ اياعى جەتە بەرمەيتىن پروۆينتسيالاردا بۇعان اسا كوڭىل بولىنبەيدى.

بۇدان بولەك، سولتۇستىك كورەيانىڭ بارلىق وقۋشىلارى كەۋدەسىنىڭ سول جاعىندا كوسەمدەردىڭ سۋرەتى بار توسبەلگى جانە بالالار وداعىنا مۇشە بولعان سوڭ، قىزىل گالستۋك تاعىپ ءجۇرۋى ءتيىس.

قازىر وڭتۇستىك كورەيادا تۇرىپ جاتقان سولتۇستىككورەيالىق قاشقىن ءبىر كۇنى مەكتەپكە USA دەگەن ءىرى جازۋى بار فۋتبولكا كيىپ بارعانىن ايتىپ بەردى. ول كيىمدى كونتراباندالىق جولمەن قىتايدان اكەلگەن بولۋى كەرەك جانە ونى جەرگىلىكتى جايما بازاردا ساتقان. بالانىڭ اتا- اناسى دا، بالانىڭ ءوزى دە بۇل ارىپتەردىڭ نەنى بىلدىرەتىنىنەن ەش حابارى بولماعان. بۇل قىلىعى ءۇشىن بالا بۇكىل وقۋشىلار كوزىنشە سوگىس الدى، ال اتا- اناسى كەشىرىم سۇراپ حات جازۋعا ءماجبۇر بولدى.

وسىلاي بولا تۇرا بالالار امەريكالىق مۋلتيكتەردىڭ كەيىپكەرلەرىنىڭ بەينەسى بار ريۋكزاكتارمەن مەكتەپكە بارا بەرەدى، بۇعان نازار سالىپ جاتقان ەشكىم جوق.

سولتۇستىك كورەيانىڭ ءار ءتۇرلى مەكتەپتەرىندە بالالاردىڭ دايىندىق دەڭگەيى ءارقالاي





«ءبىرىنشى»، ياعني بىتىرگەن سوڭ بالانىڭ جوعارى وقۋ ورنىنا تۇسەتىن مۇمكىندىگى بولاتىن ارنايى تاڭداۋلى مەكتەپتەردە وقۋدىڭ ابىرويى جوعارىراق. ءار پروۆينتسيادا قۇرىعاندا ءبىر «ءبىرىنشى» مەكتەپ بار. پحەنياندا ونداي مەكتەپتىڭ تورتەۋى بار. بۇنداي وقۋ ورىندارىنا تۇسكىسى كەلەتىندەر قيىن ەمتيحان تاپسىرۋى ءتيىس.

اتا- انالاردىڭ كوپشىلىگى بالاسىنىڭ بايقاۋدان ءوتىپ كەتۋى ءۇشىن ەش ايانىپ قالمايدى، سوندىقتان، قازاقستانداعىداي، سولتۇستىك كورەيادا رەپەتيتورلار يندۋسترياسىنىڭ تاسى ورگە دومالاپ تۇر. ەڭ كوپ تاڭدالاتىن پاندەر - اعىلشىن ءتىلى مەن ماتەماتيكا. قوسىمشا ساباقتار ايىنا $ 10-30 كولەمىندە، بۇل ورتاشا ايلىق ەڭبەكاقى $ 50 تەڭ پحەنيان ءۇشىن اسا قىمبات.

فۋتبولعا قابىلەتى بار بالالار فۋتبولشىلارعا ارنالعان حالىقارالىق مەكتەپتە وقىپ، ول جەردە بالالاردان ۇلتتىق قۇرامانىڭ ويىنشىلارىن دايارلايدى. بۇل مەكتەپتەگى كونكۋرس - ءبىر ورىنعا 30 ادامنان كەلەدى. ول جەردە بارى- جوعى 200 وقۋشى وقيدى. وسى بالالاردىڭ كۇندەردىڭ كۇنىندە شەتەلگە شىعۋ مۇمكىندىگى بار.





سونىمەن بىرگە ونەر جانە شەتەل تىلدەرى مەكتەپتەرىندە وقىعىسى كەلەتىندەر كوپ- اق.

بولاشاق اسكەري قولباسشىلاردى مانگەندە ريەۆوليۋتسيالىق مەكتەبىندە دايارلايدى. بۇندا وقۋ ۋاقىتىنىڭ 3/4 بولىگى يدەولوگيالىق جانە اسكەري پاندەرگە ارنالادى. تۇستىك اسقا دەيىن كادەتتەردىڭ ساباق كەستەسىندە 6 ساباق بار، كۇننىڭ ەكىنشى جارتىسىندا بالالار فيزيكالىق جاتتىعۋلاردان بوسامايدى.

سولتۇستىك كورەيا مەكتەپتەرىندە وقۋ تەگىن، ءبىراق سىنىپتى كۇتىپ ۇستاۋ، جيھازدى جوندەۋ، قاجەتتى قۇرال- جابدىقتاردى الۋ ءۇشىن اتا- انالار اي سايىن ازعانتاي اقشا وتكىزىپ تۇرۋلارى ءتيىس. بۇنىمەن قويماي، وقۋشىلاردى، جوعارىدا ايتىپ وتكەنىمىزدەي، مەكتەپتەن تىس جەرلەردەگى جۇمىستارعا پايدالانادى. بۇنداي ءىس- شارالار اپتاسىنا كەمىندە 2 رەت بولىپ تۇرادى.

چۋچحە يدەيالارىنا ادال بولماي نەمەسە ەلدەن قاشىپ كەتۋگە تىرىسىپ، ءوز اتىنا كىر كەلتىرگەن اتا- انالاردىڭ بالالارى ۋاقىتىنىڭ كوبى اۋىر جۇمىس اتقارۋمەن وتەتىن ەڭبەك لاگەرلەرىنە جونەلەدى. ول جەردەن بوساپ شىققان سوڭ ولار كادىمگى مەكتەپتە وقۋ قۇقىنان ايىرىلادى.

سولتۇستىك كورەيا مەكتەپتەرىندە دۇنيە جۇزىندە وقىلاتىن پاندەر بەرىلەدى، ءبىراق قوسىمشا پاندەر بار

مەكتەپ باعدارلاماسىنا ماتەماتيكا، انا (كارىس) ءتىلى مەن ادەبيەتى، تاريح، گەوگرافيا، شەتەل ءتىلى - دەنى اعىلشىن جانە ورىس تىلدەرى كىرەدى. ورىس تىلىنەن ءتىپتى وليمپيادالار وتكىزىلىپ تۇرادى. جەڭىمپازدار رەسەيگە جاسالاتىن ساپارمەن ماراپاتتالادى. وقۋشىلارعا قىتاي ءتىلى اناعۇرلىم سيرەك وقىتىلادى.

ساياحاتشى انتون كارپوۆتىڭ شامالاۋىنشا قىتاي ءتىلىنىڭ جاپپاي وقىتىلماۋ سەبەبى - سولتۇستىك كورەيادان قاشاتىنداردىڭ كوپشىلىگى قىتايعا بەت الادى، ال ءتىل بىلەتىندەرگە بوتەن ەلدە بوي تاسالاۋ اناعۇرلىم وڭاي بولار ەدى.

اعىلشىن تىلىنە كەلسەك، ءبىلىم بەرۋ مينيسترلىگىنىڭ اتقامىنەرلەرىنىڭ باسا ايتۋىنشا، مەكتەپتەردە جاۋلارى بولعان امەريكالىق ەمەس، بريتاندىق اعىلشىن ءتىلى وقىتىلادى. دەيتۇرعانمەن، وقۋشىلاردىڭ اعىلشىن ءتىلىن ءبىلۋ دەڭگەيى جوعارى ەمەس. وسىنىڭ كەسىرىنەن سولتۇستىككورەيالىق قاشقىندار اعىلشىندىق وتە كوپ ەنىپ كەتكەن وڭتۇستىككورەيالىق سوزدەردى تۇسىنبەي قالىپ جاتادى.

دەنە شىنىقتىرۋ ساباقتارىنا دا كوپ كوڭىل بولىنەدى. جاۋىنگەرلىك ونەر (تحەكۆوندو) مەن تيردە مىلتىقتان اتىپ ۇيرەنۋ مىندەتتى پاندەر تىزىمىنە كىرەدى.

كەيىنگى كەزدەرى اقپاراتتىق تەحنولوگيالاردى وقىپ ۇيرەنۋگە ەرەكشە كوڭىل بولىنە باستادى، الايدا سولتۇستىك كورەيادا ينتەرنەتكە ەمىن- ەركىن كىرۋ مۇمكىن ەمەس. ءبىراق بۇل كەيبىر مەكتەپتەر مەن جوعارى وقۋ ورىندارىندا بلوكچەيندى وقۋعا كەدەرگى بولىپ جاتقان جوق. قابىلەتتى بالالارعا ينفورماتيكادان قوسىمشا ساباقتار وقىتۋ ءۇشىن كەي مەكتەپتەردە حيميا، فيزيكا جانە بيولوگيا ساباقتارىنان باس تارتىپ جاتىر.

ءبىلىم باعدارلاماسىندا بىزگە تاڭسىق كورىنەتىن ساياسي ۇگىت- ناسيحاتپەن بايلانىستى پاندەر بار: «كوممۋنيستىك مورال» ، «كوممۋنيستىك پارتيانىڭ ساياساتى»، «ۇلى كيم ير سەننىڭ ءومىرى» جانە ت. ب. ءبىراق قازىرگى تاڭدا سولتۇستىككورەيالىق مەكتەپتەردە بۇنداي پاندەردى ازايتۋ ءۇردىسى بايقالىپ ءجۇر.





سولتۇستىك كورەيا نەگىزگى پەداگوگيكالىق قاعيداتتاردى 1950-جىلدارى ك س ر و- دان الدى جانە ولاردى وسى كۇنگە دەيىن پايدالانىپ كەلەدى

بالالاردى ەس بىلەر- بىلمەستەن باستاپ ۇجىمشىلدىققا جانە تەمىردەي تارتىپكە باۋليدى. مەكتەپتە جانە بالاباقشادا حورمەن ايتىلاتىن انت، باس ءيىپ تاعزىم ەتۋ، ساپتا ءجۇرۋ سياقتى كوپشىلىك بىرگە ىستەيتىن عۇرىپتار مەن راسىمدىلىكتەر كوپ. بالالار ءتىپتى مەكتەپكە بارعاندا جانە قايتقاندا ساپ تۇزەپ جۇرەدى.

سىنىپتا بالالار سۇراقتىڭ جاۋابىن ورنىندا وتىرىپ ايتا المايدى: ولار قولىن كوتەرۋى، مۇعالىم رۇقسات ەتسە، ورنىنان تۇرىپ، بەلگىلەنگەن ءتارتىپ بويىنشا جاۋاپ قاتۋى ءتيىس. كوپ نارسەنى: تاقپاقتاردى، كوسەمدەرىنىڭ ايتقان سوزدەرىن، ەرەجەلەردى، ءارتۇرلى ۇيىمدارعا مۇشە بولىپ قابىلدانۋ ءۇشىن ايتىلاتىن انتتاردى جاتتاپ الۋى ءتيىس. ءوز پىكىرىڭدى ءبىلدىرۋ بىلاي تۇرسىن، ءتىپتى مۇعالىمدەرگە سۇراق قويۋدىڭ وزىنە وڭ قاباق تانىتىلمايدى.

وسى سەبەپتى وڭتۇستىك كورەياعا قاشا العان سولتۇستىككورەيالىق قاشقىنداردىڭ بالالارى، ولاردان بىرنارسەنى ويدان شىعارۋدى، وقىعان نارسەسى تۋرالى ويىن ءبىلدىرۋدى سۇراسا، جاۋاپ بەرۋگە قينالىپ قالادى. ءتىپتى ۇلگى بويىنشا سويلەم قۇراۋ سەكىلدى تاپسىرمالاردىڭ ءوزى ولاردى تىعىرىققا تىرەپ تاستايدى.

الايدا 2005 -جىلدان باستاپ پحەنيان مەكتەپتەرىندە وقىتۋدا شىعارماشىلىق تاسىلدەر ەنگىزىلىپ، جاتتاي بەرەتىن ماتەريال كولەمى ازايتىلا باستادى.

ساياسي ۇگىت- ناسيحات پەن تسەنزۋرا مەكتەپتەگى ءبىلىم بەرۋ جۇيەسىنىڭ بارلىق سالاسىن قامتيدى





ساياسي ناسيحات بالاباقشاعا بارعان العاشقى كۇندەرى باستالىپ كەتەدى. بالالارعا كوسەمدەرىنىڭ بالالىق شاعى تۋرالى ايتىپ، ولاردى ۇلتتىق باتىرلار عانا ەمەس، سونداي- اق سۋ بەتىندە جۇرە الاتىن، اعاش بۇرىنەن گراناتا جاسايتىن، ءبىر تاس اتىپ- اق دۇشپانىنىڭ كەمەسىن سۋعا باتىرىپ جىبەرەتىن نەمەسە 9 جاسىندا ياحتا جارىسىندا ءبىرىنشى كەلەتىن جارتىلاي اڭىز- ءاپسانالىق كەيىپكەرلەر رەتىندە سۋرەتتەيدى.

بالاباقشاعا جانە مەكتەپكە باراتىن بالالار ساياسي استارى انىق كورىنىپ تۇراتىن ساحنالانعان كورىنىستەرگە قاتىسىپ، پاتريوتتىق جانە جاۋلارىن كەلەمەجدەيتىن ولەڭدەردى ايتادى، ال ميليتاريزمگە ولار جورگەگىندە جاتقاندا تاربيەلەنەدى. سابيلەر ويىنشىق اۆتوماتتاردان اتادى، كونسترۋكتوردان يادرولىق زىمىرانداردى قۇراستىرادى، تانكتەر مەن اسكەري كەمەلەردىڭ سۋرەتىن سالادى.

امەريكالىق ساربازداردىڭ فيگۋرالارى ۇرىپ- سوعىپ جاتتىعۋعا پايدالانىلادى، ال وقۋ ورىندارىنىڭ قابىرعالارىندا ناسيحات پلاكاتتارى مەن كوسەمدەرىنىڭ ناقىل سوزدەرى ءىلۋلى تۇرادى. ساياسي ۇگىت- ناسيحات ساباقتارى باستاۋىش سىنىپتاردا اپتاسىنا 2 رەت، ورتا سىنىپتاردا - 6 رەت وتكىزىلىپ تۇرادى.

سولتۇستىك كورەيادان قاشىپ كەتكەن ايەلدىڭ ايتۋىنشا، ول وقىعان مەكتەپتە سەنبى كۇندەرى وقۋشىلار ءبىرىن ءبىرى كوسەمدەردىڭ وسيەتتەرىن ساقتاماعانىن اشكەرەلەپ وتىرۋى ءتيىس بولعان. مىسالى، الدەبىرەۋ ساباقتان كەشىگىپ قالسا نەمەسە تاپسىرمانى بىرەۋدەن كوشىرىپ السا، اشكەرەلەۋ كەرەك بولعان. ءبىراق، ادەتتە، سىنىپتاستار كىم كىمنىڭ جات قىلىعىن اشكەرەلەپ ايعاقتايتىنىن الدىن الا كەلىسىپ الىپ، ءمۇعالىمنىڭ كوزىنشە دايار ساحنالىق كورىنىستى ويناپ شىعاتىن.

ءبىراق وقۋشىلاردى يدەولوگيالىق تۇرعىدا «وڭدەۋ» وسىمەن ءبىتىپ قالمايدى: مەكتەپتە بارلىق پاندەر پارتيا ساياساتىنا قارايلاي وتىرىپ وقىتىلادى. ناسيحات ءتىپتى ماتەماتيكالىق ەسەپتەرگە دە كىرىپ كەتكەن. جۋرناليست مايكل برين ءوزىنىڭ كىتابىندا اعىلشىن ەتىستىكتەرىنىڭ شاقتار كەستەسى تۋرالى بىلاي جازادى: « ءبىز يانكيلەرمەن (امەريكالىقتار) سوعىستىق، ءبىز يانكيلەرمەن سوعىسىپ جاتىرمىز، ءبىز يانكيلەرمەن سوعىسامىز».

كلاسسيكالىق ادەبيەتتىڭ باسقا ويعا جەتەلەپ نەمەسە چۋحچە يدەولوگياسىنا ايتەۋىر ءبىر جەرى كەرەعار كەلەتىن ۇزىندىلەرى، بۇدان حيكايانىڭ لوگيكاسىنا زيانى تيسە دە، ەش اياۋسىز الىنىپ تاستالادى.

ۇكىمەتتىڭ قولايىنا جاقپايتىن تاريحي ايعاقتار كەرەگىنە قاراي وزگەرتىلە بەرەدى. مىسالى، سولتۇستىككورەيالىق مەكتەپتىڭ كەز كەلگەن تۇلەگى سوعىستى سولتۇستىك كورەيا ەمەس، وڭتۇستىك كورەيا باستاعانىن بىلەدى. گەوگرافيا ساباقتارىندا كاپيتاليستىك قۇرىلىس ۇستەمدىك ەتەتىن ەلدەردەگى حالىقتىڭ جاعدايى قانداي قيىن ەكەنىن ايتىپ، ءتىپتى اشتىققا شالدىققانداردىڭ سۋرەتتەرىن دە كورسەتەدى.

سولتۇستىك كورەياداعى وقۋ ماتەريالدارى ونشا ساپالى ەمەس جانە قاتەلەرى كوپ. وزەكتى اقپاراتى بار شەتەلدىك وقۋلىقتاردى پايدالانۋعا رۇقسات جوق، ويتكەنى ولاردان وقۋشىلار كەرەكسىز اقپاراتتى ءبىلىپ الۋى مۇمكىن.

بالا مەكتەپتەن تىس جەردە قوعامدىق ءبىلىم الىپ، سونىڭ ارقاسىندا قوعامنىڭ كونبىس مۇشەسىنە اينالادى




سولتۇستىككورەيالىق بالالار 2 سىنىپتا بالالار وداعىنا (كەڭەستىك داۋىردەگى پيونەرلىك ۇيىمنىڭ انالوگى) مۇشە بولىپ كىرەدى. بالا وسى ساتتەن باستاپ ءومىرىنىڭ اياعىنا دەيىن يدەولوگيالىق جينالىستارعا بارىپ تۇرۋ مىندەتىن موينىنا الادى. ۇيىمعا كىرگەن كەزدە بالالار انت بەرەدى، وسىدان سوڭ ولاردىڭ موينىنا قىزىل گالستۋك تاعىلادى.

سولتۇستىك كورەياداعى الەۋمەتتىك ساتىنىڭ كەلەسى باسقىشى - بۇل كەڭەستىك كومسومول ۇلگىسىمەن قۇرىلعان كيميرسەن- كيمچەنيرلىك جاستار وداعى. بۇل ۇيىمعا وقۋشىلاردى 15 جاستان باستاپ الىپ، ولاردان حالىقتىق پارتيانىڭ بولاشاق كادرلارىن دايارلايدى.

الەۋمەتتىك تاربيەلەۋدەگى باستى مىندەت بالالاردى جاعىمسىز ىقپالدان وقشاۋ ۇستاپ، مۇقيات باقىلاۋدا بولاتىن ورتانى قۇرۋ بولىپ تابىلادى.





وقۋدان قولى بوساعان ۋاقىتتا وقۋشىلار كوپتەگەن ۇيىرمەلەر مەن سەكتسيالاردا ءجۇرىپ، يدەولوگيالىق جينالىستارعا، كىتاپحانالارعا، مۇراجايلارعا، كورنەكى جەرلەرگە بارادى. وسى ءۇشىن ەلدە پيونەرلەر ۇيىنە ۇقساس عيماراتتار سالادى. مىسالى، پحەنيانداعى ستۋدەنتتەر جانە بالالار سارايىنا كۇنىنە 10 مىڭعا جۋىق ادام بارىپ تۇرادى.

كوپتەگەن باسقا ەلدەردەگىدەي سولتۇستىك كورەيادا وقۋشىلاردى ەكسكۋرسيالارعا اپارادى، ءبىراق تەك كورەيا حالىقتىق دەموكراتيالىق رەسپۋبليكاسىندا عانا بالالاردى كوپشىلىك الدىندا وتەتىن ءولىم جازالارىن كورۋگە ماجبۇرلەيدى. ءولىم جازاسىن كورۋگە اپارۋ ءۇشىن مەكتەپتە ءتىپتى ساباق بولماي قالۋى دا مۇمكىن.

سولتۇستىك كورەيالىق بالالار كىشكەنتاي كەزىنەن باستاپ الۋان ءتۇرلى ۇيىرمەلەرگە بارادى




سولتۇستىك كورەيادا نەشە ءتۇرلى ۇيىرمەلەر مەن سەكتسيالارعا بارمايتىن بالا نەكەن- ساياق. بالاباقشانىڭ وزىندە بۇلدىرشىندەرگە مۋزىكانى، ءان شىرقاۋدى، قولونەر تۇرلەرىن ۇيرەتەدى. ونىڭ ۇستىنە سالعان جەردەن ىجداھاتتىلىق پەن تەحنيكاعا كوڭىل ءبولۋدى تالاپ ەتەدى. باستاۋىش مەكتەپتە كوپتەگەن قىزدار بيگە قاتىسادى. دەنەنىڭ قيمىل- قوزعالىسقا يكەمدى بولىپ، ىرعاقتى سەزىنەتىن قابىلەتىڭ بولعانى - ۇلكەن ساتتىلىك.

ەڭ دارىندى بالالار ەسەپتىك كونتسەرتتەر مەن كوپتەگەن فەستيۆالدارعا قاتىسادى. فەستيۆالداردىڭ ەڭ ايگىلىسى «اريران» دەپ اتالادى. ول ءتىپتى، ادام ەڭ كوپ قاتىسقان شوۋ رەتىندە، گيننەستىڭ رەكوردتار كىتابىنا دا ەنگەن.

ارتىستىك قابىلەتىن كورسەتە الماعان بالالار سپورتپەن شۇعىلدانادى. ەلدە تانىمالدىعى جاعىنان 1-ورىندا فۋتبول تۇر. سونىمەن بىرگە قازىر باسكەتبولدىڭ (كيم چەن ىننىڭ دەننيس رودمانعا دەگەن ىقىلاسىنىڭ ارقاسىندا)، گولفتىڭ جانە قىسقى سپورت تۇرلەرىنىڭ تاسى ورگە دومالاپ تۇر.


bilim-all.kz


Keywords: الةم,
Up