Weather
Нур-Султан +7 °С
Almaty +14 °С
Exchange rates
USD 449.85
EUR 485.43
RUB 5.71
CNY 70.69

Допты хоккей: «Ақжайық» жаңа маусымдағы алғашқы жеңісіне қол жеткізді

3 December 2021 23:33

ОРАЛ. ҚазАқпарат – Допты хоккейден жоғары лига командалары арасында бүкілресейлік жарыста өнер көрсететін Оралдың «Ақжайығы» жаңа маусымдағы алғашқы матчтарын Краснотурьинскіде «Маякпен» өткізді, деп хабарлайды ҚазАқпарат тілшісі.

Орал допты хоккейінің түлегі Олег Чернов жаттықтыратын «Маяк» – үшінші топтағы мықты командалардың бірі.

Пандемияға байланысты өткен маусымға қатыса алмаған оралдықтар бірінші матчта айдын иелеріне 4:6 есебімен есе жіберді. «Ақжайық» сапынан бұл ойында ресейлік шабуылшы Максим Пахомов төрт голдың авторы атанып, ерекше көзге түсті.

Бүгін өткен екінші кездесуді батысқазақстандықтар қарқынды бастап, тағы бір ресейлік Сергей Башаев 2-минутта есеп ашты. Содан кейін М.Пахомов екі рет мергендік танытты. Айдын иелерінен Федор Миронов есепті қысқартқанымен, тағы бір ресейлік Александр Слугин 4:1-ге жеткізді.

Екінші таймда «Маяктан» Максим Никишов пен Павел Домрачев бір-бір голдан соқса, қонақтардан М.Пахомов та қарап қалмады.

Осылайша «Ақжайық» 5:3 есебімен жеңіске жетіп, бастапқы үш ұпайды қоржынға салды.

Оралдық маман Николай Шавалдиннің шәкірттері келесі кездесулерін 6-7 желтоқсанда сырт айдында «СКА-Свердловск» (Екатеринбург) командасымен өткізеді.

Еске сала кетейік, бұдан бұрын «Ақжайықтың» жаңа маусымға дайындалып жатқанын, сондай-ақ Тәуелсіздіктің 30 жылдығына орай елордадан басталған марафонның Оралда мәреге жеткенін жазған болатынбыз.





Up