Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

استانادا 3  اي بويى ۆاكسينا پاسپورتىن قولدان جاساپ ساتقان توپ ۇستالدى

17 September 2021 12:05

نۇر-سۇلتان. قازاقپارات - ەلوردانىڭ كريمينالدىق پوليتسيا قىزمەتكەرلەرى 3 اي بويى ۆاكسينا پاسپورتىن قولدان جاساپ ساتقان 3 ادامدى ۇستادى، دەپ حابارلايدى قازاقپارات ءتىلشىسى.

«ەلوردانىڭ كريمينالدىق پوليتسيا قىزمەتكەرلەرى قالادا پ ت ر تەست انىقتاماسىن نەمەسە ۆاكسيناتسيا پاسپورتىن جاساپ ساتاتىن ادامداردى انىقتاۋ بويىنشا تۇراقتى نەگىزدە ءىس- شارالار جۇرگىزەدى. بۇل جولى 38 جانە 40 جاستاعى 2 مەديتسينا قىزمەتكەرى مەن بىرەۋىنىڭ 44 جاستاعى كۇيەۋى ۇستالدى»، - دەپ جازادى نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتى.

پوليتسيا وكىلدەرىنىڭ ايتۋىنشا، كۇدىككە ىلىنگەن مەديتسينا قىزمەتكەرلەرى سوڭعى ءۇش اي بويى ەشقانداي ەكپە جاساماي-اق، ۆاكسيناتسيا پاسپورتىن جاساپ ساتىپ كەلگەن. ال ونىڭ اقىسىن الدىن الا الىپ وتىرعان. ساقتىق ءۇشىن جالعان پاسپورت جاساتۋشىلاردى تەك تانىستارىنىڭ كەڭەسى بويىنشا عانا قابىلداعان.

«بۇل ىستە مەديتسينا قىزمەتكەرلەرىنىڭ ءبىرىنىڭ كۇيەۋى «كليەنتتەرمەن» كەزدەسىپ، تولەمدى جيناپ وتىرعان. مەديتسينالىق مەكەمەگە كەلگەن «كليەنتتەر» «جالعان انىقتاما الۋ ءۇشىن كەلدىم» دەگەن قود- ءسوزدى ايتۋى كەرەك بولعان. كۇدىكتىلەردىڭ ۇستىنەن ق ر قىلمىستىق كودەسىنىڭ 385-بابى («جالعان قۇجاتتاردى قولدان جاساۋ، دايىنداۋ نەمەسە وتكىزۋ») بويىنشا سوتقا دەيىنگى تەرگەۋ باستالدى. باپ سانكسياسى 4 جىلعا دەيىن باس بوستاندىعىنان ايىرۋدى كوزدەيدى»، - دەپ جازىلعان دەپارتامەنتتىڭ مالىمەتىندە. كۇدىكتىلەردى ءتىنتۋ كەزىندە مەديتسينالىق قۇجاتتار، ۇيالى تەلەفوندار تاركىلەنگەن.

«تەرگەۋ اياسىندا قاجەتتى ساراپتامالار تاعايىندالدى. مەديتسينا قىزمەتكەرلەرى كىنالارىن مويىنداپ، تۇسىنىكتەمە بەردى. جالعان ۆاكسيناتسيا پاسپورتىن الۋ ءۇشىن ولارعا جۇگىنگەن ادامداردىڭ سانى ناقتىلانىپ جاتىر. نۇر-سۇلتان قالاسىنىڭ پوليتسيا دەپارتامەنتى ازاماتتارعا كەز-كەلگەن زاڭسىز ارەكەتتەر جاۋاپكەرشىلىككە اكەپ سوقتىراتىنىن ەسكەرتەدى»، - دەپ جازادى دەپارتامەنتتىڭ باسپا ءسوز قىزمەتى.


اۆتور: ەسىمجان ناقتىباي


Keywords: ايماق,
Up