Weather
Нур-Султан +7 °С
Almaty +14 °С
Exchange rates
USD 449.85
EUR 485.43
RUB 5.71
CNY 70.69

ورالدا تۇرمەدەگى توبەلەسكە بايلانىستى 12 قىزمەتكەر جاۋاپقا تارتىلدى

19 May 2022 14:55

ورال. قازاقپارات - ورالدا تۇرمەدەگى توبەلەسكە بايلانىستى 12 قىزمەتكەر تارتىپتىك جاۋاپكەرشىلىككە تارتىلدى.

ب ق و بويىنشا قىلمىستىق-اتقارۋ جۇيەسى دەپارتامەنتىنىڭ باسپا ءسوز قىزمەتى ءمالىم ەتكەنىندەي، سونىڭ ىشىندە رۋ-170/2 مەكەمەسىنىڭ ءبىر قىزمەتكەرى قىزمەتىنەن شەتتەتىلدى، دەپ حابارلايدى قازاقپارات ءتىلشىسى.

«تەكسەرۋ قورىتىندىسى بويىنشا تاعى ءۇش قىزمەتكەرگە قىزمەتىنە تولىق سايكەس ەمەستىگى جونىندە ەسكەرتۋ بەرىلدى. ءتورت ادامعا قاتاڭ سوگىس جاريالاندى. ۇشەۋى سوگىس السا، تاعى بىرەۋىنە ەسكەرتۋ بەرىلدى»، - دەپ حابارلادى ۆەدومستۆودان.

ەسكە سالا كەتەيىك، ب ق و بويىنشا قىلمىستىق- اتقارۋ جۇيەسى دەپارتامەنتىنىڭ باسپا ءسوز قىزمەتى ءمالىم ەتكەنىندەي، وقيعا 10-مامىر كۇنى شامامەن ساعات 05.00-دە قاۋىپسىزدىگى ورتاشا رۋ-170/2 مەكەمەسىندە بولدى. مەكەمە جاتاقحاناسىندا جازاسىن وتەۋشىلەر ءبىر-بىرىمەن سوزگە كەلىپ، سوڭى بۇزاقىلىق ارەكەتكە ۇلاسقان. 10 مينۋت ىشىندە كەزەكشى جاساقتىڭ كۇشىمەن توبەلەس توقتاتىلعان. بارلىق قاتىسۋشىلارعا العاشقى مەديتسينالىق جاردەم كورسەتىلىپ، وبلىستىق كوپبەيىندى اۋرۋحاناعا جەتكىزىلگەن. جازاسىن وتەۋشىلەردىڭ ومىرىنە قاۋىپ جوق.

اتالعان وقيعا بويىنشا ق ر ق ك 107-بابى 2-بولىگىنە (دەنساۋلىققا قاساقانا اۋىرلىعى ورتاشا زيان كەلتىرۋ) سايكەس پوليتسيا قىزمەتكەرلەرى سوتقا دەيىنگى تەرگەۋ امالدارىن جۇرگىزىپ جاتىر.

ب ق و دەنساۋلىق ساقتاۋ باسقارماسىنىڭ باسپا ءسوز قىزمەتى وسى وقيعا كەزىندە جاق سۇيەگى سىنعان ادامنىڭ ءالى اۋرۋحانادا جاتقاندىعىن جەتكىزدى.

Keywords: ايماق,
Up