Weather
Нур-Султан +7 °С
Almaty +14 °С
Exchange rates
USD 449.85
EUR 485.43
RUB 5.71
CNY 70.69

كەن ورىندارىن پايدالانۋدا 118 ليسەنزيا توقتاتىلدى - وسكەنبايەۆ پرەزيدەنتكە ەسەپ بەردى

23 May 2022 18:01

نۇر- سۇلتان. قازاقپارات - يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ پرەزيدەنت قاسىم- جومارت توقايەۆقا ۆەدومستۆونىڭ جىل باسىنان بەرى اتقارعان جۇمىستارى تۋرالى ەسەپ بەردى.

قازاقپارات بۇل تۋرالى اقورداعا سىلتەمە جاساپ حابارلايدى.

پرەزيدەنتكە قاڭتار وقيعاسى كەزىندە زارداپ شەككەن نىسانداردى قالپىنا كەلتىرۋ ءۇشىن قابىلدانعان شارالار تۋرالى باياندالدى. مينيسترلىك سوڭعى 3 جىلدا پايدالانۋعا بەرىلگەن تۇرعىن ۇيلەرگە تەكسەرىس جۇرگىزىپ، ستاتيستيكالىق دەرەكتەردى انىقتادى. باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ، قۇرىلىس نارىعىن مونوپوليادان ارىلتۋ جانە ونىڭ باسەكەگە قابىلەتتىلىگىن ارتتىرۋ جونىندە شارالار توپتاماسىن ازىرلەدى. سونداي- اق باسپاناسى جوق، جاعدايى ناشار ازاماتتاردى قولداۋعا باعىتتالعان جاڭا مەملەكەتتىك تۇرعىن ءۇي باعدارلاماسى ىسكە قوسىلدى.

بۇگىنگە دەيىن اتالعان باعدارلاما بويىنشا 2,5 مىڭ ءوتىنىم ماقۇلداندى. ءمينيستردىڭ ايتۋىنشا، ونەركاسىپ سالاسىندا يمپورت الماستىرۋعا باعىتتالعان 700 ماڭىزدى ينۆەستيتسيالىق جوبا دايارلانعان. ارناۋلى ەكونوميكالىق ايماقتار جۇمىسىنىڭ تيىمدىلىگىن ارتتىرۋ جونىندە شەشىمدەر قابىلدانعان. پايدالى قازبالار كەن ورىندارىنىڭ بارىنە تەكسەرىس جۇرگىزىلگەن. قازىرگى ۋاقىتتا 118 ليسەنزيانىڭ قىزمەتى توقتاتىلعان. 57 كەلىسىمشارت ۇزىلگەن. جەر قويناۋىن پايدالانۋشىلارعا ولقىلىقتاردى جويۋ ءۇشىن 73 ەسكەرتپە جولدانعان. تاۋ- كەن جانە مەتاللۋرگيالىق كاسىپورىندارمەن بىرلەسىپ، ورتا جانە جوعارعى شەكتەۋلى وڭدەۋشى ونىمدەر ءوندىرىسىن وركەندەتۋ ءۇشىن كەشەندى شارالار ازىرلەنگەن. سونىمەن قاتار مينيسترلىك ەلىمىزدىڭ ترانزيتتىك الەۋەتىن ارتتىرۋ جانە كەدەن لوگيستيكاسى سالاسىنا ءىرى حالىقارالىق كومپانيالاردى تارتۋ ءۇشىن اۋقىمدى جۇمىستار جۇرگىزدى. قايىربەك وسكەنبايەۆ رەسپۋبليكالىق ماڭىزى بار اۆتوجولداردى جاڭعىرتۋ، جوندەۋ جانە سالۋ جۇمىستارىنا دا ارنايى توقتالدى.

پرەزيدەنت ەلىمىزدىڭ كۇرە جولدارى قۇرىلىسىنا قاتىستى ماسەلەنىڭ ستراتەگيالىق ماڭىزى بار ەكەنىن اتاپ ءوتىپ، ونىڭ ايرىقشا باقىلاۋدا بولاتىنىن ەسكە سالدى. سونىمەن قاتار قاسىم- جومارت توقايەۆ كورشىلەس مەملەكەتتەرمەن ەكونوميكالىق ىنتىماقتاستىقتى دامىتۋ قاجەت ەكەنىنە نازار اۋدارىپ، مينيسترگە ءبىرقاتار ناقتى تاپسىرما بەردى.

Up