Weather
Astana +7 °С
Almaty +14 °С
Exchange rates
USD 421.58
EUR 496.83
RUB 5.53
CNY 62.20

ەلورداداعى 10 مەكتەپكە تاريحي تۇلعالاردىڭ ەسىمدەرى بەرىلدى

28 September 2021 13:20

نۇر-سۇلتان. قازاقپارات - نۇر- سۇلتان قالاسىنداعى 10 مەكتەپ پەن 1 فيلارمونيا جانە 1 تەاترعا قازاقستاننىڭ تاريحي تۇلعالارى، تانىمال جازۋشىلارى مەن قوعام قايراتكەرلەرىنىڭ ەسىمدەرى بەرىلدى.

بۇل تۋرالى ءوزىنىڭ Facebook پاراقشاسىندا «نۇر- سۇلتان قالاسىنىڭ تىلدەردى دامىتۋ جانە مۇراعات ءىسى باسقارماسى» م م باسشىسى ساكە ەسىركەپ جازدى، دەپ حابارلايدى قازاقپارات. «ەلوردامىزدىڭ 10 مەكتەبى مەن 2 مادەنيەت مەكەمەسىنە تاريحي تۇلعالاردىڭ ەسىمىن بەرۋ تۋرالى قازاقستان رەسپۋبليكاسى ۇكىمەتىنىڭ 2021 -جىلعى 23-قىركۇيەكتەگى № 669-قاۋلىسى شىقتى. مۇنى مەكەمە ۇجىمدارى، عالىمدار، زيالى قاۋىم، جالپى كوپشىلىك كوپتەن كۇتىپ ءجۇر ەدى»، - دەدى ول.

سونىمەن:

№ 35-مەكتەپ- ليتسەيگە ءنازىر تورەقۇلوۆتىڭ؛

№ 51-مەكتەپ- گيمنازياعا مۇستافا شوقايدىڭ؛

№ 53-مەكتەپ- ليتسەيگە باۋىرجان مومىش ۇلىنىڭ؛

№ 54-مەكتەپ- ليتسەيگە اقسەلەۋ سەيدىمبەكتىڭ؛

№ 61-ورتا مەكتەپكە قانىش ساتبايەۆتىڭ؛

№ 67-گيمنازياعا ءىلياس ەسەنبەرليننىڭ؛

№ 74-مەكتەپ- گيمنازياعا مۇقاعالي ماقاتايەۆتىڭ؛

№ 78-مەكتەپ- گيمنازياعا سماعۇل سادۋاقاس ۇلىنىڭ؛

№ 86 مەكتەپ-گيمنازياعا مۇحتار اۋەزوۆتىڭ؛

№ 90-گيمنازياعا جازۋشى قايىم مۇحامەدحانوۆتىڭ؛

نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنا ەركەعالي راحماديەۆتىڭ؛ نۇر-سۇلتان قالاسى اكىمدىگىنىڭ «Nomad City Hall» تەاترىنا ءازىربايجان مامبەتوۆتىڭ ەسىمى بەرىلدى.

«قۇتتى بولسىن! بۇگىن ۇلى جازۋشى مۇحتار اۋەزوۆتىڭ تۋعان كۇنى. سوندىقتان بۇگىنگى جاڭالىق ايگىلى قالامگەردىڭ 124 جىلدىعىنا جاقسى سىي بولدى دەپ ويلايمىن. الدىمىزدا ءالى ءبىراز مەكتەپ پەن مەملەكەتتىك نىسانعا دا ءىرى تۇلعالارىمىزدىڭ اتىن بەرۋ جوسپاردا بار. ءبارى ءوز رەتىمەن، قولدانىستاعى زاڭنامالىق راسىمگە سايكەس ىسكە اسادى»، - دەلىنگەن جازبادا.

Keywords: ايماق,
Up