今日天气
阿斯塔纳 +7 °С
阿拉木图 +14 °С
今日坚戈汇率
USD 421.58
EUR 496.83
RUB 5.53
CNY 62.20

Таразда «Денсаулық» паркі ашылды

19 六月 2021 16:07

ТАРАЗ. ҚазАқпарат – Таразда «Денсаулық» мәдениет және демалыс саябағы ашылды.

Саябақ құрылысы ел тәуелсіздігінің 30 жылдығына орай облыс әкімі Бердібек Сапарбаевтың бастамасымен қолға алынған «Таразға тарту» жобасы аясында жүзеге асқан,- деп хабарлайды ҚазАқпарат тілшісі.

Тараз қаласындағы Қарасу шағынауданында бой көтерген демалыс орталығының ашылу салтанатына аймақ басшысы арнайы қатысып, сала мамандарын мерекелерімен құттықтады.

«Әрбір адам үшін ең қымбат байлық – денсаулық. Басы ауырып, балтыры сыздаған жанның дәрігерге бармайтыны кемде-кем шығар. Әсіресе, мынандай індет кезінде, ақ халатты абзал жандардың қадірі арта түскені шындық. Қауіп-қатерге қарамастан, сіздер әрбір науқастың өмірін сақтап қалу үшін күрестіңіздер, басқасын айтпағанда, бір жарым жылдың ішінде сіздердің жасаған еңбектеріңіз ұшан-теңіз. Күн демей, түн демей, шаршамай, ерінбей жұмыс істедіңіздер. Сол қажырлы еңбектеріңізбен мыңдаған қазақстандықтардың өмірін сақтап қалдыңыздар. Әрине, індет оңай соққан жоқ. Қаншама азаматтарымыздан айырылдық, оның ішінде сіздер де әріптестеріңізді жоғалттыңыздар. Олардың еңбектері ешқашан ұмытылмайды. Індетті еңсеріп келе жатқанымыздың өзі еліміздің бірлігі мен ынтымағының арқасы», - дей келе Бердібек Сапарбаев сала мамандарын құттықтады.





Коронавирус инфекциясына қарсы күресте жамбылдықтар 20 медицина қызметкерінен айырылды. Саябақта олардың құрметіне арнайы ескерткіш бой көтерген. Ескерткіш тұғырындағы «Өзгеге шамшырақ болып, өзім өшем» деген жазу ешкімді де бей-жай қалдырмаса керек. Ескерткішті арнайы Нұр-Сұлтан қаласында тұратын жерлесіміз, мүсінші Бектур Майрин сегіз күннің ішінде жасап шыққан екен. Сондай-ақ, ондағы «Сіздің денсаулығыңыз өз қолыңызда» атты стелла да денсаулықтың адам үшін қаншалықты маңызды екенін меңзеп тұрғандай.

Саябақта дене шынықтырумен белсенді түрде айналысуға және балалардың ойнауына да барлық мүмкіндіктер жасалған. Үстел теннисі, воркаут, футбол, баскетбол және балалар алаңшасы да келушілер үшін әрдайым ашық болмақ.

Өңір басшысы саябақты аралап көріп, ондағы ойын көрігінін қыздырған балаларға арнайы сыйлықтар үлестірді. Облыс әкімінің келуін күтіп жүрген тұрғындар да рахметін айтып, ақжарма тілектерін жеткізді. Бұрын бұл маңдағы жағалаудың бәрі қамыс басып қараусыз қалған болатын. Міне, бүгін де адам танымастай өзгерген. Асыр салып ойнаған балалардың да қуанышында шек жоқ.

«Мынандай қамыс пен қоқыс басқан жерді аз уақыттың ішінде гүлдендіріп, саябаққа айналдырады деген ой үш ұйықтасақ түсімізге кірген емес. Осының барлығы балаларымыздың болашағы үшін жасалып жатқанын түсінеміз. Жас жеткіншектерге салауатты өмір салтын насихаттайтын, атына заты сай «Денсаулық» демалыс орнына айналатынына сенеміз», - дейді қала тұрғыны Шура Қосшыбаева.

Айта кетейік, саябақтың құрылысына медицина қызметкерлері бір күндік еңбекақысын аударып, өз үлестерін қосқан. Қолдау көрсеткен демеушілер де бар. Саябақ аумағы – 5 гектар. Каналдың жағалау аймағында орналасқан. Онда 1000-нан астам көшет, раушан гүлдер отырғызылған. Субұрқақтар мен кішкентай сәулетті мүсіндер де саябаққа өзгеше сән беріп тұр.

Шара соңында облыс әкімі Бердібек Сапарбаев пен облыстық мәслихат хатшысы Махмедқали Сарыбеков сала мамандарын «Еңбек ардагері» медалімен, «Денсаулық сақтау ісіне қосқан үлесі үшін», «Денсаулық сақтау ісінің үздігі» төсбелгілерімен және «Облысқа сіңірген еңбегі үшін» медалімен марапаттады.











回到顶部