今日天气
Нур-Султан +7 °С
阿拉木图 +14 °С
今日坚戈汇率
USD 449.85
EUR 485.43
RUB 5.71
CNY 70.69

تارازدا مەكتەپ ءبىتىرۋشى تۇلەك كولىكپەن كانالعا ءتۇسىپ كەتتى

26 五月 2022 07:56

تاراز. قازاقپارات - تاراز قالاسىندا بۇگىن مەكتەپ بىتىرگەن تۇلەك اۆتوموبيلدى باسقارا الماي كانالعا كولىگىمەن بىرگە ءتۇسىپ كەتتى، دەپ حابارلايدى قازاقپارات ءتىلشىسى.

«25-مامىر كۇنى تاراز قالاسىنداعى تاۋكە حان كوشەسىندە ورنالاسقان «قازاق حاندىعى» مونۋمەنتى جانىندا «لەكسۋس» ماركالى كولىك كانال سۋىنا ءتۇسىپ كەتتى. پاترۋلدىك پوليتسيا دەرەۋ وقيعا ورنىنا باردى. انىقتالعانداي 21 جاستاعى كولىك جۇرگىزۋشىسى اتالعان جەرگە مەكتەپ ءبىتىرىپ جاتقان تانىس تۇلەكتەرمەن بىرگە مەرەكەلەۋگە كەلىپتى. ول كولىگىنەن شىعىپ كەتكەن كەزدە تۇلەكتەردىڭ ءبىرى كولىكتىڭ رۋلىنە يەسىنىڭ رۇقساتىنسىز وتىرىپ، ونى جۇرگىزبەك بولعان. ناتيجەسىندە گاز بەن تەجەگىشتى شاتاستىرىپ العان 17 جاستاعى مەكتەپ تۇلەگى كولىكپەن بىرگە كانال سۋىنا ءتۇسىپ كەتكەن» - دەپ بايانداپ بەردى بولعان وقيعانى جامبىل وبلىستىق پوليتسيا دەپارتامەنتى باسپا ءسوز قىزمەتىنىڭ جەتەكشىسى گۇلسارا مۇحتارقۇلوۆا.

پوليتسيا دەپارتامەنتىنىڭ مالىمەتىندە ايتىلعانداي، رولدەگى جاس ءوسپىرىم زارداپ شەكپەگەن جانە ول كولىكتە جالعىز بولعان.

«مەديتسينالىق تەكسەرۋدىڭ ناتيجەسىنە سايكەس جاس ءوسپىرىم ىشىمدىك ىشپەگەن. ق ر اكىمشىلىك قۇقىقبۇزۋشىلىق تۋرالى كودەكسى 612-بابىنىڭ 2-تارماعىنا ساي اتالعان جاس ءوسپىرىمنىڭ اتا- اناسى اكىمشىلىك جاۋاپقا تارتىلدى. اتالعان باپقا سايكەس 20 ا ە ك (63600 تەڭگە) كولەمىندە ايىپپۇل سالىنادى»، - دەيدى ول.

سونداي-اق، ءوز ەركىمەن كولىك باسقارعان مەكتەپ ءبىتىرۋشى تۇلەكتىڭ اتا-اناسىمەن پروفيلاكتيكالىق اڭگىمە جۇرگىزىلگەن.

«اۆتوموبيلگە كەلگەن زارداپتى وتەۋ كەرەك بولعان جاعدايدا، ەكىجاق ازاماتتىق سوت ارقىلى ءوزارا شەشە الادى»، - دەيدى گ. مۇحتارقۇلوۆا.


关键词: ايماق,
回到顶部