今日天气
Нур-Султан +7 °С
阿拉木图 +14 °С
今日坚戈汇率
USD 449.85
EUR 485.43
RUB 5.71
CNY 70.69

تۇركىستان وبلىسىندا ەرەكشە بيزنەس ءتۇرى بەلسەندى دامىپ جاتىر

17 五月 2022 10:08

نۇر-سۇلتان. قازاقپارات - تۇركىستان وبلىسىندا تۇيە شارۋاشىلىعى وركەندەپ، تۇرعىندار ءونىم ساۋداسىن قىزدىرىپ جاتىر.

بۇل تۋرالى «حابار 24» تەلەارناسىنىڭ سيۋجەتىندە ايتىلعان.

ءبىر عانا ارىس قالاسىندا وندىرىلگەن شۇبات پەن قىمىران ەلىمىزدىڭ ءار وڭىرىندە ۇلكەن سۇرانىسقا يە. وسى مۇمكىندىكتى ۇتىمدى پايدالانعىسى كەلگەن عالىمدار ايماقتا تۇيە سۇتىنەن قۇرعاق ۇنتاق شىعاراتىن زاۋىت اشتى. بۇل دەرمەنە اۋىلدىق وكرۋگىنە قاراستى سانالى ەلدى مەكەنى. مۇنداعى تۇرعىندار تۇيەنىڭ بابىن تاۋىپ، ءسۇتىن وڭدەۋدى كاسىپ ەتىپ العان. شارۋاشىلىقتى يگەرگەندەر تاۋلىگىنە جەتى مىڭ ليتر شۇبات مەن قىمىران ءونىمىن ساۋدالايدى. تۇركىستان مەن شىمكەنت، ءتىپتى قاراعاندى قالاسىنا دا جونەلتىپ جاتىر.

ەندى مەيرامگۇل اپا قىمىراندى ۇيدە وتىرىپ-اق، ءسۇت كۇيىندە ساۋدالايتىن بولدى. سەبەبى وڭىرگە كەلگەن كاسىپكەرمەن كەلىسىمشارت جاساسىپ، كۇنىنە تۇراقتى تۇردە 2 مىڭ ليتر تۇيە ءسۇتىن دايىنداپ بەرۋگە ۋاعدالاستى. ءتىپتى كاسىپكەر ءسۇتتى بالعىن كۇيىندە ساقتاۋ ءۇشىن ارنايى تەحنيكانى دا ورناتىپتى. بۇعان دەيىن تۇراقتى تۇتىنۋشىسى بولماعاندىقتان قالاعا تاسىپ، سابىلىپ جۇرەتىن.

«ءبىز بۇعان دەيىن توي- جيىندارعا تاپسىرىستار الدىق. جانە ءوزىمىزدىڭ وتكىزەتىن شىمكەنتتە ساۋدا نۇكتەلەرىمىز بار ەدى. ەندى ولار دا كەيدە جاعدايلارىنا بايلانىستى توقتاپ تۇرادى. سوندىقتان ەندى وسى كاسىپكەرلەرمەن كەلىسىمشارتقا وتىردىق»، - دەيدى سانالى اۋىلىنىڭ تۇرعىنى مەيرامگۇل جولىمبەتوۆا.

ايماقتا تۇيە شارۋاشىلىعى جاقسى دامىعان. سوندىقتان كاسىپكەردىڭ سۇرانىسىن وتەۋگە قورقىنىش جوق، دەيدى مۇنداعىلار. اۋىل اراسى بىرىگىپ، قاجەتتى كولەمدى جىلدام تولىقتىرا قويادى.

«ارىس قالاسىندا 5 مىڭعا جۋىق تۇيەمىز بار. ونىڭ 2,5 مىڭى انالىق باس. قازىرگى تاڭدا وسى سانالى ەلدى مەكەنىندە تۇيە شارۋاشىلىعى جاقسى دامىعان. ال قازىرگى تاڭدا ولار جەرگىلىكتى جەردىڭ ينۆەستيتسيالىق ونىمدىلىگىن ارتتىرايىق دەپ ارىس قالاسىنا جيناپ، وتكىزىپ جاتىر»، - دەدى ارىس قالالىق اۋىل شارۋاشىلىعى ءبولىمىنىڭ باسشىسى نۇرلىبەك بىلالبەكوۆ.

ال شيپالى ءونىمدى قۇرعاق ۇنتاققا اينالدىرۋ، ەكسپورتقا مۇمكىندىك بەرەدى، دەيدى كاسىپكەرلەر. ونىڭ ۇستىنە، گەرمانيا مەن وڭتۇستىك كورەيانىڭ تۇتىنۋشىلارى بۇل ونىمگە قىزىعۋشىلىق تانىتىپ وتىر ەكەن. وسى سالانى جىلدار بويى ءجىتى زەرتتەگەن عالىمدار ينۆەستور تارتىپ، تۇيە ءسۇتىن تەرەڭ وڭدەۋگە مۇمكىندىك الدى.

«تۇيە ءسۇتى جوعارى تەمپەراتۋرادا وڭدەگەندى جاقسى كورمەيدى. ءبىز وسى پروبلەمانى شەشۋ ماقساتىندا جالپى ءسۇت ءونىمىن وڭدەيتىن تەحنولوگيالىق زۆەنوعا وزگەرىستەر ەنگىزدىك»، - دەدى زاۋىت ديرەكتورى ەربول دۇيسەمبين.

اتا كاسىپتى الەمگە تانىتقىسى كەلگەندەر ۇلتتىق سۋسىنعا سۇرانىستىڭ كوپتىگىن ايتادى. سوندىقتان قۇرامىنداعى دارۋمەندەر مەن مينەرالداردى ساقتاپ قالۋ ءۇشىن وتاندىق عالىمداردىڭ كومەگىنە جۇگىنگەن. ارىستا اشىلعان ءوندىرىس ورنى سۋبليماتسيالىق ماشينا مەن مەمبرانالىق قوندىرعى ارقىلى سالقىن تەمپەراتۋرادا قۇرعاق ۇنتاقتى شىعارۋعا مۇمكىندىك بەردى.


关键词: ايماق,
回到顶部