今日天气
Нур-Султан +7 °С
阿拉木图 +14 °С
今日坚戈汇率
USD 449.85
EUR 485.43
RUB 5.71
CNY 70.69

ەلباسى قازاقستان حالقىنا ۇندەۋ جاسادى

18 一月 2022 17:03

نۇر- سۇلتان. قازاقپارات – قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ قازاقستان حالقىنا ۇندەۋ جاسادى، دەپ حابارلايدى elbasy.kz سايتى.

***

قازاقستان رەسپۋبليكاسىنىڭ تۇڭعىش پرەزيدەنتى - ەلباسى ن. ءا. نازاربايەۆتىڭ قازاقستان حالقىنا ۇندەۋى

قۇرمەتتى وتانداستار!

ارداقتى اعايىن!

2022 - جىل حالقىمىز ءۇشىن كۇردەلى دە قاتەرلى سىناقتان باستالدى. بارشاڭىزعا ءمالىم، ۇيىمداسقان ەكسترەميستىك توپتار ەلىمىزدە جاپپاي تارتىپسىزدىك ورناتىپ، تەرروريستىك شابۋىل جاسادى. سونىڭ سالدارىنان بەيبىت تۇرعىندارىمىز زارداپ شەكتى. قاسىرەتتى وقيعا كەزىندە قازا بولعانداردىڭ جاقىندارى مەن تۋعان- تۋىستارىنىڭ قايعىسىنا ورتاقتاسىپ، كوڭىل ايتامىن.

لاڭكەستەر ەلدىگىمىز بەن ەگەمەندىگىمىزگە، تىنىشتىعىمىز بەن تۇتاستىعىمىزعا قاۋىپ ءتوندىرىپ، جۇرتتىڭ بەرەكەسىن قاشىردى. پرەزيدەنتىمىز قاسىم- جومارت كەمەل ۇلى توقايەۆتىڭ شۇعىل شەشىمدەرىنىڭ ارقاسىندا ەل ىرگەسى سوگىلگەن جوق. مەملەكەت باسشىسىن قولداۋ - بارشامىزدىڭ ازاماتتىق بورىشىمىز. ەندىگى كەزەكتە وسى وقيعادان ساباق الىپ، مۇنداي باسسىزدىققا جول بەرمەۋگە ءتيىسپىز.


بابالارىمىز عاسىرلار بويى اڭساعان تاۋەلسىزدىكتىڭ وتىز جىلى ىشىندە اتقارعان ىستەرىمىز از ەمەس. قازاقستان الەمگە تانىلعان ەڭسەلى ەلگە اينالدى. ۇلان- عايىر شەكارامىز تۇبەگەيلى بەكىتىلدى. ەلىمىزدە ىرگەلى رەفورمالار جۇزەگە اسىپ، ورتالىق ازيادا كوش باستادىق. ەۋرازيا جۇرەگىندە، سارىارقا توسىندە جاڭا استانامىز بوي كوتەردى. بىرلىك باردا ەشبىر جاۋ ساعىمىزدى سىندىرا الماس.
回到顶部