今日天气
Нур-Султан +7 °С
阿拉木图 +14 °С
今日坚戈汇率
USD 449.85
EUR 485.43
RUB 5.71
CNY 70.69

توتەنشە جاعداي: «دامۋ» قورى قانداي كومەك كورسەتەدى

17 一月 2022 15:28

نۇر- سۇلتان. قازاقپارات - «دامۋ» قورى تارتىپسىزدىكتەردەن زارداپ شەككەن شاعىن جانە ورتا بيزنەس نىساندارىنا قانداي كومەك ۇسىنا الاتىنىن ءمالىم ەتتى،

دەپ حابارلايدى قازاقپارات ءتىلشىسى.

پرەزيدەنت قاسىم- جومارت توقايەۆتىڭ 6- قاڭتارداعى تاپسىرماسى بويىنشا، ق ر قارجى نارىعىن رەتتەۋ جانە دامىتۋ اگەنتتىگى مەن ۇلتتىق ەكونوميكا مينيسترلىگى تارتىپسىزدىكتەردەن زارداپ شەككەن شاعىن جانە ورتا بيزنەس سۋبەكتىلەرىنە مەملەكەتتىك قولداۋ كورسەتۋ بويىنشا شارالار ازىرلەدى. سونىڭ اياسىندا توتەنشە جاعداي كەزەڭىندە زارداپ شەككەن جەكە جانە زاڭدى تۇلعالاردىڭ قارىز تولەمدەرىن كەيىنگە قالدىرۋ ءتارتىبى بەكىتىلىپ وتىر.

قۇجات ق ر قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ 2022 -جىلدىڭ 10- قاڭتارىنداعى №8 بۇيرىعىمەن بەكىتىلگەن. وسى قۇجاتقا سايكەس، «دامۋ» كاسىپكەرلىكتى دامىتۋ قورى توتەنشە جاعداي كەزىندە زارداپ شەككەن شاعىن جانە ورتا بيزنەس نىساندارىنىڭ مەملەكەتتىك باعدارلامالار اياسىنداعى جوبالار بويىنشا العان نەسيەلەرىن سۋبسيديالاۋ جانە كەپىلدىك بەرۋ قۇرالدارىن جەڭىلدەتىلگەن تارتىپپەن ءبىر جۇمىس كۇنى ىشىندە قايتا قۇرىلىمداۋدى ماقۇلداۋعا دايىن ەكەنىن حابارلايدى.

«بيزنەستىڭ جول كارتاسى-2025» مەملەكەتتىك باعدارلاماسى اياسىندا سۋبسيديالاۋ جانە كەپىلدىك بەرۋ قۇرالدارى بويىنشا جوبالاردى قايتا قۇرىلىمداۋ كاسىپكەرلەردىڭ قارجى- شارۋاشىلىق قىزمەتىن تالداۋسىز ءبىر جۇمىس كۇنى ىشىندە ماقۇلداۋدان وتەدى. وسى ۋاقىت ىشىندە ءوتىنىم قۇجاتتارى جينالىپ، قايتا قۇرىلىمداۋ شارتتارى ماقۇلدانىپ، بانكتەرگە حات جىبەرىلەدى.

«20 ميلليون تەڭگەگە دەيىنگى شاعىن نەسيەلەردىڭ قۇجاتتارى كرەديتتىڭ مەرزىمىن ۇزارتۋ قاجەت بولسا جانە كەپىلدىك مەرزىمىن ۇزارتۋ كەرەك بولسا عانا قوردىڭ ماقۇلداۋىنا جىبەرىلەدى»، - دەلىنگەن قوردىڭ باسپا ءسوز قىزمەتى ۇسىنعان تۇسىندىرمەدە.

«دامۋ» قورىنىڭ ماماندارى ميكرو، شاعىن جانە ورتا بيزنەسكە ارنالعان 2022 -جىلعى سۋبسيديالاۋ جانە كەپىلدىك بەرۋ قۇرالدارى جۋىق ارادا تولىق كولەمدە جالعاساتىنىن ايتىپ وتىر.

رەسمي دەرەككە سۇيەنسەك، 2021 -جىلى قور 57,7 مىڭ جوباعا 2,175 تريلليون تەڭگە نەسيە بەرگەن. ونىڭ ىشىندە 13,4 مىڭ ميكروكاسىپكەرلىك جوباعا 75,4 ميلليارد تەڭگە نەسيە جۇمسالعان. سۋبسيدياعا كەلسەك، 32,3 مىڭ جوباعا 1 تريلليون 598 ميلليارد تەڭگە سۋبسيديا تولەنگەن. ونىڭ ىشىندە COVID-19 پاندەمياسى كەزىندە نەعۇرلىم زارداپ شەككەن كاسىپكەرلەردى قولداۋ شەڭبەرىندە 11 مىڭ جوبانىڭ 421,7 ميلليارد تەڭگە نەسيەسى سۋبسيديالانعان. 17,3 مىڭ جوبا بويىنشا 366 ميلليارد تەڭگەنىڭ نەسيەسىنە كەپىلدىك بەرىلدى. 8,4 مىڭ جوباعا جەڭىلدەتىلگەن قارجىلاندىرۋ قاراجاتى ەسەبىنەن 211 ميلليارد تەڭگە نەسيە ءبولىندى.

«قوردىڭ وڭىرلىك فيليالدارىنداعى مەنەدجەرلەر ەكىنشى دەڭگەيدەگى بانكتەر مەن قارجى ۇيىمدارىندا نەسيە رامىدەپ جاتقان كاسىپكەرلەرگە online.damu.kz جانە egov.kz. ەلەكتروندىق پورتالدارى ارقىلى كەشەندى قولداۋ كورسەتەدى. كاسىپكەرلەر ءوز وتىنىمدەرىن egov.kz جانە online.damu.kz پورتالدارى ارقىلى ونلاين رەجيمدە جىبەرە الادى.

سونداي- اق www.damu.kz, www.online.damu.kz سايتتارى ارقىلى نەمەسە 1408 ءبىرىڭعاي Call-ورتالىعى ارقىلى اقپارات بەرىلەدى (قوڭىراۋ شالۋ تەگىن)»، - دەپ جازادى قوردىڭ باسپاءسوز قىزمەتى.

اۆتور: ەسىمجان ناقتىباي

回到顶部