今日天气
阿斯塔纳 +7 °С
阿拉木图 +14 °С
今日坚戈汇率
USD 421.58
EUR 496.83
RUB 5.53
CNY 62.20

وق اتىلدى: استانادا كولىك ۇرىسى قالاي ۇستالدى

26 九月 2021 12:50

نۇر-سۇلتان. قازاقپارات - نۇر-سۇلتان قالاسىندا كولىك ۇرىسىن ۇستاۋ بارىسىندا 9 ماشينا زاقىمدالىپ، پوليتسەيلەر كۇدىكتىگە قارسى وق اتۋعا ءماجبۇر بولعان، دەپ حابارلايدى قازاقپارات ءتىلشىسى.

بۇعان دەيىن حابارلاعانىمىزداي، قاراعاندى وبلىسىنىڭ جاڭاارقا اۋدانىندا Mitsubishi ماركالى كولىك ۇرلاندى.

كولىك ەلوردا اۋماعىندا بايقالعان. كولىك ۇرىسى ىزىنەن قۋعان پوليتسيا قىزمەتكەرلەرىنىڭ زاڭدى تالاپتارىنا باعىنباي، جول ءجۇرىسى ەرەجەلەرىن ورەسكەل بۇزدى. سالدارىنان پوليتسيا قىزمەتكەرى زارداپ شەكتى.

نۇر-سۇلتان قالالىق پوليتسيا دەپارتامەنتىنىڭ رەسمي وكىلى دانيار ورال ءمالىم ەتكەندەي، پوليتسەيگە قاجەتتى كومەك كورسەتىلدى. ونىڭ ومىرىنە قاۋىپ جوق.

«جول ءجۇرىسى قاتىسۋشىلارىنا تونگەن قاۋىپكە توسقاۋىل بولۋ ماقساتىندا، جۇرگىزۋشىنىڭ توقتاۋ تۋرالى تالاپتاردى ەلەگىسى كەلمەگەندىگى ەسكەرىلىپ، پوليتسەيلەر بارلىق قاۋىپسىزدىك تالاپتارىن ساقتاي وتىرىپ تابەلدىك قارۋدى پايدالانۋعا ءماجبۇر بولدى. قاشىپ قۇتىلماق بولعان ۇرى بورديۋرالاردان سەكىرىپ، قارسى بەتتەگى جولعا شىعا وتىرىپ، جول بويىندا تۇرعان بىرنەشە كولىكتى زاقىمداعاننان كەيىن ەسكەرتۋ رەتىندە اۋاعا، ودان كەيىن اۆتوكولىك دوڭگەلەگىنە وق اتىلدى. وسىلايشا، كولىك توقتاتىلدى»، - دەدى دانيار ورال.

قۇقىق بۇزۋشىنىڭ ارەكەتى سالدارىنان 9 كولىك زاقىمدالدى. پوليتسيا دەپارتامەنتىندە ناقتىلاعانداي، كولىك يەلەرى مەن كەلتىرىلگەن ماتەريالدىق شىعىن انىقتالۋدا.

22 جاستاعى كۇدىكتى ۇستالىپ، ۋاقىتشا ۇستاۋ اباقتىسىنا جەتكىزىلدى.

关键词: استانا,
回到顶部