Awa rayı
Astana -10 °S
Almatı 0 °S
valyuta bağamı
USD 376.40
EUR 427.36
RUB 5.86
CNY 56.08

Jergіlіktі şenewnіkter swbsïdïyanıñ jartısınan köbіn ustap qaladı - käsіpker

2019 jıldıñ 22 aqpan 2019 18:14 1180

ASTANA. QazAqparat - Jergіlіktі jerde äkіmdіk qızmetkerlerі swbsïdïyanı öz betіnşe taratadı jäne köp jağdayda ol aqşanı käsіpkerlerge azaytıp beredі. Al şarwalar «saw basına saqïna tіlegіsі» kelmey, ünsіz qalğandı jön köredі. Astanada ötken baspasöz mäslïxatında  «Ak-Hilal» JŞS dïrektorı Magomed Ekajev atalğan mäselenі qalay şeşkenіn aytıp berdі,  dep xabarlaydı QazAqparat tіlşіsі.

«Bіz ösіmdіk şarwaşılığımen aynalısamız. Osığan baylanıstı memleket tarapınan qoldaw jasaladı. Mäselen, jaña texnïkanı satıp alwğa swbsïdïya berіledі. Bıltır onıñ kölemі texnïka bağasınıñ 25 procentіn quradı. Mіne, däl osı qarajattı alğanda bіz şenewnіkterdіñ bılığına tap boldıq. Olar 25 procenttі sanağanda esep-qïsaptı öz betіnşe jürgіzdі. Bіzdіñ dälelderіmіzge qulaq asqan da joq. Osılayşa, swbsïdïyanıñ 25 procentіn emes, 9 procentіn ğana berіp turdı. Sonda memleket qırwar qarjını bölіp berdі. Al jergіlіktі şenewnіkter onı ustap qaldı», - deydі M.Ekajev.

Käsіpker bіraz jerge barıp, xat jazdı. QR Awıl şarwaşılığı mïnïstrlіgіne de arızdandı. Ol jaqta käsіpkerdіñ barlıq wäjderіn qoldadı. Alayda jergіlіktі şenewnіkter oğan: «Mïnïstrlіk bіzge buyrıq emes. Bіz äkіmdіkke ğana bağınamız. Esep-qïsabımız durıs», - dep tağı da şığarıp saldı. Sodan Magomed Ekajev QR Memlekettіk qızmet іsterі jäne sıbaylas jemqorlıqqa qarsı іs-qïmıl agenttіgіnіñ kömegіne jügіndі.

«Şınımdı aytsam, bas kezіnde bіzdіñ mäselemіz şeşіledі dep oylağan joqpın. Sebebі buğan deyіn bіraz jerdіñ tabaldırığın tozdırdıq. Bіraq agenttіk mamandarı bіrden älgі şenewnіkterge şığıp, arnayı otırıs ötkіzdі. Söytіp, bіr ayğa tolmay, bіzdіñ mäselemіz şeşіldі, barlıq swbsïdïyamızdı tölep berdі. Buğan deyіn jergіlіktі şenewnіkter 14 mïllïon teñgenіñ 5 mïllïonın ğana bergen edі. Agenttіktіñ arqasında bіz qalğan 9 mïllïonımızdı aldıq. Barlıq memlekettіk organdarda bïzneske degen közqaras osınday bolsa ğoy. Bіr qızığı, jañağı şenewnіkter bіzge «barlıq käsіpkerler bergenіne rïza, al sіzder oğan da razı emessіzder» deydі. Zañ boyınşa berіletіn swbsïdïyamızdıñ bіraz bölіgіn ustap qalsa, oğan bіz qalay razı bolamız? Basqalar amalsız şenewnіkterdіñ aytqanına könіp otır», - dep atap körsettі M.Ekajev. 

Ayta ketken jön, ötken jılı QR Memlekettіk qızmet іsterі jäne sıbaylas jemqorlıqqa qarsı іs-qïmıl agenttіgі, QR Sırtqı іster mïnïstrlіgі, sonday-aq, QR Ïndwstrïya jäne ïnfraqurılımdıq damw mïnïstrlіgі «Protecting business and investments» jobasın qolğa alğan bolatın. Negіzgі maqsat - bïznes pen ïnvestïcïyalardı jemqorlıq äreketterden keşendі türde qorğaw. Osığan oray, arnayı jobalıq keñse qurıldı. Oğan kіretіn mamandar bïznesmender men ïnvestorlardı sanalwan jasandı byurokratïyalıq kedergіlerden qorğaydı. Bügіnde keñse 282 bïznes-jobanı jürgіzіp keledі. Sonıñ іşіnde şeteldіk kapïtal da bar. Osı waqıtqa deyіn käsіpkerlerge qoldan kedergі jasağan bіrneşe şenewnіk jazağa tartıldı.

Ayta keteyіk, QR Memlekettіk qızmet іsterі jäne sıbaylas jemqorlıqqa qarsı іs-qïmıl agenttіgі agroönerkäsіp salasındağı jemqorlıqtı baqılaw jönіndegі arnayı toptı qurğan bolatın. Onıñ quramında burın QR Awıl şarwaşılığı vïce-mïnïstrі qızmetіn atqarğan Tölewtay Raqımbekov bar. Mamannıñ aytwınşa, bügіnde swbsïdïya taratqanda sıbaylas jemqorlıq äreketterі jïі bolıp jatadı.

«Soñğı jıldarı awıl şarwaşılığına qırwar qarjı bölіnіp keledі. Bіr swbsïdïyanıñ özі on bes jılda 100 esege östі. Burın 3,5 mïllïard teñge bolsa, qazіr swbsïdïya kölemі 300 mïllïard teñgeden asadı. Ökіnіşke qaray, jemqorlıq äreketterі de az emes. Mäselen, oblıstıq jäne awdandıq deñgeyde swbsïdïya taratqanda sıbaylas jemqorlıq jïі bolıp jatadı. Onday faktіler barşılıq. Nesïe stavkasın swbsïdïyalawdı alayıqşı, 4 mıñnan astam şarwa qujat jïnap jügіredі. Olardıñ barlığı awdanda, al jergіlіktі jerde byurokratïya wşığıp tur. Odan da awıldıq nesïe berw serіktesterіne bere salğan jeñіl emes pe? 180 serіktestіk qana, olar özderі taratıp bere saladı. Şarwalardı qujat jïnatıp, jügіrtkenşe swbsïdïyanı osında, Astanada bіr ret bere salğan durıs», - deydі T.Raqımbekov.

 

 

 

Joğarı qaray