Aýa raıy
Astana -2 °S
Almaty 17 °S
valıýta baǵamy
USD 389.98
EUR 434.01
RUB 6.10
CNY 55.04

#Jaqsylyq jasa: Almatylyq eriktiler aýtızmge shaldyqqan balalarǵa kómektesti

2019 jyldyń 26 naýryz 2019 10:37

ALMATY. QazAqparat - Almatyda «Ashyq júrek» jobasy aıasynda eriktiler muqtajdyq kórip otyrǵan kópbalaly otbasylarǵa kómek kórsetti, dep habarlaıdy QazAqparat tilshisi.

Gúldana Qaldybaeva - tórt balanyń anasy. Bul otbasy jaqynda Shymkentten Almatyǵa kóship keldi.

«6 jyl buryn otaǵasy qaıtys boldy. Úsh balama da aýtızm degen dıagnoz qoıyldy. Sondyqtan, aýylda tura almadym. Balalarǵa bilim alý qajet, emdeý kerek. Arýjan qyzym - 12 jasta, Erkebulan - 10 jasta, Jasulan - 7 jasta. Úsh balamnyń úsheýi de «Asyl Mıras» ońaltý ortalyǵynda bilim alyp jatyr», - dedi Gúldana Qaldybaeva.

Gúldananyń tuńǵyshy Merýert Qazaq Ulttyq agrarlyq ýnıversıtetiniń 2 kýrs stýdenti. Qazir jalǵyzbasty ana múgedek balalarymen páter jaldap turyp jatyr.

«Áleýmettik baspana máselesimen ákimdikke bardym. Olar turaqty mekenjaıǵa tirkelgen soń 3 jyl ótý kerek degen talap qoıdy. Kelesi jyly kezekke turýǵa tyrysamyn. Qazir balalarym óz betterimen tamaq ishedi. Sóılespeıdi. Bir zattardy ymmen túsindirýge tyrysady. Tús ajyratady. Bul progress «Asyl mırasqa» kelgeli bastaldy. Qazir aqyly túrde ınemen emdeý terapııasyn alyp jatyrmyz», - dedi Gúldana Qaldybaeva.

Naýqas balalarmen áleýmettik pedagogtar jumys jasap jatyr. Balalardy arnaıy kólikpen alyp ketedi.




«Men jumysqa shyǵa almaımyn. Myna balalarǵa kútim kerek. Olar aýyrsa da kezekpen aýyrady. Úlken qyzym únemi oqýda», - dedi anasy.

Eriktiler bul otbasyǵa azdaǵan azyq-túlik ákep berdi. Sondaı-aq, úıdegi jaryq shamdaryn energııa únemdeıtin shamdarǵa aýystyryp berdi.




«Jastar jyly jarııalanǵanda biz «Ashyq júrek» jobasyn tanystyrdyq. 8 baǵyt boıynsha jumys jasaıtyn bolamyz. «Otbasy» baǵyty - kópbalaly muqtaj otbasynyń balalaryn qoldaýǵa baǵyttalǵan. Qazir Almaty boıynsha osyndaı otbasylardyń tizimin jasap jatyrmyz. Bolashaqta olarǵa azyq-túlik kıim keshek jaǵynan kómektesetin bolamyz», - dedi «Eriktiler lıgasy» qoǵamdyq qorynyń úılestirýshisi Álfııa Haıbýlına.







Almatylyq eriktiler lıgasynda 10 myńǵa jýyq adam jumys jasap jatyr.

Joǵary qaraı