Aýa raıy
Astana 10 °S
Almaty 15 °S
valıýta baǵamy
USD 389.98
EUR 434.01
RUB 6.10
CNY 55.04

Volonterlar jyly, Prezıdentke usynys: Qazaqstan men Reseı jastary forýmynda ne aıtyldy

2019 jyldyń 22 mamyr 2019 00:45

QOSTANAI. QazAqparat - Qostanaıda eki kúnge sozylǵan Qazaqstan men Reseı jastarynyń yntymaqtastyq forýmy máresine jetti, dep habarlaıdy QazAqparat tilshisi.

Jańadan ashylǵan Jastar saraıyna Qazaqstan men Reseıden kelgen myńnan astam jas jınaldy. Olar munda kórme stendterin uıymdastyryp, jastar jobalarynyń tusaýkeser alańdaryn qurdy. Forým taqyryby jastardyń volonterlik jobalarǵa qatysýyna arnaldy. Yntymaqtastyqty arttyrýǵa múddeli eki eldiń qoǵamdyq uıymdarynyń ókilderi óz jobalaryn tanystyrsa, keıbiri halyqaralyq dárejedegi bastamalar týraly oı bólisti.

Forým jumysyna Memleket basshysy Qasym-Jomart Toqaev qatysty.





Qazaqstandaǵy «Ulttyq eriktiler jelisi» uıymynyń tóraıymy Vera Kım 2020 jyldy Eriktiler jyly dep jarııalaýdy usyndy. Onyń aıtýynsha, elde 200-den astam volonterlik uıym tirkelgen.

«Qazaqstanda eriktiler qozǵalysy jaqynda ǵana paıda boldy. Biz muny eldegi aýqymdy is-sharalarmen baılanystyramyz. Osy ýaqyt ishinde biz eriktilerdiń ózindik jobalaryn jasadyq. Buǵan memleket jaqsy qoldaý bildirip keledi. Sol sebepti kelesi jyldy Eriktiler jyly dep jarııalaýdy usynamyn», - dedi V. Kım.






Qazaqstan Prezıdenti bul usynysty tolyǵymen qoldaıtynyn atap ótti.

«Jas dostar! Búgin men barlyqtaryńyzdy osy zalda qaýyshtyrǵanyma qýanyshtymyn. Sizder - eldiń bolashaǵysyzdar. Qazaqstan - jastardyń memleketi. Bizdi álemniń ár memleketi tanıdy, bizben sanasady. Bul eldiń tarıhı jetistikteriniń biri emes pe!? QR Prezıdenti retinde volonterlardyń qozǵalysyn árqashan qoldaıtynymdy jetkizemin», - dedi ol.

Memleket basshysy 2016 jyly eriktilerdiń mártebesin, quqyǵy men mindetterin jáne memlekettik qoldaý sharalaryn bekitetin «Volonterlik qyzmet týraly» zań qabyldanǵanyn atap ótti. 2017 jyly «EKSPO» halyqaralyq mamandandyrylǵan kórmesi jastardy jappaı volonterlik qozǵalysqa tartý isin bastap berdi. Al bıyl Qazaqstandaǵy volonterlikti damytýdyń jańa kezeńi bolady.





Qasym-Jomart Toqaev Jastar jyly aıasynda ótkiziletin negizgi is-sharalarǵa toqtaldy. «Jastardyń bıznes-bastamalaryn damytýǵa arnalǵan «Jas kásipker» baǵdarlamasy ekonomıkanyń negizgi sektorlaryndaǵy startaptarǵa qoldaý kórsetýge múmkindik beredi. Qyzmeti men bilimi joq jumysqa ornalaspaǵan jastardyń máselesi sheshilýde. Jumyspen qamtý, eń aldymen, eńbek tájirıbesi joq jastar jóninde arnaıy baǵdarlama qabyldanýda. Bilikti jas mamandardy qoldaý kúsheıe túsedi», - dedi Prezıdent.

Sonymen qatar, ol Qazaqstan men Reseıdegi volonterlar qozǵalysynyń bolashaǵy týraly aıta kelip, erikti jastardy qoldaý sharalaryn kóbeıtýdi usyndy.

«Búgin sizderge, jas urpaqqa birneshe usynys jasamaqpyn. Solardyń biri - volonterlar qozǵalysyn damytý. Birinshiden, erikti jastardy keshendi túrde qoldaý sharalaryn bekitý qajet. «Jyl volonteri» halyqaralyq syılyǵyn taǵaıyndaýdy usynamyn. Bul syıaqy eki eldiń úzdik volonterlik jobalaryna tapsyrylady. Osy arqyly olardyń belsendiligin arttyrýǵa jaǵdaı jasaımyz», - dedi Qasym-Jomart Toqaev.

Forým barysynda RF eriktiler ortalyqtary qaýymdastyǵy keńesiniń tóraǵasy Artem Metelev Memleket basshysyna arnaıy usynys jasady. «Reseıde óziniń irgeli jobalarymen tanylǵan volonterler toptary bar. Biz olardy bir qaýymdastyqqa jınadyq. Olardyń kóbi Qostanaıǵa kelip, tájirıbesimen bólisti. Mysaly, bizdegi «Erikti dárigerler» toby medıtsınalyq personalǵa edáýir kómekterin tıgizip júr. Olar endi Qazaqstannyń medıtsınalyq uıymdarymen memorandýmǵa qol qoıýǵa nıetti. Taǵy sondaı ilkimdi jobalardyń biri - «Menimen birge armanda». Munda jastar qaýipti aýrýǵa shaldyqqan jandarǵa kómek qolyn sozady. Mine, osyndaı bastamalardy Qazaqstanda jasaǵymyz keledi. Eki eldiń eriktileri tájirıbe almasyp, ortaq jobalarǵa jumylsaq, volonterlyq salasyn damytýǵa úles qosamyz. Qazaqstan tarapynan qoldaý bolsa, baǵdarlamalarymyz daıyn», - dedi ol Memleket basshysyna qarata.

Óz kezeginde Q. Toqaev elimizdiń ozyq oıly jastary ǵylymda, ІT-tehnologııada, mádenıet, bıznes jáne sport salalarynda jaqsy nátıjelerge qol jetkizip júrgenin atap ótti. Sonymen qatar, eriktiler tobynyń jobalaryn qoldaıtynyn jetkizdi.





Sondaı-aq shara aıasynda QR Aqparat jáne qoǵamdyq damý mınıstri Dáýren Abaev ta birqatar oı-pikirin, usynysyn bildirdi.

Mınıstr atalǵan forýmnyń tájirıbe almasýǵa jáne eki el arasyndaǵy yntymaqtastyq pen dostyqty nyǵaıtý máselelerin talqylaýǵa qyzmet etetinine senim bildirdi. «2019 jyl elimizde Jastar jyly dep jarııalandy jáne osynyń arqasynda biz jastardyń qatysýymen aýqymdy is-sharalar ótkizip kelemiz. Maǵan ár jerde osy Jastar jylyna qatysty suraqtardy qoıyp jatady. Rasymen de, Jastar jylynyń mindeti qandaı bolmaq? Memleket jastardy qoldaıdy ma, árıne, qoldaıdy. Kerisinshe, táýelsizdik alǵan jyldardan bastap jastar el saıasatynyń bel ortasynda júrdi. Tipti, qıyndyǵy mol toqsanynshy jyldary Elbasy «Bolashaq» baǵdarlamasyn bastap, jastarǵa jol ashty. Qazir osy baǵdarlamamen oqyp kelgen jastar eldiń ár túkpirinde jemisti eńbek etip jatyr. Bul sizderge úlgi bolýy tıis», - dedi vedomstvo basshysy.

Ol volonterlik jobalardy barynsha qoldaıtynyn jetkizdi. Sebebi, búginde qoǵamnyń júıeli túrde damýy úshin eriktiler qajet.

«Olar óz oılaryn ashyq aıta alady. Máselen, ultymyzda «Asar» degen ádemi dástúr bar. Munyń maǵynasy tereńde jatyr. Kez kelgen adamǵa kóp bolyp, jumyla kómektesý qaı zamanda da bolǵan. Osy úrdisti toqtatyp almaýymyz kerek», - dep túıdi Dáýren Abaev.





Keıin mınıstr forým aıasynda ótkizilgen senbilikke qatysty. Sharaǵa atsalysqan top Tobyl ózeniniń jaǵalaýyn tazartty.

«Qazaqstanda 48 ózen bolsa, olardyń tek ekeýi sanıtarlyq normalarǵa saı keledi. Mine, búgingi aktsııa aıasynda olardyń sany úshke kóbeıdi. Tobyl ózeni Reseı men Qazaqstandy baılanystyryp tur. Taza sý - taza ómirdiń kepili ispetti. Sol sebepti barlyǵyńyzdy osy senbilikke qatysýǵa shaqyramyn», - degen bolatyn mınıstr.

Qostanaı oblysynyń ákimi Arhımed Muhambetov forýmǵa kelgen qonaqtarǵa alǵys aıtyp, sharanyń mańyzdylyǵyna toqtaldy.

«Eki eldiń kóp jyldyq yntymaqtastyǵy men áriptestiginiń arqasynda búgin biz mańyzdy is-sharany uıymdastyryp otyrmyz. Bizdiń jastarymyz dástúr men ult sabaqtastyǵyn saqtaýda aıryqsha jumys atqaryp keledi. Búginde Qostanaı oblysynda 170 myńnan astam jas ómir súredi. Óz kezeginde oblysta olardyń jan-jaqty damýy úshin barlyq jaǵdaı jasalýda. Osy forýmda óńirdegi tyń jobalarmen tanys bolasyzdar», - dedi aımaq basshysy.

Joǵary qaraı