Aýa raıy
Astana 4 °S
Almaty 18 °S
valıýta baǵamy
USD 389.81
EUR 430.27
RUB 6.06
CNY 54.91

Ulttar lıgasy: Qazaqstan Grýzııadan qarymta qaıtara ala ma

2018 jyldyń 19 qarasha 2018 18:42

ASTANA. QazAqparat - Búgin fýtboldan Qazaqstan quramasy Ulttar lıgasy toptyq kezeńindegi sońǵy oıynyn Grýzııaǵa qarsy ótkizedi, dep habarlaıdy QazAqparat tilshisi.

Eske salaıyq, bizdiń qurama D lıgasynyń birinshi tobynda Grýzııa, Latvııa jáne Andorra quramalarymen básekege tústi. Degenmen, keler jyly S lıgasyna bul toptan beriletin jalǵyz joldama taǵdyry eki týr buryn sheshilip qoıdy. Tórt oıyn boıy birde-bir upaıdy shashaý shyǵarmaǵan Grýzııa keler jyly S lıgasynda báseke kórigin qyzdyrady. Qazirgi tańda ekinshi oryn úshin qalǵan úsh qurama da úmitker bolyp otyr. Árıne, Latvııa men Andorradan bizdiń quramanyń múmkindigi kóp. Qazaqstandyqtar qorjynynda 6 upaı bar. Al Latvııa men Andorra ázirge úsh-úsh upaıdan ıelengen.

QR ulttyq quramasy búgingi kúnge deıin 5 oıyn ótkizdi. Onyń biri jeńispen aıaqtaldy, úsheýinde teń nátıje tirkelse, bir oıynda qarsylasyna ese jiberdi. Alǵashqy týrda óz alańynda Grýzııadan 0:2 esebimen jeńilse, odan keıin aldymen Andorra, sosyn Latvııamen 1:1 esebimen teń nátıje tirkeldi. Al tórtinshi týrda elordada Andorrany 4:0 esebimen jeńgenimen, besinshi týrda óz alańynda Latvııamen taǵy da 1:1 esebimen teń tústi.

Negizinde dop dodasy bastalmas buryn bizdiń qurama aldyna óz tobynda birinshi oryn alý mindeti qoıyldy. Degenmen, oǵan qol jetkizý týrnır barysynda qıyndaı tústi. Endi ekinshi oryn alýdyń ózi ońaıǵa soqpaı otyr. Dese de, búgin qurama syrt alańda teń túsip nemese jeńiske jetken jaǵdaıda ol oryndy saqtap qalady. Qazaqstan Grýzııadan qarymta qaıtara ala ma? Eger Andorra men Latvııa kezdesýinde teń nátıje tirkelgen jaǵdaıda da bizdiń qurama ekinshi orynǵa qol jetkizedi. Onyń jaýabyn búgingi oıyndarda anyqtaıtyn bolamyz.

Aıta ketelik, ulttyq qurama sapynda birqatar ózgerister boldy. Negizgi quramadaǵy birneshe fýtbolshyǵa bapkerler sheshimimen demalys berildi.

Buǵan deıin Qazaqstan quramasynyń alǵashqy mınýttarda Grýzııaǵa qarsy shyǵatyn quramy jarııalanǵan bolatyn.

Grýzııa men Qazaqstannyń kezdesýi Astana ýaqytymen 23.00-de bastalady. Ol Qazsport telearnasynan tikeleı efırde kórsetiledi. Sondaı-aq, búgin dál sol ýaqytta Andorra men Latvııa quramalarynyń kezdesýi bastalady.

Avtor Ádiljan Úmbet
Basty sózder: Sport,
Joǵary qaraı