Aýa raıy
Astana 29 °S
Almaty 36 °S
valıýta baǵamy
USD 383.98
EUR 430.63
RUB 6.11
CNY 55.83

Úkimet kepildendirilgen tegin kómek pen medıtsınalyq saqtandyrý qyzmetteriniń tizimin bekitti

2019 jyldyń 18 maýsym 2019 12:08 594

NUR-SULTAN. QazAqparat - Qazaqstan Úkimeti keler jyldan bastap mindetti áleýmettik medıtsınalyq saqtandyrý júıesi men kepildendirilgen tegin medıtsınalyq kómek sheńberinde kórsetiletin qyzmetter tizimin bekitti.

«Atalǵan eki pakettiń aıyrmashylyǵy qandaı? Kepildendirilgen tegin medıtsınalyq kómek paketi mınımaldy standarttardan turady. Mysaly: shuǵyl kómekke zárý azamattarǵa medıtsınalyq kómek kórsetý, epıdemııanyń jappaı taralýyna jol bermeý, memlekettiń aralasýyn qajet etetin qıyn jaǵdaılarǵa dýshar bolǵan naýqastarǵa kómek kórsetý t.b. Saqtandyrý paketi patsıentterdiń ómir sapasyn jaqsartyp, ult bolashaǵynyń negizin qalaýǵa baǵyttalatyn ózge de kómek túrlerin qamtıdy», - delingen «Áleýmettik medıtsınalyq saqtandyrý qory» KEAQ baspasóz qyzmeti taratqan málimette.

Habarlamaǵa súıensek, kepildendirilgen tegin medıtsınalyq kómek paketiniń jańa nusqasyn ázirlegen kezde tizimge engen barlyq qyzmet túrleri jan-jaqty saraptalyp, ekshelgen. Paketterdiń jańa úlgisin daıyndaý barysynda mınıstrlik bir jarym jyl boıy medıtsına salasy ókilderimen birlesip jumys istedi. Atap aıtqanda, qyzmetterdi satyp alý, aqy tóleý, monıtorıng protsesin júzege asyrý tetikteri keńinen talqylandy.

«Bul baǵyttaǵy jumystar aldaǵy ýaqytta da jalǵasyn tabady. Degenmen MÁMS júıesin engizýge daıyndyǵymyz joǵary deýge bolady. Jańa paketter bıyl kúzde elimizdegi aımaqtardyń birinde nobaıly rejımde iske qosylmaq. Jańa júıe 2020 jyldan bastap Qazaqstannyń barlyq aımaqtarynda iske qosylady», dep atap ótedi baspasóz qyzmeti. 

«Jalpy alǵanda, keler jylǵa arnalǵan bıýdjet jobasynda kepildendirilgen tegin medıtsınalyq kómek pen saqtandyrý paketteri negizinde kórsetiletin kómekke 1 620 mlrd teńgeden astam qarjy qarastyrylǵan», - dedi «Áleýmettik medıtsınalyq saqtandyrý qory» KEAQ basqarma tóraǵasy Aıbatyr Jumaǵulov.

Elimizdiń barlyq azamattary paıdalana alatyn kepildendirilgen tegin medıtsınalyq kómek paketine jedel járdem men sanıtarlyq avıatsııa, shuǵyl statsıonarlyq kómek, pallıatıvtik kómek engen. Sonymen qatar, áleýmettik mańyzy bar syrqattar men sozylmaly aýrýlardyń negizgi túrlerimen aýyratyn turǵyndar osy paket sheńberinde konsýltatıvtik-dıagnostıkalyq kómekpen, josparly statsıonarlyq jáne statsıonardy almastyratyn kómekpen qamtamasyz etiledi. Ambýlatorııa deńgeıinde dári-dármekpen qamtý, týberkýlezge shaldyqqandardy ońaltý qyzmeti de osy paketke kiredi.

Mindetti áleýmettik medıtsınalyq saqtandyrý paketi: konsýltatıvtik-dıagnostıkalyq kómek, sonyń ishinde baǵasy qymbat bolyp keletin zerthanalyq qyzmet túrlerin, tegin kepildendirilgen medıtsınalyq kómekke enbegen syrqattardy dári-dármekpen qamtamasyz etý, tegin kepildendirilgen medıtsınalyq kómek paketine jatpaıtyn jaǵdaılarda josparly statsıonarlyq jáne statsınardy almastyratyn kómekpen qamtý, medıtsınalyq ońaltý jáne patsıent densaýlyǵyn qalpyna keltirýge baǵyttalǵan em-dom túrlerin qamtymaq.

Esterińizge sala ketsek, TMKKK sheńberinde halyqqa kórsetiletin medıtsınalyq qyzmetterdi bıýdjet qarjysy esebinen, MÁMS paketine enetin qyzmetter - Qordyń aktıvteri esebinen satyp alynady. Qazirgi tańda Medıtsınalyq saqtandyrý qoryna Qazaqstan boıynsha 176,7 mlrd teńge kóleminde jarna aýdaryldy. Jınaqtalǵan qarjy Ulttyq bankte saqtalady jáne 2020 jyldan bastap MÁMS sheńberinde kórsetilgen qyzmetter aqysyn tóleýge jumsalady.

 

 

 

Basty sózder: Qarjy, Medıtsına,
Joǵary qaraı