Aýa raıy
Astana -5 °S
Almaty 0 °S
valıýta baǵamy
USD 389.86
EUR 435.32
RUB 6.12
CNY 55.12

Úkimet basshysy «Kókshetaý» forým-ortalyǵynyń qurylys jobasymen tanysty

2019 jyldyń 15 maýsym 2019 15:02

KÓKShETAÝ. QazAqparat - Úkimet basshysy Asqar Mamınge keler jyly Kókshetaýda óńiraralyq yntymaqtastyq forýmy ótetin «Kókshetaý» forým-ortalyǵynyń qurylys jobasy tanystyryldy, dep habarlaıdy QazAqparat tilshisi.

Kóktem shaǵyn aýdanynda salynady dep josparlanyp otyrǵan nysannyń jalpy aýmaǵy joba boıynsha 9 gektardy quraıdy. Nysanda 1000 adamǵa arnalǵan kórermender zaly, orkestr zaly, horegrafııa, balet zaly, 304 oryndyq banket zaly, 200 oryndyq konferents zaly, plenarlyq májilis zaly jáne VIP bólmeler qarastyrylǵan. Keler jyldyń kúzinde munda Qazaqstan men Reseıdiń óńiraralyq yntymaqtastyq forýmyn ótkizý josparlanyp otyr.

Aımaq basshysy Ermek Marjyqpaevtyń aıtýynsha, mádenı-kópshilik nysannyń qurylysyn memlekettik-jekeshelik áriptestik sheńberinde júrgizý kózdelgen.

«Nysandy memlekettik-jekeshelik áriptestik sheńberinde salýdy josparlap otyrmyz. Qazir qalada aýqymdy is-sharalar ótkizetin mádenı oshaqtar joq. Sonyń saldarynan biraz qıyndyqtar týyndaýda. Al, «Kókshetaý» forým-ortalyǵy bizderge osy máseleni sheshýge kómektesedi. Keleshekte bul nysandy túrli úıirmeler men mádenı-kópshilik sharalardy ótkizý úshin paıdalanar edik», - dedi aımaq basshysy.

Osy rette, Úkimet basshysy atalmysh jobamen tanysa kele, forým ótkizilgennen keıin nysannyń qańyrap, bos turmaı, qala turǵyndarynyń ıgiligine jumys isteýin, sondaı-aq, ony ustap otyrý máselesin de osy bastan sheship alý qajettigin eskertti.

Aıta keteıik, búgin QR Premer-Mınıstri Asqar Mamın jumys saparymen Aqmola oblysynda boldy. Sapary aıasynda Úkimet basshysy Kókshetaý qalasyndaǵy «Kókshetaý» forým-ortalyǵynyń qurylysynan bólek, Qopa kóli jaǵasyndaǵy aýmaqtardy abattandyrý jumystaryna nazar aýdardy. Sonymen qatar, «Tynys» AQ men «Qazaqstandyq Agro Innovatsııalyq Korporatsııasy» jáne «Dva Kıta» seriktestikteriniń óndiris tsehtaryn aralap kórdi.

Joǵary qaraı