Aýa raıy
Astana 25 °S
Almaty 17 °S
valıýta baǵamy
USD 386.82
EUR 428.67
RUB 5.86
CNY 54.95

Túrkistan oblysynyń óz fýtbol komandasy qurylady

2019 jyldyń 21 aqpan 2019 17:51 1464

TÚRKІSTAN. QazAqparat - Túrkistan oblysynyń óz fýtbol komandasy qurylady, dep habarlaıdy QazAqparat oblys ákiminiń baspasóz qyzmetine silteme jasap. 

2018 jyl Túrkistan oblysynyń sportshylary úshin tabysty boldy. Bul týraly Óńirlik kommýnıkatsııalar qyzmetinde ótken baspasóz máslıhatynda Túrkistan oblystyq deneshynyqtyrý jáne sport basqarmasynyń basshysy Polat Qyryqbaev málimdedi. Onyń aıtýynsha, ótken jyly oblys sportshylary Qazaqstan Respýblıkasynyń chempıonattary men birinshilikterine qatysyp, 387 altyn, 382 kúmis, 365 qola medalǵa qol jetkizse, Azııa chempıonattarynda  73 altyn, 58 kúmis jáne 38 qola medalǵa jeńip alǵan.  Al Álem chempıonattary men Kýboktarynda túrkistandyq saıypqyrandar 32 altyn, 15 kúmis jáne 16 qola medal jeńip aldy. Al Indonezııada ótken jazǵy Azııa oıyndarynan túrkistandyqtar 2 altyn, 2 kúmis jáne 5 qola medal enshilegen.

«Búgingi tańda Túrkistan oblysynda sportty damytý baǵytyndaǵy josparlar men bastamalarǵa oblys ákimi Janseıit Qanseıituly qoldaý bildirip otyr. Óńirge myqty sportshylar men bapkerlerdi tartýdy kózdep otyrmyz. Tek óz elimizdiń azamattaryn ǵana shaqyramyz. Men shetelden legıoner shaqyrýǵa túbegeıli qarsymyn. Olar aqshasyn alady da, elderine ketedi. Bekzat, Muhtarhan, Ermahan sııaqty jigitter aýyl-aımaqtarda barshylyq. Solardy sportqa baýlyp, chempıondar daıarlaýymyz qajet. Aldaǵy ýaqytta Túrkistan qalasynda zamanaýı jabyq stadıon jáne ózge de sport keshenderi salynady.  Múmkindigi shekteýli azamattarǵa arnalǵan «Turan» sport klýbyn, «Túrkistan» kásipqoı boks klýbyn, «Atý jáne sporttyń uqsas túrleri mektebin», «Balalar men jasóspirimderdiń mamandandyrylǵan fýtbol mektebin» jáne «Keshendi joǵary sport sheberligi mektebin» ashsaq degen josparymyz bar. Basty maqsat - Tokıo Olımpıadasyna joldamany kóbeıtip, júldegerler daıarlaý. Bul rette dzıýdodan Dıdar Hamza, bokstan Qaırat Eralıev, Bek Nurmaǵambet jáne eskek esý sportyndaǵy órenderimizge úmit artamyz», - dedi Polat Naýryzbaıuly.

Buqaralyq sportty damytý maqsatynda 2018 jyly oblys aýmaǵynda 4026  sporttyq is-shara ótkizilip, oǵan 571,2 myń adam qatysqan. Oblys turǵyndarynyń sportpen shuǵyldaný kórsetkishi 28,9 paıyzdy qurap otyr.

Sonymen birge, Túrkistan oblysynyń sportshylary QR Aýyl jasóspirimderiniń 2-shi jazǵy oıyndarynda jalpykomandalyq 2-oryndy ıelense, mektep jáne kolledj oqýshylary arasyndaǵy jazǵy spartakıadada 1-oryndy jeńip aldy.

Basqarma basshysy oblysta basketbol, voleıbol jáne fýtbol syndy komandalyq sport túrlerine de qoldaý kúsheıetinin aıtty.

«Taıaý ýaqytta «Turan» atty fýtbol klýbyn qurýdy josparlap otyrmyz. Ol premer-lıgada oınaıtyn myqty komanda bolady. Sondaı-aq balalar men jasóspirimderdiń oblystyq fýtbol mektebi ashylady», - dedi basqarma basshysy.

 

 

Basty sózder: Túrkistan oblysy, Sport,
Joǵary qaraı