Aýa raıy
Astana -9 °S
Almaty -3 °S
valıýta baǵamy
USD 389.34
EUR 428.78
RUB 6.05
CNY 55.45

Tımýr Kozyrev: Qazaqstan – Altyn ordanyń tikeleı murageri degen tarıhı shyndyqty qaıtarý kerek

2019 jyldyń 17 qazan 2019 11:42

NUR-SULTAN. QazAqparat – Altyn ordada damyǵan memlekettik apparat jumys istep turdy. Túrki akademııasynyń sarapshysy, fılologııa ǵylymdarynyń kandıdaty Tımýr Kozyrev elordada Álemdik ekonomıka jáne saıasat ınstıtýtynyń uıymdastyrýymen ótip jatqan «Altyn orda. Tarıh pen taǵylym» atty dóńgelek ústelde osylaı dedi, dep habarlaıdy QazAqparat tilshisi.

«Altyn orda – zańnama, kommýnıkatsııa men logıstıkasy jolǵa qoıylǵan biregeı memleket edi. ıAǵnı, sol tustaǵy myqty memlekettiliktiń tolyqqandy atrıbýttary boldy! Altyn orda – ımperııalyq memleket edi. Onyń qurylym úlgisinen Reseı de kóp úlgi aldy», - dedi Túrki akademııasynyń sarapshysy.

Tımýr Kozyrevtyń aıtýynsha, Altyn ordada qalanyń damyǵan órkenıetti úlgisi bolǵan. Alyp memlekettiń qalalaryn Altyn ordanyń óz handary salǵyzǵan.

«Astana salynǵanda da alyp shahar ıen dalada boı kótere salǵan joq. Elorda boı kótere bastaǵanda bilikti tarıhshylar Uly daladaǵy qala qurylysynyń uly balamasyn kóre bildi. Bul – bizdiń qalalyq órkenıet. Uly dalada qalalyq órkenıet boldy – bola bermek. Osymen-aq bul áńgimege núkte qoıýǵa bolady. Sonymen birge, Altyn orda tusynda jazba ádebıet te bar edi. Damyǵan memlekettik apparat ta jumys istep turdy. Keıingi kezde Qazaqstan tarıhqa kóbirek bet buryp ketken joq pa degen pikirler de aıtylyp jatyr eken. Alaıda aınalyp kelgende ótkensiz bolashaqtyń bolmaıtynyn da eskerý kerek. HH ǵasyrdyń ózinde álem elderiniń ekonomıkalyq órleýiniń ózi de qýatty sımvolıkalyq kapıtaldyń arqasynda paıda bolǵanyn eskergen abzal. Japonııadan bastap birqatar eldiń tarıhyn kóz júgirtseńiz boldy. Tipti álem eldirindegi mıllıarderlerdiń 90 paıyzy – dınastııanyń muragerleri. Muragerler ata-babasynyń da myqty bolǵanyn biledi», - dedi ol.

Tımýr Kozyrevtyń aıtýynsha, Qazaqstan shynynda da - Altyn ordanyń zańdy da tikeleı murageri.

«Georafııany, etnografııany, memleketterdiń tarıhyn bárin qarasańyz, osyǵan kózińiz jetedi. Bul jerde tarıhı shyndyqty qaıtarý kerek. Eshteńeni sozbalaýdyń da, konstrýktsııalaýdyń da qajeti joq», - dedi ol.

Eske sala ketsek, 2019 jyldyń 24 tamyzynda ótken «Ulytaý – 2019» halyqaralyq týrıstik forýmyna qatysqan Memleket basshysy Qasym-Jomart Toqaev Altyn ordanyń 750 jyldyǵyn merekeleý aıasynda birqatar jumys jasalý kerektigin atap ótken edi. Prezıdent Altyn ordanyń negizin qalaǵan Joshy hannyń esimin ulyqtaýdy mindetti túrde qolǵa alýdy usyndy. Onyń aıtýynsha, Joshynyń mazary qazaq jerinde turǵanyn búginde elimizdegi jáne sheteldegi jurtshylyqtyń kóbi bile bermeıdi.

Joǵary qaraı