Aýa raıy
Astana -2 °S
Almaty 6 °S
valıýta baǵamy
USD 389.98
EUR 434.01
RUB 6.10
CNY 55.04

SQO-da sý tasqynyna ázirlik taǵy pysyqtaldy

2019 jyldyń 26 naýryz 2019 16:27

PETROPAVL. QazAqparat - SQO ákimdiginde kóktemgi tasqynǵa daıyndyq barysy pysyqtaldy, dep habarlaıdy QazAqparat tilshisi.

SQO ákimdiginiń baspasóz qyzmetiniń málimetinshe, oblysta bul baǵytta jumys júıeli júrgizilýde. Barlyq qyzmetter joǵary daıyndyq rejımine kóshti. Jyldam jumys isteý úshin 1,4 myń adam, 730 tehnıka men 353 motopompa ázirlendi. Oblysta byltyr sý ótkizgish 20 qubyr salyndy, bıyl taǵy 27-si iske qosylady.

Eldimekenderden 800 myń tonnaǵa jýyq qar shyǵaryldy, avtojoldarda 2 myń qubyr, sondaı-aq aýyldardyń janyndaǵy sý ótkizgish 2,3 myń qubyr tazartyldy. Toqsanǵa jaqyn eldimekenniń 400 shaqyrymdaı aýmaǵy qardan arshyldy. Degenmen, jumys áli kóp. Óńir basshysy aýyldardaǵy barlyq úılerdi tekserýge tapsyrma berdi.

«Ákimder jaıaý júrip ótsin. Ár úıdi tekserý kerek. Mereke kúnderi aýdandardy araladym. Aýyldardaǵy kósheler boıynda qar kóp. Ony tazalap, sýǵa jol berý kerek. Barlyq deńgeıdegi ákimderdiń jeke jaýap beretinin eskertemin. Ár oqıǵa jeke qarastyrylady. Barlyq is-sharalardy aldyn-ala jasap, sý basý qaýpin seıiltýge bolady», - dedi Qumar Aqsaqalov.

SQO ákiminiń aıtýynsha, Petropavldyń shetkeri aýdandarynda sýdy sorý jumystaryna qarqyn qosý qajet.

«Jumysshy kentinde kárizdik júıe tek ortalyq kóshelerde tazartylǵan. Turǵyndardan shaǵyn aýdandarda sýdy sorý jumystary tıisti deńgeıde júrgizilmeıtini týraly shaǵymdar túsýde. Osyǵan oraı, jeke kásiporyndarmen kelisim-shartqa otyrýǵa tapsyrma beremin», -dedi oblys ákimi.

Memlekettik jáne bıýdjettik uıymdardyń aýmaqtarynda da qar barshylyq. Qumar Aqsaqalov qar shyǵarý jumystaryna qosymsha kúshterdi tartýdy tapsyrdy.

Joǵary qaraı