Aýa raıy
Astana 17 °S
Almaty 12 °S
valıýta baǵamy
USD 386.70
EUR 427.15
RUB 6.06
CNY 54.57

SQO-da aýylǵa baratyn dárigerlerge 1,5 mln teńge kótermeaqy beriledi

2019 jyldyń 22 tamyz 2019 19:31

PETROPAVL. QazAqparat – Soltústik Qazaqstan oblysynda medıtsınalyq mamandar jetispeýshiligi máselesin sheshý maqsatynda aýylǵa baratyn dárigerge – 1,5 mln teńge, Petropavlda qalatyndarǵa 500 myń teńge kótermeaqy beriledi, dep habarlaıdy QazAqparat tilshisi.

SQO ákimi Qumar Aqsaqalov oblys ortalyǵyndaǵy aýrýhanalarda bolyp, qondyrǵylardy jańartý jumysymen tanysty. Bıyl zamanaýı jáne joǵary tehnologııaly medıtsınalyq qondyrǵylardy alýǵa 4 mlrd teńge bólindi. Bul ótken jyldarmen salystyrǵanda 3 ese kóp.

Búginge deıin kompıýterli tomograf alyndy. Oblystyq aýrýhanada ornalasqan apparat arqyly adamnyń basyndaǵy, ish qurylysyndaǵy dertti anyqtaýǵa bolady. Dárigerlerdiń aıtýynsha, onyń dáldigi joǵary, nátıjeni az ýaqytta kórsetedi. Buǵan deıingi kompıýterli tomograf Taıynsha aýdanaralyq aýrýhanasyna jetkizildi. Oblysqa alynǵan taǵy bir qymbat apparat – buryn-sońdy bolmaǵan tsıfrlyq mammograf. Onyń kómegimen qazirdiń ózinde myńǵa jýyq qyz-kelinshekten qaterli isiktiń belgileri tabyldy. Bul apparat joǵary dáldikpen derttiń ornyn kórsetip beredi. Tsıfrlyq mammograftyń quny - 140 mln teńge.

Emhanalarǵa sońǵy úlgidegi rentgen jáne ýltradybystyq zertteý apparattary ornatyldy. Jyl sońyna deıin angıograf pen MRT alynady. Munyń bári dertti erte satysynda anyqtaýǵa múmkindik beredi. Sondaı-aq bıyl 66 jedel járdem mashınasy satyp alynady. Onyń 20-sy aýrýhanalarǵa jetkizildi.

«Oblysqa bıyl 170 jas maman keledi. Osy kúnge deıin 50-den asa dáriger keldi. Aýyldarǵa baratyn dárigerlerge - 1,5 mln teńge, qalada qalatyndarǵa 500 myń teńge kótermeaqy beriledi. Sondaı-aq «Turǵyn úı qurylys jınaq banki» arqyly úı alýǵa jas dárigerlerge 1 mln teńgeniń sertıfıkatyn beremiz», - dedi Qumar Aqsaqalov.

Búginde Petropavlda jańa turǵyn úılerden 47 páter dárigerlerge daıyn tur.

Joǵary qaraı