Aýa raıy
Astana 18 °S
Almaty 34 °S
valıýta baǵamy
USD 384.52
EUR 431.32
RUB 6.10
CNY 55.89

Shpekbaev memqyzmetshilerdiń is-saparlary jaıynda: Eń jaqsy meıramhana, qymbat syılyqtar, monsha jáne ańǵa shyǵý

2019 jyldyń 17 maýsym 2019 16:21 3787

NUR-SULTAN. QazAqparat - QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev sheneýnikterdiń kóshpeli tekserýler men issapar barysynda óreskel zańbuzýshylyqtarǵa jol beretinin atady, dep habarlaıdy QazAqparat.

Qymbat qonaq úı, astatók dastarhan, ysyrapqa toly ańǵa shyǵý. Agenttik tóraǵasy óziniń facebook -tegi paraqshasynda elimizdiń barlyq óńirinde joǵarydan kelgen basshyny osylaı kútip alý ádetke aınalyp bara jatqanyn synǵa aldy.

«Ózimniń jańa saladaǵy alǵashqy postymda memlekettik apparattaǵy keleńsiz qubylystardyń biri - el ishindegi issaparlar barysyndaǵy qyzmetshilerdiń teris qylyqtary jáne otyrys, alym-salyq, dastarhan jaıý jáne tartý jasaý qosa júretin tamyr jaıǵan, tómen qurylymdardy jappaı tekserýlerge nazar aýdartqym keledi. Bul problemanyń ótkirligi, ásirese oblystyq, aýdandyq jáne aýyldyq deńgeıdegi memlekettik qyzmetshilerdiń kóptegen shaǵymdarymen rastalady», - dep jazdy Alıek Shpekbaev.

Agenttik basshysy mundaı bassyzdyqtardy azaıtý úshin tekserýlerdi qashyqtyqtan baqylaýmen aýystyrýǵa bolatynyn aıtady.

«Biz standarttaryna boı túzeıtin EYDU elderinde mundaı másele joq, eshkim eshkimdi qabyldamaıdy, al tekserýler qashyqtyqtan baqylaý esebinen júzege asyrylady. Árbir issapar úshin tekserýshilerge logıstıka, turý jáne tamaqtaný shyǵyndaryn jabatyn jetkilikti qarajat bólinedi. Alaıda, tekserýshiler óńirlerge jol júrgende, bólingen qarajattyń tıynyn da jumsamaýǵa aıla tabady. Baqylaýshylardyń tábetin bile tura, jergilikti basshylar basshylyqty «tıisti deńgeıde» qarsy alý úshin bıznesmenderge kómek surap júginedi. Mundaı kómek eshqashan tegin bolmaıdy jáne ári qaraı sheneýnik tarapynan erekshe qamqorlyqqa aınalady. Munyń bári qalaı aıaqtalatynyn eske salýdyń qajeti joq dep oılaımyn», - deıdi Alık Shpekbaev.

Jemqorlyqq bastaıtyn mundaı áreketterdi adamdardyń ulttyq dástúrge telýi ádiletsiz ekenin aıtady agenttik tóraǵasy.

«Bul rette osyndaı minez-qulyqty ulttyq dástúr men shenge bas urýshylyq, basshylyqqa kórsetilgen qurmet tanytý arqyly aqtaýǵa tyrysatyn adamdar bar ekeni tańǵaldyrady. Meniń ustanymym, biregeı-kásibı jáne ınnovatsııalyq memlekettik apparat úshin bul múldem qolaısyz. Bul tájirıbe memlekettik qyzmettiń negiz qalaýshy qaǵıdalarynyń bedelin túsiredi jáne qunsyzdandyrady, sondaı-aq sybaılas jemqorlyq qarqynyn jyldamdatady. Osyǵan baılanysty óńirlik issaparlarǵa, túrli konferentsııalar men semınarlarǵa shyǵatyn barlyq memlekettik qyzmetshilerge, quqyq qorǵaý jáne sot organdarynyń qyzmetkerlerine, memlekettik kásiporyndar men ulttyq kompanııalardyń basshylaryna aıtarym: joǵaryda aıtylǵan barlyq tájirıbe jumystan bosatýdan bas bostandyǵynan aıyrýdyń naqty merzimine deıin qatań sanktsııalar kózdelgen óreskel buzýshylyq bolyp tabylady. Sol sııaqty qabyldaýshy tarapqa da qatysty», - dep jazdy ol.

Bul máseleni júıeli baqylaýǵa alǵanyn eskertken Alık Shpekbaev Úkimetke kóshpeli tekserýlerdi qashyqtyqtan monıtorıngteý arqyly ońtaılandyrý usynynlǵanyn aıtady.

«Bul jumysty sapaly júzege asyrýda azamattyq qoǵam ınstıtýttary mańyzdy ról atqarady. Barlyq qoǵam belsendileri men nemquraıly qaramaıtyn azamattardy osyndaı faktilerge muqııat nazar aýdara otyryp, bizdi kez-kelgen yńǵaıly tásilmen: meniń poshtama jazbasha túrde júginý alik.shpekbaev@gmail.com, áleýmettik jelilerde habarlaýmen nemese Agenttiktiń 1424 koll-ortalyǵyna qońyraý shalyp, habardar etýge shaqyramyn», - dedi agenttik basshysy.

Eske salsaq, jaqynda ǵana Alık Shpekbaev Sybaılas jemqorlyqqa qarsy is-qımyl agenttiginiń tóraǵasy bolyp taǵaıyndaldy.

 

 

 

Joǵary qaraı