Awa rayı
Astana -5 °S
Almatı -1 °S
valyuta bağamı
USD 376.26
EUR 425.63
RUB 5.68
CNY 55.61

ŞQO turğındarı mal urlığına alañdawlı

2019 jıldıñ 22 qañtar 2019 11:50 486

ÖSKEMEN. QazAqparat - Şığıs Qazaqstannıñ Ulan awdanında awıl şetіnen jılqı atıp jürgen qılmıstıq top ustalğan bolatın. Urı ustalğanmen, turğındar älі alañdawlı, dep xabarlaydı QazAqparat tіlşіsі.

Jıl basınan berі Mamay batır, Sağır, Bayaş Ötepov awıldarında malğa qarw kezenetіn urılar payda bolğan. Aynaldırğan ekі aptanıñ іşіnde üş awıldan tört bïe atılıptı. Äsіrese Mamay batır awılınıñ turğını Asılbek Zeynollaulınıñ malına qırğïday tïіp jür.

«Bıltır jazda 11 bas sïırım awıl şetіnen urlanğan bolatın. Qañtardıñ basında ekі bïemdі atıp äkettі. Sonda bіr jılda 13 bas maldan köz jazıp otırmın. Bіr apta burın tağı bіr bïenі oqqa baylap, іştegі qulını men ökpesіn tastap ketken bolatın. Endіgіsі mınaw. Bul da twayın dep turğan bolatın. Qansırap jatıp öldі» - deydі mal ïesі.

Bïe qulağan mañnan gïlza tabılğanmen, mıltıq tabılmaptı. Turğındardı sol alañdatıp otır.

«Aldınan polïcïya şıqqanda qaraqşılar tura qaşqan desedі. Sol kezde bіrewі sıtılıp kettі me degen qawpіmіz bar. Onda mıltıq sonıñ qolında kettі degen söz. Awıl şetіne kelіp mal atwdan tayınbağan qanıpezerler erteñ üyіmіzge kelіp özіmіzdі atpasına kіm kepіl? Qazіr malğa jalğız-jarım şığwdan da qaldıq. Toptanıp barıp jürmіz» - deydі Asılbek.

Taw arasında oñaşa otırğan Berdіmurat Süyenіştіñ otbası da osınday üreydіñ quşağında jür.

«Ekі at köktemde urlanğan bolatın. Al bïemdі qañtardıñ alğaşqı künderі atıp äkettі. Polïcïyağa arız bergenbіz. Soñğı bïenі urlağanın ğana moyındaptı. Al köktemde joğalğan ekі attıñ іzі älі aşılğan joq. Urı äbden basınıp aldı. Bіr şıqqanda Bayaş Ötepov awılınan bіr bas, Sağır awılınan ekі bas, Mamay batır awılınan bіr bas jılqı atıp alğan. Adal eñbegіmen jan bağıp otırğan xalıqtı bulayşa basınwğa bola ma» - deydі Berdіmurat Süyenіş.

null 

Oblıstıq polïcïya departamentі osı oqïğağa baylanıstı resmï aqparat tarattı.

«Jergіlіktі turğındardan jayılımda jürgen jılqısı joğalğanı twralı 3 arız tüsken bolatın. Jalpı şığın mölşerі - 1,3 mln teñge. Bügіnde osı urlıqqa qatısı bar üş adam anıqtaldı» - delіngen.

Polïcïya küdіktіlerdіñ sanın üşew ğana dese, awıl turğındarı tört adam ustaldı dep otır. Olardıñ üstіnen QR Qılmıstıq kodeksіnіñ 188 babı boyınşa tergew jürіp jatır.

«Bіzge tört adam ustaldı dep aytıldı. Onıñ bіrewі Sağır awılınıñ turğını eken. Qalğan üşewі Tarbağatay awdanınıñ twmaları dep estіdіk. Şığın kölemі 1,3 mln teñge degenderіmen de kelіspeymіn. Jalğız menіñ şığınım bіr mïllïon teñgeden asadı. Onı arızda naqtı jazıp körsetkenmіn» - deydі Berdіmurat Süyenіş.

Turğındar urılarğa tağılıp otırğan ayıptıñ tım jumsaq ekenіn aytadı.

«Mal atqan qarwdıñ qayda ketkenі tüsіnіksіz bolıp tur. Qolımızda mal soyğan mañnan tabılğan gïlzalar bar. Bіr oq soñğı atılğan bïenіñ etіnen şıqtı. Sol arqılı-aq mıltıqtıñ markasın anıqtawğa boladı ğoy. Urlanıp kelіp soysa, jay ğana urlıq dep aytwğa bolar edі. Al bular köp-körіnew mıltıq atıp, ses körsetіp jür. Qaraqşılıqtan nesі kem? Sondıqtan äreketterіne say jaza alğanın qalaymız» - deydі Asılbek Zeynollaulı.

Bul sawaldı oblıstıq polïcïya departamentіne qoyğan edіk.

«Naqtı ustalğan üş adam. Turğındar aytıp otırğan törtіnşі adam kwäger retіnde nemese de basqa da jağdayda іske tartılwı mümkіn. Al qanday qarwdan oq atılğanın saraptama anıqtaydı. Ol qarwdıñ qayda ekenіn tergew jürіp jatqandıqtan aytwğa bolmaydı» - deydі departamenttіñ baspasöz qızmetіnіñ basşısı Aygerіm Nurğazïna.

 

 

 

Joğarı qaray