Aýa raıy
Astana -7 °S
Almaty -2 °S
valıýta baǵamy
USD 388.81
EUR 429.01
RUB 6.08
CNY 55.49

Sheteldik JOO-da oqyǵandar memlekettik qyzmetke jańa tártippen qabyldanýy múmkin

2019 jyldyń 26 qyrkúıek 2019 15:07

NUR-SULTAN. QazAqparat – QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasy boıynsha Parlament Májilisiniń depýtaty Ersultan Bekturǵanov baıandama jasady. Tek qana ótken jyldyń ishinde memlekettik qyzmetke qyzyǵýshylyq tanytqandar sany 53 myń adamnan asyp, 24 myńnan astamy testileýden ótken. Qyzmettegi aýyspalyq eki esege azaıyp, negizinen, birinshi basshylar aýysqanda, basqa memlekettik organdardan aýystyrý retimen keletinderdiń sany 18 ese qysqarǵan. Byltyrdyń ózinde 6 myńnan astam tómen qyzmetterden joǵary laýazymdarǵa mansaptyq úlgimen kóterilgen.

«Azamattardyń synaq merzimin anyqtaý men arnaıy tekserýden ótkizý sharalaryn konkýrstan ótip, jumysqa kirgen kúnnen bastap qatar bastaýdy usynyp otyrmyz. Budan bólek, memlekettik qyzmetten teris sebeptermen emes jumystan bosaǵandarǵa jumystan shyǵarǵannan keıin testen ótpeı, 30 kún ishinde memlekettik qyzmet konkýrstaryna qaıtadan qatysýǵa múmkindik berý jaǵy eskerilgen. Sonymen qatar, buryn memlekettik qyzmette istegen, keıin qaıtadan jumysqa kelgen azamattarǵa synaq merzimin qoımaý jeńildikteri kózdelgen. Ortalyq memlekettik organdardyń memlekettik qyzmetshilerine olardyń vedomstvolary men aýmaqtyq bólimsheleri ótkizetin ishki konkýrstarǵa qatysý quqyǵyn berý usynylady», - dedi Bekturǵanov zań jobasyn tanystyrý barysynda.

Depýtattyń atap ótýinshe, jetekshi sheteldik joǵary oqý oryndarynda doktorantýra baǵdarlamasy boıynsha oqyǵan, sondaı-aq halyqaralyq uıymdarda jumys tájirıbesi bar tulǵalarǵa memlekettik qyzmetke konkýrstan tys kirý múmkindigin jasaý usynysy qamtylǵan.

Óz kezeginde senator Murat Baqtııaruly osy jańashyldyqqa qatysty suraq qoıdy. Osy oraıda memlekettik qyzmetke úmitkerlerdiń bilimimen qatar, iskerligi men azamattyq paıymyna birinshi kezekte qaraý kerektigin atap ótti.

Bul turǵyda Ersultan Bekturǵanov jetekshi sheteldik JOO-da doktorantýra bitirgen, belgili dúnıejúzilik kompanııalarda isteıtin elimizdiń azamattaryn shaqyrý qadamy olardyń konkýrstan tys kirý degen konkýrstan ótpeý degendi bildirmeıtinin atap ótti.

«Olar Prezıdent janyndaǵy ulttyq komıssııanyń konkýrsynan ótedi. Sondyqtan ol azamattar egjeı-tegjeıli tekserilip, sodan keıin qabyldanýy múmkin», - dedi depýtat Bekturǵanov.

Avtor Rýslan Ǵabbasov
Basty sózder: Parlament, Bilim, JOO-lar, Zań,
Joǵary qaraı