Aýa raıy
Astana -1 °S
Almaty 6 °S
valıýta baǵamy
USD 389.98
EUR 434.01
RUB 6.10
CNY 55.04

Sadrıddın Ahmedov WBC Asia tıtýlyn jeńip aldy

2019 jyldyń 25 naýryz 2019 00:11

ALMATY. QazAqparat - Almaty Arena sport kesheninde ótip jatqan boks keshinde Sadrıddın Ahmedov WBC Asia chempıony atandy, dep habarlaıdy QazAqparat tilshisi.

10 raýndtyq kezdesýde Sadrıddınge ındonezııalyq Djon Rýbo qarsy shyqqan bolatyn. Ol sharshy alańda 23 jekpe-jek ótkizip, 17-sinde jeńiske jetip, 9-yn merziminen buryn aıaqtaǵan, 5 ret jeńilistiń ay dámin tatqan myqty boksshylardyń biri sanalady.

Alǵashqy raýnd boksshylardyń ańdysýymen ótti desek te bolady. Alaıda, raýnd ortasyna taman Sadrıddın birneshe djeb soqqysyn jumsap, qarsylasy basyn qorǵana bastaǵan sátinde eki búıreginen, baýyrynan alma-kezek tómpeshtep aldy. Ekinshi raýndta da qazaq boksshysy sol qolymen djeb jasaı otyryp, qarsylasynyń qorǵanysqa kóshken mezetinde eki búıirinen, qulaq-shekesinen aýyr soqqylar jumsaýǵa tyrysyp baqty. Sadrıddın úshinshi raýndta da ındonezııalyqtyń shabýyl jasaýyna esh múmkindik bermedi. Baýyrynan, búıirinen soqqylap, qarsylasy qarsy umtylǵan kezde birneshe márte apperkot soqqylaryn jasap úlgerip jatty.

Tórtinshi raýndta Sadrıddın urys mánerin sál ózgertip, qarsylasyn tek sol qolymen qulaq-shekeden, ishten uryp, apperkot jasaýǵa tyrysty. Al Djon alǵa umtylyp, soqqylaryn darytýǵa tyrysty. Kelesi raýndta ındonezııalyq qolyn ońdy-soldy sermep, alǵa umtylǵanymen Sadrıddınniń kútip alyp, urǵan soqqylary oǵan dál tıe berdi. Altynsha raýndta Rýbo ońaı shaǵylatyn «jańǵaq» emestigin tanytty. Sadrıddınniń birneshe aýyr soqqylaryna tótep berdi. Jetinshi raýndta qarsylasynyń soqqylaryna qaramastan alǵa entelegen Rýbo tózimdi ekenin kórsetti. Al Qazaqstan boksshysy qorǵana júrip, oń, sol qolymen qarsylasynyń baýyrynan aýyr soqqy jumsap úlgerdi. Qalǵan raýndtarda da Sadrıddınniń aýyr soqqylary dál tıgenimen, Rýbo laıyqty qarsylyq tanyta bildi. Sonymen, 10 raýndtyń qorytyndysynda upaı sanymen Qazaqstan boksshysy jeńiske jetip, WBC Asia tıtýlyn jeńip aldy.

«Qazaq eli úshin» degen soń bul kezdesýge kelisim berdik. 10 raýnd ótkizeıik dep kelisken edik. Sondyqtan sizderge nokaýt kórsete almaǵanym úshin keshirim suraımyn. Endi qazaq eliniń kóńilin túsirgen Kaneloǵa qarsy daıyndalyp jatyrmyz. Gennadıı aǵamyzdyń Kaneloǵa ketken esesin qaıtaramyz», - dedi jekpe-jekten keıin sóz alǵan Sadrıddın Ahmetov.

Eske sala keteıik, 26 qańtarda Kanadanyń Monreal qalasynda ótken aldyńǵy jekpe-jeginde Sadrıddın meksıkalyq Abraham Hýaresti (13-2, 5KO) tórtinshi raýndta nokaýtqa jiberip, birinshi orta salmaqta jastar arasyndaǵy WBC tujyrymy boıynsha álem chempıony atanǵan bolatyn.

Avtor Marlan Jıembaı
Basty sózder: Sport, Boks,
Joǵary qaraı