Aýa raıy
Astana 9 °S
Almaty 15 °S
valıýta baǵamy
USD 389.52
EUR 429.21
RUB 6.07
CNY 54.94

RF kompozıtory Igor Krýtoı Erjan Maksımdi óz akademııasyna oqýǵa shaqyrdy

2019 jyldyń 15 mamyr 2019 09:46

NUR-SULTAN. QazAqparat - Reseıdiń halyq ártisi, kompozıtor ári prodıýser Igor Krýtoı qazaqstandyq jas ánshi Erjan Maksımge óziniń mýzykalyq akademııasyna oqýǵa túsip, bilimin shyńdaýdy usyndy, dep habarlaıdy QazAqparat tilshisi.

Bul jaıly jas ánshi Instagram-daǵy óz paraqshasynda jazdy.

«Dostar, Máskeýge jasaǵan saparym sátti boldy. Nege deısiz ǵoı. Men eń aldymen, elimizdiń aptal azamaty Imanǵalı Nurǵalıulymen kezdestim. Sol kezdesýimizdiń nátıjesi retinde kópten beri armandap júrgen ataqty kompozıtor, prodıýser Igor Krýtoımen tanystym. Stýdııada tyńdaǵan maestro meni unatyp, óziniń mýzykalyq akademııasyna shaqyrdy. Men qýana kelistim. Endi, dostar, kúzden bastap sol jerde vokal baǵyty boıynsha ónerimdi shyńdaıtyn bolamyn. Árıne, munyń barlyǵy Imanǵalı aǵamyzdyń arqasy dep bilemin. Osyndaı azamattardyń arqasynda shyǵarmashylyǵym jalǵasyp, jemisin beretinine senimim mol», - dep jazdy Erjan.

Eske sala ketsek, keshe Máskeýde Reseı Federatsııasyndaǵy Qazaqstan Respýblıkasynyń Tótenshe jáne Ókiletti elshisi Imanǵalı Tasmaǵambetov jas ánshi Erjan Maksımmen kezdesken bolatyn. Dıplomatııalyq ókildikten habarlaǵandaı, Reseıdegi Qazaqstan elshiliginde ótken kezdesý barysynda qazaqstandyq jas ánshiniń shyǵarmashylyq jospary talqylandy. Erjan «Golos. Detı» jobasyna qatysqannan keıin ómirinde qandaı ózgeris bolǵanyn jáne aldaǵy ýaqytta nemen aınalysýdy josparlap júrgenin aıtty.

Eske sala ketsek, ótken aıda Reseıdiń birinshi arnasyndaǵy «Golos. Detı» konkýrsynda Erjan Maksım ekinshi oryn ıelengen bolatyn.

Ánshiniń anasy Gúlmıra Álibek onyń elordada bilim alǵysy keletinin aıtqan edi. «Mınıstr qabyldaý kezinde Erjanǵa «Shabyt» óner akademııasy janynan grant bólinetindigin jetkizdi. Endi 8 mamyrda Qazaq ulttyq óner ýnıversıtetiniń rektory Aıman Musaqojaevanyń qabyldaýynda bolyp, máseleni odan ári talqylaımyz», - degen edi Gúlmıra Álibek.

Igor Krýtoı buǵan deıin Dımash Qudaıbergenmen tandemde óner kórsetip, qos eldiń maqtanyshy Reseı aýdıtorııasyn baýrap alǵan bolatyn. Krýtoıdyń súıemeldeýimen Dımash «Lıýbov ýstavıh lebedeı» ánin Máskeýdegi Kreml saraıynda Reseı Federatsııasynyń Іshki ister organdarynyń qyzmetkerleri kúnine arnalǵan kontsertte shyrqaǵan edi. Al 8 sáýir kúni jas talant Reseıdiń Halyq ártisi, ánshi Alla Pýgachevanyń merekelik keshinde án aıtty.

Avtor Aıan Bekenuly
Basty sózder: Dıplomatııa, Reseı, Óner, Qoǵam,
Joǵary qaraı