Aýa raıy
Astana 0 °S
Almaty 5 °S
valıýta baǵamy
USD 389.98
EUR 434.01
RUB 6.10
CNY 55.04

Prezıdent bilim mınıstrine pedagogtar mártebesin kóterýdi tapsyrdy

2019 jyldyń 25 sáýir 2019 17:00

NUR-SULTAN. QazAqparat - Qazaqstan Prezıdenti Qasym-Jomart Toqaev Bilim jáne ǵylym mınıstri Kúlásh Shámshıdınovany qabyldady, dep habarlaıdy QazAqparat Aqordanyń baspasóz qyzmetine silteme jasap.

Memleket basshysyna bilim berýdi jáne ǵylymdy damytý Memlekettik baǵdarlamasynyń júzege asyrylý barysy baıandaldy.

Qasym-Jomart Toqaev úsh aýysymda oqytýdy joıý, jańa mektepter salý jáne úsh tilde bilim berýge birtindep ótý jumystaryn jalǵastyrý mańyzdy mindet ekenin aıtty.

K. Shámshıdınova tehnıkalyq jáne kásibı bilim berý isiniń jaǵdaıy jáne bıznes pen oqý oryndarynyń arasyndaǵy ózara is-qımyldardy jolǵa qoıý sharalary jóninde esep berdi. Kezdesý barysynda joǵary bilimniń sapasyn arttyrýǵa jáne JOO túlekteriniń eńbek naryǵyndaǵy suranysqa saı bolýyna erekshe nazar aýdaryldy.

Memleket basshysy mektep muǵalimderi men JOO oqytýshylaryn artyq esep berýlerden aryltyp, pedagogtardyń mártebesin kóterýge, ǵalymdardy memleket tarapynan qoldaýǵa, birinshi kezekte memlekettik tilde zertteýler júrgizetin gýmanıtarlyq baǵyttaǵy ǵalymdarǵa basymdyq berýge baǵyttalǵan naqty sharalar qabyldaýdy tapsyrdy.

Qazaqstan Prezıdenti kezdesý sońynda bilim berý júıesiniń máseleleri budan bylaı da óziniń jiti nazarynda bolatynyn aıtty.

Joǵary qaraı