Aýa raıy
Astana 24 °S
Almaty 28 °S
valıýta baǵamy
USD 384.87
EUR 432.52
RUB 6.11
CNY 55.95

Polıtseı kúndeligi: Sýıtsıdke bel býǵan boıjetken, kýrsant erligi

2019 jyldyń 19 maýsym 2019 17:56 624

NUR-SULTAN. QazAqparat - QazAqparat mindetin múltiksiz oryndap júrgen polıtsııa qyzmetkerleri týraly maqalalar toptamasyn jalǵastyrady.

«Asyqpańyz, aǵa-baýyrlaryńyzdy oılasańyzshy!» Polıtsııa kishi serjanty Denıs Komarovtyń aýzyna jardan qulaǵaly turǵan qyzdy kórgende áýeli osy sózder túsken edi.

Jeksenbiniń keshinde qar aralas jańbyr jaýyp turǵan. Aýysymnan úıine qaıtar tusta taǵy bir ret aınalany sholýǵa shyqqan Denıs Komarov Esildiń jaǵasynan áıel adamnyń sulbasyn baıqap qalady. Taǵy bir aınalyp kóz tastaǵanda sulbanyń tómen túsip bara jatqanyn kóredi. Serjant Esildiń bul tusynda 30 metrlik jar bar ekenin jaqsy biletin. Oıyna kúdik uıalap, solaı qaraı betteıdi.

Kúdigi rasqa aınalyp, jardyń týra shetinde solyǵyn basa almaı turǵan qyzdy kóredi. Oǵan baıqatpastan mysyqtabandap jaqyndaı bergen edi. Kenet muz qata bastaǵan jaqpar tastan aıaǵy taıyp, ózi de qulap kete jazdaıdy. Ony baıqaǵan qyz, jaqyndamaýyn talap etip, aıǵaıǵa basady.

«Asyqpańyz! Úıde kútip otyrǵan jaqyndaryńyz bar shyǵar. Aǵa-baýyrlaryńyzdy oılasańyzshy», - deıdi qapelimde aýzyna sóz túspegen saqshy. Qyzdyń sál bógelgenin paıdalanyp, áriptesterine ratsııamen habar beredi. Ar jaqtan olar da meılinshe ýaqyt sozýǵa keńes beredi. Qyzdy áńgimege aılandyryp, eppen jaqyndaǵan saqshy ony qolynan ustap, jardyń jaǵasynan alysqa áketedi.

«Keıin Denıs Komarov qutqarǵan qyz 1997 jylǵy boıjetken ekeni anyqtaldy. Osy oqıǵaǵa baılanysty «ózin-ózi óltirýge deıin jetkizý» faktisi boıynsha  tergeý júrgizildi. Kishi serjant Denıs Komarov bolsa, erteńinde qaıta aýysymǵa túsip, qyzmetine kiristi», - deıdi Soltústik Qazaqstan oblysynyń PD baspasóz qyzmetiniń ókili Mádına Balǵashoqova.

Al kóshi-qon qyzmetiniń ókili Darına Súleımenova úıde jalǵyz qalǵan sábıdi ajaldan arashalap qalǵan. Oqıǵanyń mán-jaıy Soltústik Qazaqstan oblystyq Polıtsııa departamenti basshysynyń  jeke blogyna  Petropavl qalasynyń turǵynynan hat kelip túskende belgili bolǵan.

Petropavldyq 4 jasar qyzdyń tórtinshi qabattaǵy terezeniń moskıttik toryna súıenip turǵanyn sol mańaıdan ótip bara jatqan Darına Súleımenova baıqap qalady. Ol kóp oılanbastan balamen daýystap sóılese bastaǵan. Shýdy joǵarǵy qabattaǵy kórshiler de estıdi. Búldirshin tereze aldynan ketýi úshin Darına olarǵa páter esigine baryp qońyraý shalýyn suraıdy. Ózge kórshileri úıden kórpe alyp túsip,  Darınamen birge ony terezeniń tusyna kerip tosady. 

Qutqarýshylar kelgende kishkentaı qyz esiktegi qońyraýdy estip, terezeden alystap ketedi. Osyny paıdalanyp,  qutqarýshylar órt sóndirý arqyly terezeden  kirip, balany qutqarǵan.

Al Qostanaı qalasynda Shyraqbek Qabylbaev atyndaǵy Qostanaı Akademııasynyń 4-kýrs kýrsanty Ońaıbek Orazaqov qylmys jasaǵan kúdiktini ustaǵan.

Ol keshkilik Arystanbekov kóshesiniń qarsy betinen áıel adamnyń kómek surap aıǵaılaǵan daýysyn estıdi. Sómkesin urlatqan áıeldiń nusqaýymen qashqynnyń sońyna túsedi. Ońaıbektiń aldynda taǵy bir qýǵynshy bar edi. Ek adamnyń sońyna túskenin kórip, kúdikti sómkeni tastaı qashady. Qylmysker aılasy iske aspaı, qolǵa tústi. Ekinshi qýǵynshynyń polıtsııa aǵa leıtenanty Jandos Raımbekov ekenin Ońaıbek keıin bildi.

Kýrsant bola tura, qyraǵylyǵymen kózge túsken Ońaıbek tártip saqshysy bolýǵa ishteı daıyn ekenin isimen dáleldedi.

Shyraqbek Qabylbaev atyndaǵy Qostanaı Akademııasy polıtsııa serjanty Ońaıbek Orazaqovtyń bul áreketin joǵary baǵalap, marapattaýǵa usyndy.

 

 

Basty sózder: Qoǵam, Basqa memorgandar,
Joǵary qaraı