Aýa raıy
Astana 5 °S
Almaty 8 °S
valıýta baǵamy
USD 389.86
EUR 435.32
RUB 6.12
CNY 55.12

Petropavldyq turǵyn júzimniń 10-nan astam túrin ósiredi

2019 jyldyń 26 mamyr 2019 16:30

PETROPAVL. QazAqparat - Petropavl qalasynyń turǵyny Vladımır Doljnıkov saıajaıynda júzimniń ǵana 10-nan astam túrin ósirip, jemis alyp otyr, dep habarlaıdy QazAqparat tilshisi.

Soltústikqazaqstandyqtar kókónis-jemisti satyp alǵannan góri, ózderi ósirgendi jón sanaıdy. Oblysta qajetti ónimniń 40 paıyzy saıajaılarda ósiriledi. Turǵyndar tipti, jylý súıgish jemis - júzimdi de kóptep egetin bolǵan. Vladımır Doljnıkovtyń saıajaıynda bul ósimdiktiń ǵana 10 shaqty túri bar.

Qyzyl, jasyl, aqshyl, qara, káriptas tústes, kúlgin - júzimniń túsi ǵana emes, dámi de san alýan bolady, deıdi tájirıbeli baǵban. Máselen, "Almaty -9" surypy óte tátti bolsa, "Veles" atty júzim jupar shyryndy keledi eken. Onyń saıajaıyndaǵy júzimderdiń barlyǵy qońyrjaı jyly aýa raıyna beıimdelgen, erte pisetin sorttar. «Gagarınskıı» dep atalǵany 118-122 kúnniń ishinde pisip jetiledi.

«Mende júzimniń 15 túri boldy. Alaıda aýa-raıyna baılanysty olardyń keıbirinen bas tartýǵa týra keldi. Óıtkeni jetilip úlgermeıdi. Jaqsy jemis alý úshin jaz ystyq bolý kerek. Sońǵy eki jyl boıy qysta qar az, aıaz boldy. Al júzimniń tamyry álsiz keledi, sol sebepti úsip ketti. Byltyr ýchaskege sý kirip, ósimdikter bir aı sý astynda turdy. Bul da jemistiń pisip úlgermeýine áser etti», - deıdi Vladımır Doljnıkov.

Vladımır Doljnıkovtyń júzim ósirýmen aınalysqanyna otyz jylǵa jýyq. Burynǵy ushqysh, endi bilikti baǵbanǵa aınalǵan. Arnaıy bilimi bolmasa da, jylý súıgish ósimdiktiń babyn taýyp otyr. Aıtýynsha, bir túpten 30 kelige deıin ónim alǵan kezderi bolypty. Biraq, jemisti qysqa saqtaýǵa kelmeıdi. Sondyqtan, ol kórshi-qolańǵa, týystarǵa taratylady. Artylǵany úı sharabyn ázirleýge ketedi eken.

Saıajaıdaǵy 5 sotyq jerden Qıyr Shyǵys, Oral, Altaı, Vladıvostok pen Zaýrale ólkesiniń jurnaǵyn kóresiń. Saıajaıda Germanııa men Japonııada ósetin ósimdikter de bar.

«Eldiń ońtústiginen ákelinetin júzimder hımııalyq dárileýden ótedi. Óıtkeni, ol jaqta jemis túrli aýrýǵa shaldyqqysh. Mysaly, krasnodarlyq baǵban Kýrdıýmovtyń aıtqany bar, júzim piskenshe deıin 9 ret dárilenedi eken. Al, dári mindetti túrde jemiske tıedi. Al, bizde bul ósimdik aýyrmaıdy. Hımııa qoldanylmaǵandyqtan ol - ekologııalyq taza ónim», - deıdi baǵban.

Soltústikqazaqstandyq saıajaıshylardyń kópshiligi osyndaı pikirde. «Taza ónim jegiń kelse - óziń ósir», - deıdi olar. Ári - arzan. Qazir oblysta 24 myń saıajaı ýchaskesi bar. Bul jerlerdiń 40% kartop, shamamen 30% kókónis egilse, qalǵanynda jemis-jıdek ósip jatyr.

Joǵary qaraı