Aýa raıy
Astana 13 °S
Almaty 19 °S
valıýta baǵamy
USD 386.70
EUR 427.15
RUB 6.06
CNY 54.57

Pavlodar oblysynda  175,8 mln teńge jalaqy qaryzy óteldi

2019 jyldyń 23 tamyz 2019 00:36

PAVLODAR. QazAqparat - Pavlodar oblysynda jyl basynan beri memlekettik ınspektorlar qolǵa alǵan sharalardyń nátıjesinde 141 kásiporynda 175,8 mln teńge kólemindegi jalaqy boıynsha qaryz óteldi, dep habarlaıdy pavlodarnews.kz.

Bul týraly óńirlik kommýnıkatsııalar qyzmetinde ótken baspasóz jıynynda Pavlodar oblysynyń eńbek basqarmasynyń basshysy Asqar Qapanov málim etti.

«Eńbekaqyny ýaqytynda tólemeý oqıǵalary memlekettik eńbek ınspektorlary tarapynan shuǵyl sheshiledi, bul másele turaqty baqylaýda», - dedi Asqar Qapanov.

Jyl basynan beri 1388 jumysshynyń quqyqtary qorǵaldy. Kásiporyndardyń jetekshilerine qatysty 19 uıǵarym shyǵarylyp, 4,9 mıllıon teńgege aıyppul salyndy. Búgingi tańda jalaqy boıynsha qaryzdar kelesi kásiporyndarda bar: «Qazaqstan vagon qurylysy kompanııasy» JShS – 508 jumysshynyń aldyndaǵy 117,6 mıllıon teńgeniń qaryzy, «Ek Alpar» JShS – 7 jumysshynyń aldyndaǵy 1,3 mıllıon teńge.

Eńbek basqarmasy basshysynyń aıtýynsha, bankrot kásiporyndar men ońalý kezeńindegi kásiporyndardyń qaryzy 5 uıymda bar. Olar 146 jumysshyǵa 52,4 mln teńge bereshek. «Jalaqy boıynsha qaryzy bar, biraq, jumysyn toqtatqan kásiporyndar: «MýsaImpeks» JShS - 10 adam - 0,5 mln teńge, «Nur-Pavlodar» JShS - 23 adam - 29 mln teńge, «Ýnıstroı-PV» JShS - 76 adam - 10,4 mln teńge, «Green House-Pavlodar» JShS - 32 adam - 2,5 mln teńge, «Food Center Astana» JShS - 5 adam - 10 mln teńge», - dep atap ótti Asqar Qapanov.

Jalaqyny ýaqytynda tóleý boıynsha máseleleri bar jáne óndiristik jaraqattar oqıǵalarynyń ósýine jol bergen kásiporyndardyń máselesi áleýmettik seriktestik, áleýmettik, eńbek qarym-qatynastardy retteý jónindegi aımaqtyq komıssııanyń jáne problemaly kásiporyndar (daǵdarysqa qarsy shtab) jónindegi jumys tobynyń otyrystarynda tyńdalady.

Aıta keteıik, komıssııalar otyrysy bekitilgen grafık boıynsha bir toqsanda kem degende bir ret ótkiziledi. Osy tektes jumys oblystyń aýdandarynda oń jolǵa qoıylǵan. Jyl basynan beri qalalar men aýdandardyń úshjaqty komıssııalarynyń 14 otyrysy ótti. Sharaǵa 24 jumys berýshi shaqyrylyp, tyńdaldy.

Joǵary qaraı