Aýa raıy
Astana -9 °S
Almaty -3 °S
valıýta baǵamy
USD 389.34
EUR 428.78
RUB 6.05
CNY 55.45

Orta bilim berýde qala men aýyl arasyndaǵy alshaqtyqty joıý úshin qandaı sharalar júrgizilip jatyr

2019 jyldyń 17 qazan 2019 16:02

NUR-SULTAN. QazAqparat - Osy jyldyń qarasha aıynda 69 myń muǵalim attestatsııadan ótedi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Bilim jáne ǵylym vıtse-mınıstri Sholpan Karınova aıtty, dep habarlaıdy QazAqparat tilshisi.

«Halyqaralyq tájirıbede bilim sapasy PISA zertteýleriniń nátıjesi boıynsha baǵalanady. Bizdiń oqýshylar bul zertteýlerge 4 ret qatysty. Sonyń ishinde bári baıqalady. Aýyl men qala arasyndaǵy alshaqtyq 19-26 upaıy dep kórsetilgen. Al qazaqstandyq syrttaı baǵalaý júıesimen de qala men aýyl arasynda 8 upaılyq aıyrma bary kórinip tur. Osyǵan baılanysty Bilim jáne ǵylym mınıstrligi úlken taldaý jumystaryn júrgizdi. Osy oraıda bilim sapasyna qandaı faktor áser etedi degen suraqqa toqtalaıyn. Birinshisi - mektepte jumys istep júrgen muǵalimniń kásibıligi men biliktiligi, sanatynyń ósýi. Ekinshisi - mekteptiń jalpy jaǵdaıy. Búginde pándik kabınetterdiń jabdyqtalýy, Internetpen qamtamasyz etilýi, zerthanalardyń bolýy syndy máseleler de bilim sapasyna áserin tıgizedi», - dedi ol.

Onyń dereginshe, qazirgi kúni mektepterdiń 75 paıyzy aýylda ornalasqan jáne olardyń 41 paıyzy shaǵyn jınaqty mektep sanalady. Degenmen, osy aýyl mektepterinde bilim berip jatqan ustazdardyń biliktiligin arttyrý úshin de naqty jumystar júrgizilip jatyr.

«Birinshiden, bıyl 150 myńnan astam muǵalim biliktiligin arttyrý kýrstarynan ótip jatyr. Ekinshiden, muǵalimderdi attestatsııadan ótkizý. Attestatsııa muǵalimderdiń jalaqysyn ósirýdiń birden-bir kózi. 2018 jyldan bastap jalaqy muǵalimderdiń sanattaryna baılanysty 30-dan 50 paıyzǵa deıingi aralyqta kóterildi. Búgingi kúni 123 myńnan astam muǵalim óz sanatyn ósirdi. Al bıylǵy jyldyń qarasha aıynda ótetin attestatsııalaýǵa 69 myńnan astam muǵalim qatysýǵa nıet bildirip otyr. Bul jyldan jylǵa sapany arttyrýǵa sep bolatyn faktordyń biri», - dedi vıtse-mınıstr.

Joǵary qaraı