Awa rayı
Nur-Sultan 10 °S
Almatı 11 °S
valyuta bağamı
USD 377.11
EUR 424.21
RUB 5.91
CNY 56.19

Oraldıq oqwşı ğarış keñіstіgіne arnalğan reaktor ülgіsіn jasap şığardı

2019 jıldıñ 25 nawrız 2019 11:19 707

ORAL. QazAqparat  - Nazarbaev zïyatkerlіk mektebіnіñ 10-sınıp oqwşısı Aqılbek Maqsotov ğarış keñіstіgіne arnalğan reaktor ülgіsіn jasap şığardı, dep xabarlaydı QazAqparat tіlşіsі

Aqılbek reaktordıñ 3D modelіn, reakcïya anïmacïyasın jasap şığarğan. Reaktor arqılı  qazіrgі kezde ğarış aylağına tastalıp jatqan kömіrtegі dïoksïdіnen ottegі jäne metan alwğa boladı. Ottegі ekïpaj müşelerіne tınıstaw üşіn, al metan raketa qozğaltqışına otın retіnde paydalanıladı.

Dästürlі ädіske qarağanda, otınnıñ bulayşa öndіrіlwі arzanğa tüsedі.

Oraldıq oqwşınıñ bul zerttewі Qızılorda qalasında «Ğarış. Ğılım. Ïntellekt» taqırıbında jwırda osımen toğızınşı ret uyımdastırılğan ІX Nawrız kezdeswlerіnde joğarı bağalanıp, bіrіnşі orınğa layıq dep tanıldı.

Elіmіzdіñ är öñіrіnen jïnalğan jas zerttewşіlerdіñ aeroğarıştıq ïnjenerïya taqırıbındağı seksennen astam jobası tanıstırılğan jarısta ozıp şığw - ülken jetіstіk. Aqılbekke oğan qosa  Qoja Axmet Yasawï atındağı xalıqaralıq qazaq-türіk wnïversïtetіnde bіlіm alwğa joldama berіldі. 

«Qazaqtıñ tuñğış ğarışkerі Toqtar Äwbäkіrovtіñ qolınan marapat alwım menі ülken qwanışqa böledі. Sonday-aq Talğat Musabaev, Aydın Ayımbetovterdіñ zïyatkerlіk mektep oqwşılarınıñ jobalarına joğarı bağa berwі, ğarış salasınıñ xalıqaralıq sarapşısı Maykl Lwtomskï jäne NASA-nıñ ğılımï zerttewşіsі Pravïn Pratapanmen kezdeswіmіz zor şabıt sıyladı.  VR-közіldіrіk pen planer, paraşyutterdі dayındaw boyınşa şeberlіk sağattarı da öttі. Menіñ är qarsılasımnıñ jobası bіregey dep ayta alamın», - deydі Aqılbek Maqsotov.

«Aqılbek - bіlіmge qumar oqwşı. Xïmïya-ïnformatïka pänіnіñ oqıtwşıları onıñ tereñdetіlgen tapsırmalardı orındağandı jaqsı köretіnіn, aqparattı jan-jaqtı zerttewge dağdılanğanın aytadı. Robototexnïkağa da qızığwşılığı joğarı. Äsіrese, «ROBOLAND - 2016» xalıqaralıq festïvalіnde belsendіk tanıttı. Öz betіmen oqwğa, іzdenwge talpınadı. Jelіlіk pän olïmpïadalarında da özіnіñ tereñ bіlіmіn körsetіp jür», - deydі pedagog-uyımdastırwşı-kwrator Ernar Ğaysïn.


null 

Oraldağı Nazarbaev zïyatkerlіk mektebіnіñ tağı bіr şäkіrtі, 9-sınıp oqwşısı Elamïr Qadırğaleev Nawrız kezdeswlerіnde jüldelі üşіnşі orınğa ïe boldı.

Elamïr «COSMO-I» jobasında ğarış assïsstentіnіñ prototïpіn jasaqtağan. COSMO-I - jasandı ïntellekt jüyelerіn bіrıñğay jüyege ïntegracïyalaw arqılı texnïkalıq mäselelerdі şeşwge qabіlettі bağdarlama. Ğarış kemesіnіñ bortında assïstent retіnde qızmet etetіn joba borttağı aqawlardı anıqtay aladı. Jobada ğarış keñіstіgіnde planetalardı, asteroïdterdі jäne meteorïtterdі tanwğa qabіlettі jasandı ïntellekt ülgіsі paydalanılğan, sonday-aq ol magnït örіsіnіñ, temperatwranıñ jäne basqa parametrlerdіñ äserlerіn esepteydі.

«Bayqoñır ğarış stansasında ğarış zımıranınıñ uşwın öz közіmmen tamaşalawğa mümkіndіk bergen jandarğa alğısım şeksіz. Menіñ zamandastarımdı ğarış salasınıñ qanday mäselesі alañdatadı, olar qanday zerttew jürgіzwde degen suraqtarıma jawap aldım. Öz jobamnıñ artıqşılığı men jetіldіrw kerek tusın anıqtadım. Aldağı waqıtta jumıstı jalğastıramın»,  - deydі Elamïr.

Oral qalasındağı Nazarbaev zïyatkerlіk mektebі baspasöz qızmetіnіñ mälіmetіne qarağanda, Aqılbektіñ ğılımï jetekşіlerі -  ïnformatïka pänіnіñ muğalіmі Aysulw Süleymenova men xïmïya pänіnіñ muğalіmі Altınbek Janaxmetov. Al Elamïrdі ğılım jolına bawlıp jürgen ustazdarı - ïnformatïka pänіnіñ muğalіmі  Jamïla Xwsanova, fïzïka pänіnіñ muğalіmі Tatyana Akopova.


null 

null 

Joğarı qaray