Aýa raıy
Astana -3 °S
Almaty 15 °S
valıýta baǵamy
USD 389.98
EUR 434.01
RUB 6.10
CNY 55.04

Oraldyq oqýshy ǵarysh keńistigine arnalǵan reaktor úlgisin jasap shyǵardy

2019 jyldyń 25 naýryz 2019 11:19

ORAL. QazAqparat - Nazarbaev zııatkerlik mektebiniń 10-synyp oqýshysy Aqylbek Maqsotov ǵarysh keńistigine arnalǵan reaktor úlgisin jasap shyǵardy, dep habarlaıdy QazAqparat tilshisi

Aqylbek reaktordyń 3D modelin, reaktsııa anımatsııasyn jasap shyǵarǵan. Reaktor arqyly qazirgi kezde ǵarysh aılaǵyna tastalyp jatqan kómirtegi dıoksıdinen ottegi jáne metan alýǵa bolady. Ottegi ekıpaj múshelerine tynystaý úshin, al metan raketa qozǵaltqyshyna otyn retinde paıdalanylady.

Dástúrli ádiske qaraǵanda, otynnyń bulaısha óndirilýi arzanǵa túsedi.

Oraldyq oqýshynyń bul zertteýi Qyzylorda qalasynda «Ǵarysh. Ǵylym. Intellekt» taqyrybynda jýyrda osymen toǵyzynshy ret uıymdastyrylǵan ІH Naýryz kezdesýlerinde joǵary baǵalanyp, birinshi orynǵa laıyq dep tanyldy.

Elimizdiń ár óńirinen jınalǵan jas zertteýshilerdiń aeroǵaryshtyq ınjenerııa taqyrybyndaǵy seksennen astam jobasy tanystyrylǵan jarysta ozyp shyǵý - úlken jetistik. Aqylbekke oǵan qosa Qoja Ahmet ıAsaýı atyndaǵy halyqaralyq qazaq-túrik ýnıversıtetinde bilim alýǵa joldama berildi.

«Qazaqtyń tuńǵysh ǵaryshkeri Toqtar Áýbákirovtiń qolynan marapat alýym meni úlken qýanyshqa bóledi. Sondaı-aq Talǵat Musabaev, Aıdyn Aıymbetovterdiń zııatkerlik mektep oqýshylarynyń jobalaryna joǵary baǵa berýi, ǵarysh salasynyń halyqaralyq sarapshysy Maıkl Lýtomskı jáne NASA-nyń ǵylymı zertteýshisi Pravın Pratapanmen kezdesýimiz zor shabyt syılady. VR-kózildirik pen planer, parashıýtterdi daıyndaý boıynsha sheberlik saǵattary da ótti. Meniń ár qarsylasymnyń jobasy biregeı dep aıta alamyn», - deıdi Aqylbek Maqsotov.

«Aqylbek - bilimge qumar oqýshy. Hımııa-ınformatıka pániniń oqytýshylary onyń tereńdetilgen tapsyrmalardy oryndaǵandy jaqsy kóretinin, aqparatty jan-jaqty zertteýge daǵdylanǵanyn aıtady. Robototehnıkaǵa da qyzyǵýshylyǵy joǵary. Ásirese, «ROBOLAND - 2016» halyqaralyq festıvalinde belsendik tanytty. Óz betimen oqýǵa, izdenýge talpynady. Jelilik pán olımpıadalarynda da óziniń tereń bilimin kórsetip júr», - deıdi pedagog-uıymdastyrýshy-kýrator Ernar Ǵaısın.



null

Oraldaǵy Nazarbaev zııatkerlik mektebiniń taǵy bir shákirti, 9-synyp oqýshysy Elamır Qadyrǵaleev Naýryz kezdesýlerinde júldeli úshinshi orynǵa ıe boldy.

Elamır «COSMO-I» jobasynda ǵarysh assısstentiniń prototıpin jasaqtaǵan. COSMO-I - jasandy ıntellekt júıelerin biryńǵaı júıege ıntegratsııalaý arqyly tehnıkalyq máselelerdi sheshýge qabiletti baǵdarlama. Ǵarysh kemesiniń bortynda assıstent retinde qyzmet etetin joba borttaǵy aqaýlardy anyqtaı alady. Jobada ǵarysh keńistiginde planetalardy, asteroıdterdi jáne meteorıtterdi tanýǵa qabiletti jasandy ıntellekt úlgisi paıdalanylǵan, sondaı-aq ol magnıt órisiniń, temperatýranyń jáne basqa parametrlerdiń áserlerin esepteıdi.

«Baıqońyr ǵarysh stansasynda ǵarysh zymyranynyń ushýyn óz kózimmen tamashalaýǵa múmkindik bergen jandarǵa alǵysym sheksiz. Meniń zamandastarymdy ǵarysh salasynyń qandaı máselesi alańdatady, olar qandaı zertteý júrgizýde degen suraqtaryma jaýap aldym. Óz jobamnyń artyqshylyǵy men jetildirý kerek tusyn anyqtadym. Aldaǵy ýaqytta jumysty jalǵastyramyn», - deıdi Elamır.

Oral qalasyndaǵy Nazarbaev zııatkerlik mektebi baspasóz qyzmetiniń málimetine qaraǵanda, Aqylbektiń ǵylymı jetekshileri - ınformatıka pániniń muǵalimi Aısulý Súleımenova men xımııa pániniń muǵalimi Altynbek Janaxmetov. Al Elamırdi ǵylym jolyna baýlyp júrgen ustazdary - ınformatıka pániniń muǵalimi Jamıla Hýsanova, fızıka pániniń muǵalimi Tatıana Akopova.



null


null

Avtor Eljan Eraly
Basty sózder: Ǵarysh, Bilim, Batys Qazaqstan oblysy,
Joǵary qaraı