Aýa raıy
Astana 19 °S
Almaty 30 °S
valıýta baǵamy
USD 386.05
EUR 428.25
RUB 5.84
CNY 54.65

Oralda qos birdeı jasóspirim sýǵa ketýden qutqaryldy

2019 jyldyń 16 shilde 2019 17:40 230

ORAL. QazAqparat – Oralda qos birdeı jasóspirim sýǵa ketýden qutqaryldy, dep habarlaıdy QazAqparat tilshisi.

BQO TJ departamenti jedel qutqarý jasaǵynyń bas qutqarýshy-psıhology Leıla Ábdirahmanovanyń aıtýynsha, oqıǵa 14 shilde kúni qalalyq mádenıet jáne demalys saıabaǵy aýmaǵynda oryn aldy.

Eresekterdiń qaraýynsyz, sýda oınap júrgen 2006 jáne 2007 jylǵy ul balalar tereńge batyp bara jatqan.

Osy mańda kezekshilikte júrgen qutqarýshylar Altynbek Qajedenov pen Pavel Fedorov jedel jetip, jasóspirimderdi aman alyp qaldy.

Qatty qoryqqan balalar jaǵada júrgen analarynyń qolyna tapsyryldy.

«Ótken aptada 8 adam sýǵa ketýden qutqaryldy. Sonyń tórteýi – balalar», dedi L.Ábdirahmanova.

BQO TJ departamenti bastyǵynyń orynbasary, podpolkovnık Aqylbek Ahmetjanovtyń aıtýynsha, bıyl jyl basynan beri 24 adam sýǵa batyp ketse, sonyń jeteýi – balalar.

Oblys aýmaǵyndaǵy sý aıdyndarynda kópshiliktiń demalysyna bes jaǵajaı ǵana sáıkes keledi, onyń úsheýi Oralda, ekeýi Báıterek aýdanynda.

«Qaýipti jerlerde 247 tyıym salý belgisi ornatyldy. Qazirgi kezde qosymsha belgilerdi jańartý jáne ornatý jumystary júrgizilýde. Sý aıdyndarynda qutqarýshylarǵa eriktiler jasaqtary da kómektesýde», dedi A.Ahmetjanov.

Eske sala keteıik, budan buryn Oralda sýǵa batýǵa árekettengen áıeldiń qutqarylǵanyn jazǵan bolatynbyz.

32 jasar áıel mas kúıinde ózine-ózi qol jumsamaq bolyp tik jardan sekirip ketken. Abyroı bolǵanda, qutqarýshylar Nurbek Taýashev, Ázilhan Qarabasov, Batyrbek Nurǵalıev jetip úlgerip, áıeldi qaıyqpen jaǵaǵa alyp shyqqan.

Joǵary qaraı