Aýa raıy
Astana 10 °S
Almaty 14 °S
valıýta baǵamy
USD 389.62
EUR 429.98
RUB 6.06
CNY 55.08

Eskendir Súleımenovtiń isi: Jol apatyna kináli áıel sotta keshirim surady

2018 jyldyń 17 qazan 2018 17:20

ASTANA. QazAqparat - Aqyn Oljas Súleımenovtiń nemeresi Eskendir qaza tapqan jol apaty boıynsha aıyptalýshy Malıka Muhıtova marqumnyń ata-anasynan keshirim surady, dep habarlaıdy QazAqparat.

«Keshirińizder meni, ótinem. Kún saıyn Alladan Eskendir jáne sizder keshirse eken dep tileımin. Mundaı jaǵdaı bolaryn bilmedim jáne qalamadym. Ótinem, meni keshirińizdershi. Sizderge qanshalyqty aýyr ekenin túsinemin», - dedi M. Muhıtova Astana qalasynyń Esil aýdandyq №2 sotynda.

Sonymen birge, ol jol apatynyń mán-jaıyn aıtyp berdi.

«Sol kúni jumystan erterek jiberdi. Jolaı Kereı men Jánibek handar-Máńgilik el dańǵyly qıylysyndaǵy azyq-túlik dúkenine kirdim. Dúkennen shyǵyp, kóligime otyrdym jáne Kereı men Jánibek handar kóshesine shyǵý úshin solǵa qaraı buryla bastadym. Tejegishti basyp, aınalama qaradym. Solǵa buryla bergenimde oń jaǵymnan qap-qara bir nárse kelip, kóligime soǵyldy. Alǵashynda ne bolǵanyn túsinbedim. Kólikten túsip qarasam, asfaltta jas jigit jatyr. Adamdar júgirip kele bastady. Jedel járdem shaqyrýǵa árekettendim, biraq maǵan deıin shaqyryp qoıypty», - dedi ol.

Eske sala ketsek, 22 maýsym kúni Astanadaǵy jan túrshigerlik jol apatynda Oljas Súleımenovtiń 26 jastaǵy nemeresi Eskendir Súleımenov qaza tapty. Apat elordadaǵy Máńgilik el dańǵyly men Kereı men Jánibek handar kóshesiniń qıylysynda bolǵan.

Astana qalalyq Іshki ister departamenti apatqa sebepker bolýy múmkin «Hyundai» avtokóliginiń ıesi, 29 jastaǵy astanalyq áıelge qatysty tergeý amaldary júrip jatqanyn habarlaǵady.

Sondaı-aq, qalalyq Іshki ister departamenti Oljas Súleımenovtiń nemeresi - Eskendir Súleımenovtiǵ mototsıkli soǵylǵan kólik júrgizýshisi Qyzylorda oblystyq Іshki ister departamenti bastyǵynyń qyzy ekenin rastaǵan.

Atyshýly is boıynsha 12 qazan kúni bastalǵan sot protsesi jábirlenýshi taraptyń ótinishimen 17 qazanǵa shegerildi.

Joǵary qaraı