Aýa raıy
Astana 7 °S
Almaty 0 °S
valıýta baǵamy
USD 389.98
EUR 434.01
RUB 6.10
CNY 55.04

Memleket basshysynyń Jarlyǵymen tórt sýdıa jumystan bosatyldy

2019 jyldyń 22 aqpan 2019 16:32

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń usynysymen birneshe sýdıa qyzmetten bosatyldy, dep xabarlaıdy QazAqparat tilshisi.

Sybaılas jemqorlyqqa qarsy is-qımyl ulttyq bıýrosy tóraǵasynyń orynbasary Shyńǵys Qabdolanyń aıtýynsha, búginde etıkalyq normalar aıasynda jemqorlyqtyń aldyn alý sharalary júrgizilip keledi. Osylaısha, Ulttyq bıýro QR Joǵary sotyna Shyǵys Qazaqstan oblysynyń tórt sýdıasyna qatysty usynys hat engizgen bolatyn. «Bizge jaýap keldi. Aǵymdaǵy jyly 20 aqpanda Memleket basshysynyń Jarlyǵymen qol qoıyldy. Tártiptik komıssııanyń sheshimimen sot etıkasyna qaıshy áreket jasaǵany úshin Óskemen qalalyq №2 sotynyń tóraǵasy K.T. Qasymov, osy sottyń sýdlary - M. K. Arǵymberdi jáne G. K. Qaıroldına, sondaı-aq, Glýbokovodskıı aýdandyq sotynyń sýdıasy B. G. Ámirov qyzmetten bosatyldy. Búginnen bastap atalǵan qujat kúshine endi», - dedi Sh.Qabdola Astanada ótken baspasóz máslıhatynda.

Onyń sózine qaraǵanda, búginde ondaı materıaldar kóp. Negizgi maqsat -tártiptik quqyq buzýshylyqtar aıasynda qaýip-qaterlerdi anyqtap, qylmystyń aldyn alý. Ol úshin adamdy der kezinde qyzmetten shettetý kerek.

QR Joǵary sotynyń ishki qaýipsizdik jáne jemqorlyqtyń aldyn alý bóliminiń meńgerýshisi Qaırat Bıjanovtyń sózine qaraǵanda, jumystan shyǵarylǵan tórt sýdıanyń bári tártiptik quqyq buzýshylyqtarǵa jol bergen. Máselen, Qasymov pen Arǵymberdi etıkalyq normalardy buzdy. Al Qaıroldına men Ámirov qylmystyq ister boıynsha jaýapqa tartylǵan adamdarmen baılanys jasap, jemqorlyqqa áreketterin jasady. «Olar Memleket basshysynyń Jarlyǵymen jumystan bosatyldy. Budan bylaı tórteýi de sotta da, jalpy memlekettik qyzmette jumysqa tura almaıdy», - dep atap kórsetti Q.Bıjanov.

Joǵary qaraı