Aýa raıy
Astana 1 °S
Almaty 7 °S
valıýta baǵamy
USD 388.70
EUR 428.70
RUB 6.08
CNY 55.46

Mańǵystaýda bokstan I-respýblıkalyq týrnır bastaldy

2019 jyldyń 16 qazan 2019 20:41

AQTAÝ. QazAqparat - Búgin bokstan tuńǵysh sport sheberi Shoqyr Bóltekulyna arnalǵan jasóspirimder arasynda I-Respýblıkalyq ashyq týrnır shymyldyǵyn túrdi,-dep habarlaıdy QazAqparat tilshisi.

Jarysqa elimizdiń sportshylarynan bólek, Ózbekstan, Qyrǵyzstan eliniń bylǵary sport sheberleri qatysýda.

Jasóspirimder arasyndaǵy ashyq birinshilik óńirde alǵash ret uıymdastyryldy. Jarysqa 2004, 2005, 2006, 2007 jyly týǵan sportshylar qatysýda. Olar 34 keliden bastap 60 kelige deıin salmaq dárejesinde kúsh synasady.

«Shoqyr Bóltekulyna arnalǵan jasóspirimder arasyndaǵy Respýblıkalyq týrnır aýdan ákimdigimen, MO dene shynyqtyrý basqarmasy, balalar men jasóspirimder mektebiniń, aýyl azamattary bar. Solarmen aqyldasyp, uıymdastyrylyp otyr»,-deıdi. bas tóreshi Azamat Esbergen.

Áp-sátte sharshy alańǵa jarystyń alǵashqy juby shyqty. Birinshi raýndtan-aq, qarsylasyna aýyr soqqylar jumsap úlgergen jańaózendik Salamat Beknazarov aıqyn basymdyqpen 2 kezeńde jeńip, shırek fınalǵa joldama aldy. 14 jasar sportshy 6 jyldan beri boksty janyna serik etken. Osy ýaqytqa deıin halyqaralyq, respýblıkalyq dodalarda top jarǵan.

«Menimen shyqqan qarsylasym myqty. Degenmen asa qıyn bolǵan joq. Qarsy shabýyl jasap, 2 raýndtyń sońynda jeńip shyqtym. Buıyrsa, Ádilbek Nııazymbetov, Bekzat Nurdáýletov aǵalarym sııaqty álem chempıony bolsam deımin»,-deıdi jarysqa qatysýshy Salamat Beknazarov.

Dodaǵa elimizdiń Aqmola, Batys Qazaqstan, Aqtóbe, Atyraý oblysy men Nur-sultan qalasynan jáne Ózbekstan, Qyrǵyzstan memleketinen bylǵary qolǵap sheberleri kelgen. Saıdyń tasyndaı iriktilgen myqtylardyń árqaısysy jeńis tuǵyrynan kórinýge laıyq.

«Men Ózbekstan Respýblıkasy, Ándijan óńiriniń atynan qatysyp turmyn. Aqtaýǵa birinshi ret keldim, 5 jyldan beri bokspen aınalysamyn. Osyǵan deıin Djakartada ótken jasóspirimder arasyndaǵy halyqaralyq chempıonatta jeńimpaz atandym. Mine, jańa ǵana ótken kezdesýde 3 raýndta aıqyn basymdyqpen jeńdim»,-deıdi ózbekstandyq Mýhamadıor Oqıolov.

Baıraqty báseke 19 qazanǵa deıin jalǵasady. Dodanyń fınaldyq kezdesýi senbide ótpek. Týrnır qorytyndysy boıynsha jeńis tuǵyrynan kóringenderge kýboktar tabystalady.










Avtor Láılim Álim
Basty sózder: Mańǵystaý oblysy, Sport, Boks,
Joǵary qaraı