Aýa raıy
Astana 5 °S
Almaty 6 °S
valıýta baǵamy
USD 389.98
EUR 434.01
RUB 6.10
CNY 55.04

Qyzmetkeri paramen ustalsa, basshysy jumystan ketedi - Jeńis Qasymbek

2019 jyldyń 20 aqpan 2019 20:32

ASTANA. QazAqparat - QR Indýstrııa jáne ınfraqurylymdyq damý mınıstri Jeńis Qasymbek óz qyzmetkerlerine jemqorlyq úshin jumystan shyǵaratyn eskertti, dep xabarlaıdy QazAqparat tilshisi.

«Ótkende QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaevpen kezdeskende biz bylaı kelistik. Eger aýmaqta bir basshy ustalsa, onda osy salaǵa jaýapty komıtet tóraǵasy nemese onyń orynbasary otstavkaǵa ketýi kerek. Qazir biz agenttikpen birlesip jumys istep jatyrmyz. Bálkim, ortaq bir qujatty qabyldaımyz. Alaıda budan bylaı mende osyndaı ustanym bolady. Máselen, bir salanyń basshysy paramen ustalsa, komıtet tóraǵasynyń orynbasary jumysta ketýi tıis. Al jergilikti jerde ınspektor qolǵa tússe, birden departament basshysy jumystan ketedi», - dedi J.Qasymbek búgin Astanada ótken jıynda.

Mınıstrdiń aıtýynsha, ondaı ustanymmen basshylardyń jeke jaýapkershiligi artady. Sonda jergilikti jerdegi qarapaıym ınspektordan bastap komıtet basshylyǵyna deıingi qyzmetkerler jemqorlyqtyń jazasyn túsinedi.

J.Qasymbek óz jaýapkershiligin de atap ótti.

«Búgin men ýáde beremin, ınspektor paramen ustalsa, departament dırektory jumystan qýylady. Al departament basshysy ustalsa, komıtette ózgerister bolady. Ortalyq apparatta da solaı bolady. Onyń bári maǵan da qatysty», - dep atap kórsetti J.Qasymbek.

Aıta keteıik, búgin QR Indýstrııa jáne ınfraqurylymdyq damý mınıstrliginde ortalyq apparat pen aýmaqtyq qurylymdardyń qyzmetkerleri jemqorlyqqa qarsy kúres sharalarymen tanysty. QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókilderi osy salada paramen ustalǵandardy kórsetip, qylmystyq jazaǵa tartý jaıynda aıtyp berdi.

Sol jerde mınıstr J.Qasymbek óz qyzmetkerlerine eskertý jasady.

«Biz birqatar sharalardy qolǵa alatyn bolamyz. Men osyny aldyn ala aıtyp qoıaıyn. Osy jyldyń ishinde kóliktik ınspektsııada qaıta qurylymdaý bolady. Oǵan qatysty fýnktsııalardyń kóbisi avtomattandyrylǵan júıege aýystyralady. Sóıtip, jolda turatyn mamandardy barynsha azaıtamyz. Adamdar jolda turmaıdy. Al qalǵan fýnktsııalardy basqa memlekettik organdarǵa beremiz. Sóıtip, kóliktik ınspektsııany túbegeıli ózgertemiz. Sondyqtan qazir jyldyń basynda eskertip qoıaıyn dep otyrmyn. Kóliktik ınspektsııany tolyǵymen attestatsııadan ótkizemiz. Biz jergilikti jerde ınspektorlardyń sanyn 30-40 protsentke qysqartýdy josparlap otyrmyz. Sol sebepti jumysty ózgertińiz. Áıtpese, sizdermen qoshtasamyz. Basqa qurylymdarǵa da aıtarym osy», - dep atap kórsetti J.Qasymbek.

Joǵary qaraı