Aýa raıy
Astana 8 °S
Almaty 14 °S
valıýta baǵamy
USD 389.62
EUR 429.98
RUB 6.06
CNY 55.08

Qordaıdaǵy iri jol apaty: Oblys ákimi zardap shekkender týraly aıtty

2019 jyldyń 22 sáýir 2019 12:31

NUR-SULTAN. QazAqparat - Jambyl oblysynyń Qordaı aýdanynda bolǵan iri jol apatynan zardap shekken 9 adam áli aýrýhanada jatyr, dep habarlaıdy QazAqparat tilshisi.

«Ózderińiz biletindeı, jol apatynan 11 adam kóz jumǵan bolatyn. 31 adamǵa ártúrli deńgeıde medıtsınalyq kómek kórsetildi. Qazirgi tańda toǵyz adam aýrýhanada jatyr. Úsheýi jansaqtaý bóliminde. Dárigerler ol úsh adamnyń jaǵdaıy aýyr jáne birqalypty ekenin habarlady. Jansaqtaý bóliminde jatqan úsh adamnyń biri Ózbekstan azamaty. Qalǵan alty adam aýrýhananyń ártúrli bólimderinde em alýda. Alty adamnyń ekeýi Ózbekstannyń, qalǵan tórteýi bizdiń eldiń azamattary», - dedi Úkimet otyrysynan keıin tilshilerdiń suraǵyna jaýap bergen Jambyl oblysynyń ákimi Asqar Myrzahmetov.

Óńir ákimi qazaqstandyq tarap kóz jumǵandardyń denesin shekaraǵa jetkizgenin atap ótti.

«Al em alyp jatqan azamattarǵa tıisti kómek barynsha kórsetilýde», - dedi aımaq basshysy.

Eske sala keteıik, 20 sáýir kúni «Almaty-Tashkent» avtojolynyń boıynda iri jol apaty bolyp, 11 adam qaza tapty. Taǵy 5 adam ota ústelinde, al 3 adam jansaqtaý bóliminde jatqany habarlanǵan edi. Oblysta jedel shtab quryldy. Psıhologtar kezekshilik etip jatqan «jedel jeli» +7 (7262) 513575 jáne +7 (7262) 514167 jumys istep tur.

QR ІІM málimetinshe, apatqa ushyraǵandar arasynda Qazaqstan, Ózbekstan jáne Tájikstan azamattary bar.

Qazaqstan Prezıdenti Qasym-Jomart Toqaev Ózbekstan Prezıdenti Shavkat Mırzıeevke kóńil aıtý jedelhatyn joldady.

Joǵary qaraı