Aýa raıy
Astana 8 °S
Almaty 14 °S
valıýta baǵamy
USD 389.62
EUR 429.98
RUB 6.06
CNY 55.08

Konstıtýtsııalyq Keńes QR Prezıdentiniń ótinishi boıynsha sheshim qabyldady

2019 jyldyń 25 sáýir 2019 15:34

NUR-SULTAN. QazAqparat - 2019 jylǵy 25 sáýirde Qazaqstan Respýblıkasynyń Prezıdenti Qasym-Jomart Toqaevtyń Qazaqstan Respýblıkasy Konstıtýtsııasy 41-babynyń 2-tarmaǵyna resmı túsindirme berý týraly ótinishi boıynsha Konstıtýtsııalyq Keńestiń otyrysy ótti. Bul týraly Konstıtýtsııalyq Keńestiń resmı saıtyna silteme jasap QazAqparat habarlaıdy.

Buryn habarlanǵandaı, ótinish berýshi Respýblıka Prezıdenttigine kandıdattarǵa qoıylatyn Qazaqstanda sońǵy on bes jyl boıy turýy týraly talabynyń mazmunyn ashýdy, sondaı-aq Qazaqstannyń sheteldik mekemelerinde jáne Respýblıka múshesi bolyp tabylatyn halyqaralyq uıymdarda jumysy kezeńinde azamattyń elden tys jerde turǵan ýaqytyn atalǵan merzimge esepteý máselesin túsindirýdi suraǵan edi.

Otyrysta Konstıtýtsııalyq Keńes Tóraǵasy Q. Mámı Keńes aldynda óte mańyzdy másele kóterilgenin, onyń Negizgi Zańdy, shet elderdiń konstıtýtsııalaryn jáne ǵylymı zertteýlerdiń nátıjelerin jan-jaqty taldaýdy qajet etetinin atap ótti.
Keńes quramy Úkimet, Parlament Senaty men Májilisi, Joǵarǵy Sot, Bas prokýratýra, syrtqy ister jáne ishki ister mınıstrlikteri ókilderiniń pikirlerin tyńdady.

Elimizdiń quqyqtanýshy ǵalymdary, zań ǵylymdarynyń doktorlary, professorlar E. Ábdirasulov jáne M. Dáýlenov óz qorytyndylaryn usyndy.

Talqylaýlar men otyrysqa qatysýshylardyń jaýaptarynan keıin Konstıtýtsııalyq Keńes normatıvtik qaýly qabyldady.
Konstıtýtsııalyq Keńes Respýblıka Prezıdenttigine kandıdattar úshin Konstıtýtsııanyń 41-babynyń 2-tarmaǵynda belgilengen Qazaqstanda sońǵy on bes jyl boıy turý talaby Memleket basshysynyń Negizgi Zańda bekitilgen jaýapty mıssııasy, fýnktsııalary jáne ókilettikterimen sharttalǵan, dep túsindirdi.

Eldegi qoǵamdyq-saıası jáne áleýmettik-ekonomıkalyq jaǵdaı, memlekettiń ulttyq ereksheligi, júrgizilgen reformalar men qol jetkizilgen nátıjeler týraly aqparatty egjeı-tegjeıli bilý joǵary laýazymdy tulǵa úshin asa mańyzdy bolyp tabylady. Olardy eskere otyryp, bolashaq Memleket basshysy qoǵam men memlekettiń odan ári damýynyń strategııalyq jáne taktıkalyq baǵdarlamalarynyń baǵyttaryn aıqyndaýy tıis.

Atalǵan mán-jaılarǵa baılanysty Konstıtýtsııalyq Keńes Prezıdenttikke kandıdattyń Qazaqstan aýmaǵynda saılaý aldyndaǵy uzaq kezeń ishinde turaqty negizde turýy týraly talap obektıvti qajettilik jáne óte mańyzdy dep sanaıdy. Osyǵan uqsas talap kóptegen shet elderdiń konstıtýtsııalarynda belgilengen.

Konstıtýtsııalyq Keńestiń pikirinshe, on bes jyldyq turý merzimine birinshi kezekte adamnyń el aýmaǵynda turaqty turý ýaqyty kiredi. Ol ádette azamattyń turǵylyqty jeri boıynsha tirkelýimen rastalady.

Sonymen qatar, bul merzimge Qazaqstan Respýblıkasynyń dıplomatııalyq qyzmeti personalyna jatatyn jáne olarǵa teńestirilgen Qazaqstan múshe bolyp tabylatyn halyqaralyq uıymdar janyndaǵy laýazymdarǵa taǵaıyndalǵan azamattardyń Qazaqstan Respýblıkasynan tys jerlerde turý kezeńderi de esepteledi.

Konstıtýtsııalyq Keńes Tóraǵasy Q. Mámı túsindirgendeı, osy negizder boıynsha elden shyǵý qazaqstandyq azamattyqty toqtatýǵa jáne turaqty turatyn jerin ózgertýge ákelmeıdi. Atalǵan jaǵdaılarda Respýblıkadan tys jerlerde bolǵan azamat (eger onyń ózge elge turaqty turǵylyqty túrde shyqqany, basqa memlekettiń azamattyǵyn, saıası nemese ózge de baspana alǵandyǵy nemese sondaı ótinishter bergendigi týraly málimetter bolmasa) tıisti memlekette ýaqytsha turatyn bolyp esepteledi. Osyndaı jaǵdaı tulǵanyń azamattyq ınstıtýtynan týyndaıtyn Qazaqstanmen turaqty saıası-quqyqtyq baılanysy deńgeıiniń qandaı da bir tómendeýin bildirmeıdi. Ondaı tulǵa Qazaqstan azamaty quqyqtarynyń, bostandyqtary men mindetteriniń tolyq kólemine ıe bolyp sanalady.
Normatıvtik qaýlynyń tolyq mátini baspasózde jáne Konstıtýtsııalyq Keńestiń ınternet-resýrsynda jarııalanady.

Joǵary qaraı