Aýa raıy
Astana -4 °S
Almaty 0 °S
valıýta baǵamy
USD 389.75
EUR 434.26
RUB 6.12
CNY 55.05

Qazaqstan JOO-larynda bilim granttarynyń quny artýy múmkin

2019 jyldyń 25 sáýir 2019 11:08

NUR-SULTAN. QazAqparat - M.V. Lomonosov atyndaǵy Máskeý memlekettik ýnıversıtetiniń qazaqstandyq fılıalyna jeke ǵımarat berý kerek. Bul týraly Parlament Senatynyń jalpy otyrysynda depýtat Baqytjan Jumaǵulov aıtty, dep habarlaıdy QazAqparat tilshisi.

Qazaqstandyq fılıaldyń qyzmetin odan ary zańnamalyq turǵyda bekitý maqsatynda 2017 jylǵy 9 qarashada Chelıabınsk qalasynda QR Úkimeti men RF Úkimeti arasynda M.V. Lomonosov atyndaǵy Máskeý memlekettik ýnıversıtetiniń qazaqstandyq fılıalynyń qyzmeti týraly kelisimge qol qoıyldy.

«Osy kelisimdi ratıfıkatsııalaý - fılıal jumysynyń quqyqtyq jaǵdaılaryn jaqsartýǵa jáne retteýge múmkindik beredi. Sonymen qatar, qaralyp otyrǵan zań jobasyn jumys toby men Senat komıtetinde talqylaý barysynda týyndaǵan birqatar máselelerdi atap ótkim keledi. Osy oraıda oqytý granttaryna toqtalatyn bolsaq, Máskeý memlekettik ýnıversıtetiniń fılıalynda 1 mln 690 myń teńgeni qurady. Mundaı soma bilikti professorlardy tartýǵa, dáristerdi joǵary deńgeıde ótkizýge múmkindik beredi. Bul shyn máninde bilim berý sapasynyń kepili. Al bizdiń joǵary oqý oryndarynda, tipti ulttyq ýnıversıtetterde granttar somasy áldeqaıda tómen», - dedi depýtat.

Onyń sózine qaraǵanda, búginde eldiń básekege qabilettilik sharttarynyń biri retinde bilim berý sapasy birinshi orynǵa shyqty. Bul oraıda bilim sapasyn kóterýge baǵyttalǵan keshendi is-sharalar júrgizý týraly oılaný qajettigi bar. Osy rette Qazaqstannyń joǵary oqý oryndarynda granttardyń qunyn arttyrý óte mańyzdy.

«Fılıal qurylǵan ýaqyttan beri L.N. Gýmılev atyndaǵy Eýrazııa ulttyq ýnıversıtetiniń bazasynda jumys istep keledi. Ǵımaratqa qatysty 14 jylda 270 mln teńgeden astam qarjy EUÝ tarapynan jumsaldy. Bul durys emes degen de pikirler aıtyldy. Sebebi Máskeý memlekettik ýnıversıteti jáne Eýrazııa ulttyq ýnıversıteti álemdik arenada, sondaı-aq dúnıejúzilik reıtıngterde básekelester bolyp sanalady. Sondyqtan MMÝ-diń Qazaqstandaǵy fılıalyna jeke ǵımarat bólip berýdi tıimdi sheshim dep oılaımyz», - dedi B. Jumaǵulov.

Óz kezeginde QR Bilim jáne ǵylym mınıstri Kúlásh Shámshıdınova aıtylǵan usynystarmen kelise otyryp: «Bizdiń JOO-larda granttar deńgeıin kóterý usynysy osyǵan deıin birneshe márte aıtyldy. Biz osy qadamnyń qajet ekenin túsinip otyrmyz. Al MMÝ-diń fılıalyna jeke ǵımarat bólý máselesi qaralyp jatyr», - dedi.

Aıta keteıik, 2000 jyly QR Tuńǵysh Prezıdenti Nursultan Nazarbaev M.V. Lomonosov atyndaǵy Máskeý memlekettik ýnıversıtetiniń Qazaqstandaǵy fılıalyn ashý jóninde bastama kóterdi. Sol jyly 9 qazanda RF Prezıdenti V. Pýtınniń Qazaqstanǵa sapary kezinde fılıaldyń qurylýy týraly hattamaǵa qol qoıyldy. Bilim ordasy osy ýaqytqa deıin L.N. Gýmılev Eýrazııa ulttyq ýnıversıtetiniń bazasynda qyzmet etýde.

Budan buryn habarlanǵandaı, jalpy otyrysta palata depýtattary «QR Úkimeti men RF Úkimeti arasyndaǵy M.V. Lomonosov atyndaǵy Máskeý memlekettik ýnıversıtetiniń Qazaqstandyq fılıalynyń jumys isteýi týraly kelisimdi ratıfıkatsııalaý týraly» Zańyn qabyldady.

Joǵary qaraı