Aýa raıy
Astana 10 °S
Almaty 16 °S
valıýta baǵamy
USD 389.52
EUR 429.21
RUB 6.07
CNY 54.94

Qazaqstan bokstan Álem chempıonatyn úshinshi orynmen aıaqtady

2019 jyldyń 22 qyrkúıek 2019 00:51

NUR-SULTAN. QazAqparat – Reseıdiń Ekaterınbýrg qalasynda bokstan Álem chempıonaty máresine jetti. Baıraqty básekede Qazaqstan túrli dárejedegi alty medal enshiledi. Bul týraly QazAqparat QR Ulttyq Olımpıadalyq komıtetine silteme jasap habarlaıdy.

Atap aıtqanda, altyn medalǵa 81 kelige deıingi salmaqtaǵy Bekzat Nurdáýletov qol jetkizdi. «Kúmisti» komandaǵa Qamshybek Qońqabaev alyp keldi. QR quramasynyń kapıtany fınalda ózbekstandyq Bahodır Djalolovtan utylyp qaldy. Solaısha, ekinshi oryn ıelendi. Qazaqstan qorjynyna tórt qola medaldy Sáken Bıbosynov (52 kelige deıin), Abylaıhan Júsipov (69 kelige deıin), Tursynbaı Qulahmet (75 kelige deıin) jáne Vasılıı Levıt (91 kelige deıin) saldy.

Ókinishke qaraı, Qaırat Eralıev (57 kelige deıin) pen Zakır Safıýllın (63 kelige deıin) júldesiz qaldy.

Medaldyq esepte Qazaqstan quramasy úshinshi oryn aldy. Birinshi orynǵa úsh «altyn», bir «kúmis» jáne bir «qolamen» - Ózbekstan, ekinshi orynǵa úsh altyn jáne bir qola medalmen Reseı ornalasty.

Týrnırde Qazaqstan sııaqty bir altyn medaldy kýbalyqtar da ıelendi. Budan bólek, olardyń enshisinde bir kúmis jáne bir qola júldeler bar. Olar tórtinshi pozıtsııaǵa jaıǵasty.

Bokstan erler arasyndaǵy Álem chempıonaty Ekaterınbýrg qalasynda 7-21 qyrkúıek kúnderi aralyǵynda ótti. Halyqaralyq Olımpıada komıtetiniń shemimimen týrnır Tokıo Olımpıadasyna irikteý statýsynan aıyryldy. Degenmen, oǵan qatysqan qatysýshylardyń sany erekshe kóp boldy. Atap aıtsaq, 88 elden 467 sportshy keldi. Eki jyl buryn Gambýrgte 85 eldiń 279 boksshysy qolǵap túıistirgen bolatyn.

Avtor Mıra Tólendiqyzy
Basty sózder: Boks, Reseı, Sport,
Joǵary qaraı