Aýa raıy
Astana -3 °S
Almaty 4 °S
valıýta baǵamy
USD 389.86
EUR 435.32
RUB 6.12
CNY 55.12

Kásipkerler elordalyq bıznestiń ınteraktıvti portalyn ashýdy usyndy

2019 jyldyń 19 qyrkúıek 2019 20:54

NUR-SULTAN. QazAqparat - Elordalyq bıznestiń ınteraktıvti portalyn qurý qajet. Mundaı usynysty búgin VI kásipkerler konferentsııasynda Nur-Sultan qalalyq kásipkerler palatasynyń dırektory Almat Júnisov aıtty, dep habarlaıdy QazAqparat tilshisi.

«Jalpy, jergilikti kásipkerler úshin ádettegi problemalar mynalar: shıkizat ımporty, qural-jabdyq jetispeýshiligi, ınfraqurylymnyń damymaýy jáne bilikti kadrlardyń joqtyǵy. Bul máselelerdi sheshý úshin ınjenerlik jeliler men kommýnıkatsııalardy der ýaqytynda jobalap, kásiporyndardyń quziretin belsendi arttyrýdy jáne memlekettik qoldaý sharalaryn ońtaılandyrýdy usynamyz», - dedi ol.

Ol sonymen qatar, shaǵyn qarjylandyrý da problemaǵa aınalǵanyn basa aıtty. Máselen, «Eńbek» ónimdi jumyspen qamtý jáne jappaı kásipkerlikti damytý memlekettik baǵdarlamasynyń da qarajaty jetkiliksiz bolyp otyr.

«Jyl saıyn shamamen 800 mln teńge bólinedi. Biraq, bıznestiń qajettiligi 5 mlrd teńgege jýyqtaıdy. Sondyqtan ony bıýdjette qarastyrýdy ótinemiz. Elordada saýda bıznesiniń jabylýy jıilep barady. Biz munyń sebepteriniń biri - quzirettiń joqtyǵy jáne qarjylandyrýdyń mardymsyzdyǵy dep esepteımiz. Qala shekarasy keńeıýiniń qajetti dınamıkasyn eskere otyryp, qala tóńiregindegi bıznesti tartýdy usynamyz», - dedi Almat Júnisov.

Osy oraıda palata dırektory bıznestiń ınteraktıvti portalyn qurýdy usyndy.

«Odan kásipkerler qala kartasynan ınvestıtsııaǵa ne bolmasa kooperatsııaǵa muqtaj kásiporyndardyń barlyq egjeı-tegjeıli saraptamasyn kóre alar edi. Bul uzaqmerzimdi keleshekte bızneske damý vektoryn jáne naqty bir jobanyń tabystylyǵyn túsinýge múmkindik beredi», - dedi ol.



Joǵary qaraı