Aýa raıy
Astana 9 °S
Almaty 13 °S
valıýta baǵamy
USD 389.62
EUR 429.98
RUB 6.06
CNY 55.08

Qaraǵandynyń shalǵaı aýyldaryndaǵy dárihanalar jańa ádispen jumys istemek

2019 jyldyń 12 sáýir 2019 05:41

QARAǴANDY. QazAqparat - Qaraǵandy oblysynda alty jyljymaly medıtsınalyq keshen jumys isteı bastaıdy, dep habarlaıdy QazAqparat tilshisi.

Atalmysh keshender arqyly óńirdiń densaýlyq saqtaý basqarmasy shalǵaıdaǵy aýyldarǵa sapaly medıtsınalyq qyzmet kórsetý jáne dári-dármekpen qamtý máselelerin sheshýdi kózdep otyr.

«Osy jyldan bastap jyljymaly medıtsınalyq keshender sanyn arttyrdyq. Elordalyq densaýlyq saqtaý bóliminen bizge qazirgi zamanǵy eki jyljymaly medıtsınalyq keshen berildi. Olar zamanaýı medıtsınalyq qurylǵylarmen jabdyqtalǵan. Mamyr aıynda bul keshender Qaraǵandy oblysynyń aýmaǵynda qyzmet kórsete bastaıdy. Ár aýdanǵa ár túrli brıgadalar barady», - dedi oblystyq densaýlyq saqtaý basqarmasynyń basshysy Erjan Nurlybaev.

Sondaı-aq, Qaraǵandy oblysynda jyljymaly dárihana pýnkteri de iske qosylmaq.

«Bul bizdiń kópten kútken jobamyz. Aýyldyq jerdiń barlyq turǵyndary, ásirese shalǵaıdaǵy aýyldar sapaly dári-dármekke qol jetkize almaıdy. Onda dárihanalar joq, sebebi jeke bızneske olardy shalǵaı aýyldarda ashý tıimdi emes. Bul jaǵdaıda biz osy jaýapkershilikti óz moınymyzǵa alamyz. Oblysta jyljymaly dárihana pýnkteri jumys isteı bastaıdy. Keste boıynsha olar eldi mekenderdi aralap, turǵyndardy dári-dármekpen qamtamasyz etetin bolady», - dedi Erjan Nurlybaev.

Ol sondaı-aq aýyldyq medıtsınalyq pýnkterde ınternetke qatysty másele qalaı sheshilip jatqanyn aıtty. Bul rette jelige úzdiksiz qoljetimdilikti qamtamasyz etýge memlekettik-jeke menshik seriktestik kómekke keledi. Keń jolaqty ınternet joq eldi mekenderde spýtnıktik tárelkeler ornatylady.

«Bul qadam 42 aýyldyq medıtsınalyq pýnkti spýtnıktik ınternetpen qamtamasyz etýge múmkindik beredi. Eger joba ózin aqtaıtyn bolsa, biz onyń pármendi jáne senimdi ekenine kóz jetkizemiz. Sonan soń ǵana qalǵan aýyldyq jerlerge taratatyn bolamyz. Internet aýyldyq jerlerdegi dárigerlermen beıne keńes berý úshin qajet», - dep túsindirdi oblystyq densaýlyq saqtaý basqarmasynyń basshysy.

Joǵary qaraı