Aýa raıy
Astana -5 °S
Almaty 12 °S
valıýta baǵamy
USD 389.34
EUR 428.78
RUB 6.05
CNY 55.45

Qaraǵandyda mas júrgizýshi turǵyn úı aýlasynda turǵan 5 kólikti zaqymdady

2019 jyldyń 21 qazan 2019 11:06

QARAǴANDY. QazAqparat – Qaraǵandyda Lexus-570 kóligin tizgindegen mas júrgizýshi aýladaǵy turaqta turǵan kólikterge soǵylyp, ózi rólde uıyqtap qalǵan. Oqıǵa saldarynan 5 avtokólik zaqymdanyp, eki adam aýrýhanaǵa jetkizildi, dep habarlaıdy QazAqparat tilshisi.

Aǵymdaǵy jyldyń 20 qazanynda saǵat 20:57 shamasynda 102 telefonyna «Stepnoı-4» shaǵyn aýdanyndaǵy aýlalardyń birinde «Lend krýzer» avtokóligin mingen júrgizýshi turaqta turǵan avtokóliktermen soqtyǵysyp, uıyqtap jatqandyǵy týraly habar kelip tústi. Bul oqıǵa Qaraǵandynyń Instagram jelisindegi tanymal pablıkteriniń biriniń paraqshasynda jarııalandy.

Oqıǵa ornyna jedel basqarý ortalyǵynyń qyzmetkerleri patrýldik polıtsııa polkiniń jáne Ońtústik-Shyǵys polıtsııa bóliminiń jedel-tergeý tobynyń jaqyn mańdaǵy narıadtary jiberilgen. Tártip saqshylary anyqtalǵandaı, 49 jastaǵy «Leksýs 570» avtokóliginiń júrgizýshisi mas kúıinde úıdiń aýlasynda turǵan 5 avtokólikpen soqtyǵysqan.

JKO saldarynan 25 jastaǵy er adam men 29 jastaǵy áıel medıtsınalyq mekemege jatqyzyldy.

«Stepnoı-4» shaǵyn aýdanynda jol-kólik oqıǵasy saldarynan eki adam zardap shegip, bas mı jaraqatyn aldy. Zardap shekken eki naýqas ta H. J. Maqajanov atyndaǵy kópbeıindi aýrýhanaǵa jetkizildi. 25 jastaǵy er adamnyń jaǵdaıy ortasha-aýyr, oǵan neırohırýrgter keńes berýde. 29 jastaǵy áıeldiń jaǵdaıy aýyr. Aýrýhanaǵa komada jetkizildi, qazir jan saqtaý bóliminde jatyr», - dep habarlady Qaraǵandy oblysy Densaýlyq saqtaý basqarmasynyń baspasóz qyzmeti.

Atalǵan derek boıynsha QR QK 345-babynyń 2-bóligimen qylmystyq is qozǵaldy. Tıisti saraptamalar taǵaıyndalyp, tergeý júrgizilýde.

Joǵary qaraı