Aýa raıy
Astana -3 °S
Almaty 0 °S
valıýta baǵamy
USD 389.75
EUR 434.26
RUB 6.12
CNY 55.05

Qaraǵandyda mádenıet salasynyń úzdikterine oblys ákiminiń syılyǵy tabystaldy

2019 jyldyń 22 mamyr 2019 04:26

QARAǴANDY. QazAqparat - Qaraǵandyda mádenıet pen óner salasynyń úzdikteri ózderiniń kásibı merekesi qarsaynda oblys ákiminiń syılyǵyna ıe boldy, dep habarlaıdy QazAqparat tilshisi.

Bul syılyq birneshe jyl qatarynan mádenıet mamandaryna kásibı turǵyda jetistikterge jetkeni, oblystyń mádenıeti men óneriniń saqtalýyna jeke úles qosqany, kásibı sheberligin únemi jetildirgeni jáne mádenı salanyń daýyna zor úles qosqany úshin tabystalyp keledi. Bıyl komıssııa 22 laýreatty tańdady.

«Mádenıet bolmasa biz kim bolar edik? Sizderdiń qoıylymdaryńyz ben kontsertterińiz biz úshin - erekshe oqıǵa. Jańa án men jańa fılm kez kelgen mańyzdy jańalyqtan basym bolyp ketedi. Bir sózben aıtqanda, sizder bizdiń ómirimizge jarqyn boıaýlar men jaǵymdy emotsııalar syılaısyzdar. Óz shyǵarmashylyqtaryńyzben árqashan bizdi qoldaıtyndaryńyzǵa úlken rahmet. Al biz, óz kezeginde, sizderge qoldaý kórsetemiz. Bizdiń mindetimiz - shyǵarmashylyqtaryńyz ben jobalaryńyz júzege asýy úshin sizderge qajetti jaǵdaı jasaý», - dedi oblys ákimi Erlan Qoshanov Stanıslavskıı atyndaǵy teatrda ótken marapattaý rásiminde.

Aımaq basshysy bıylǵy jyly alǵash ret oblystyq bıýdjetten mádenıet salasy mamandaryna joǵary bilim berýge memlekettik tapsyrys bergenin habarlady. Sonymen qatar, jergilikti ýnıversıtetterde mádenıet jáne óner mamandaryn daıarlaý múmkindigi talqylanýda.





Saltanatty jıynda 21 nomınatsııa boıynsha syılyqtar tabys etildi. «Mamandyqqa adaldyǵy úshin» bas júldeni Jáırem kentiniń mádenı-saýyq ortalyǵynyń dırektory Aqmaral Imanbekova ıelendi.

Ótken ǵasyrdyń 80-shi jyldary jas maman Qaraǵandy mádenı-aǵartý mektebin bitirgennen keıin týǵan aýylyna oraldy. Óziniń barlyq eńbek jolyn Aqmaral Imanbekova mádenıet úıimen baılanystyryp, mádenı uıymdastyrýshy qyzmetinen basshylyq laýazymyna deıin kóterilgen.

«Bizdiń mádenıet úıi qurylǵan 1985 jyldan bastap, biz úsh kezeńdi bastan ótkerdik. Birinshisi - qalyptasý kezeńi. Ekinshisi - 90-shy aýyr jyldar. Kóptegen aımaqtarda mádenıet úıler jabyldy. Bizde jylý da, jaryq da bolmaǵan kezder boldy, biraq biz osynyń bárin bastan ótkerdik. Jumys istegeýge ynta men patrıottyq sezim kómektesti. Qazir bizde órkendeý, gúldený kezeńi. Memlekettik qarjylandyrý men júıe quraýshy kásiporyndardyń arqasynda qazir jaǵdaıymyz jaqsy», - deıdi laýreat.





Akademııalyq mýzykalyq komedııa teatrynyń prımasy Darıa Pıvenniń aıtýynsha, «Jyl aktrısasy» nomınatsııasy boıynsha jeńiske jetýge on jyl umtylǵan. Ol óziniń árbir rólin mańyzdy dep sanaıdy. Degenmen, «Alqyzyl jelkender» pesasyndaǵy Mennerstiń anasyn somdaǵan róli erekshe ekenin atap ótti. Aktrısa marapatty óziniń akterlik sheberlik boıynsha tálim bergen ustazdary - Svetlana Nepomnıaıı jáne Ivan Nemtsevke arnady.





Saltanatty jıyn merekelik kontsertpen aıaqtaldy. Án keshinde jergilikti ujymdar óner kórsetti. Áriptesterin quttyqtaýǵa Abaı atyndaǵy Memlekettik akademııalyq opera jáne balet teatrynyń solısi, halyqaralyq baıqaýlardyń dıplomanty Oksana Davydenko keldi.

Qazaqstanda Mádenıet jáne óner qyzmetkerleri kúni jyl saıyn 21 mamyrda atap ótiledi. Kásibı mereke 2013 jyly Prezıdent Jarlyǵymen bekitildi.





Qaraǵandy oblysy ákimi syılyǵynyń laýreattary:

«Mamandyǵyna adaldyǵy úshin» - Aqmaral Imanbekova - Jáırem kentiniń mádenı-oıyn-saýyq ortalyǵynń jetekshisi

«Jyl ártisi» - Ardaq Jarqynbekov Ardak - S.Qojamqulov atyndaǵy teatrdyń ártisi

«Jyl ártisi» - Darıa Pıven - Akademııalyq mýzykalyq komedııa teatrynyń ártisi

«Jyldyń úzdik epızodtyq róli» - DınaraAıǵazınova - S.Seıfýllın atyndaǵy teatrdyń ártisi

«Jyldyń úzdik teatr rejısseri» - Beısenbaı Ospanov - Jańaarqa aýdanynyń S. Ysqaqov atyndaǵy teatrdyń rejısseri

«Jyldyń estrada janrynyń vokalısti» - Janna Hasenova - Temırtaý qalasy Mádenıet saraıynyń ánshisi

«Jyldyń klassıka janrynyń vokalısti» - Olga Fadeeva - Q. Baıjanov atyndaǵy KB «Araı» ansambiliniń solısti

«Jyldyń úzdik ınstrýmentalısti» - Gúlnara Amerjanova - Q. Baıjanov atyndaǵy KB Táttimbet atyndaǵy akademııalyq orkestriniń ártisi jáne Tatıana Poleýk - Akademııalyq mýzykalyq komedııa teatrynyń kontsertmeısteri

«Jyldyń úzdik jeke aspapta oryndaýshysy» - Janeta Aldyhanova -Q. Baıjanov atyndaǵy sımfonııalyq orkestrdiń ártisi

«Halyq ánin úzdik oryndaýshy» - Erjan Bazarbekov - Q. Baıjanov atyndaǵy KB ártisi

«Jyl horeografy» - Aıymgúl Nuǵymarova - Temırtaý qalasy MS «Gıýzel» horeografııalyq ansambliniń jetekshisi

«Balet jáne horeografııalyq ujymynyń úzdik ártısi» - Gúlmıra Nurmaǵambetova - Q. Baıjanov atyndaǵy «Aqqý» folklorlyq horeografııalyq ansambliniń qoıýshy-baletmeısteri

«Kórkemónerpazdar ujymynyń úzdik jetekshisi» - Saıat Tuıaqbaev -Aqtoǵaı aýdanynyń «Aqtoǵaı» teatrynyń rejısseri

«Demalys ýaqytyn úzdik uıymdastyrýshy» - Baqyt Kókkózova - Qarqaraly qalasynyń mádenı-saýyq ortalyǵynyń ádiskeri

«Aýyl mádenıetiniń úzdik qyzmetkeri» - Gúlmıra Jakýdına Nura aýdany Kıevka aýylynyń Mádenıet úıiniń ádiskeri

«Aýyldyń úzdik kitaphanashysy» - Maıgúl Asqarova - Buqar jyraý aýdanynyń OKJ kitaphanalardy damytý bóliminiń ádiskeri

«Úzdik kitaphanashy» - Edlena Svırıdova - Saran qalasy OKJ №2 otbasylyq oqý kitaphanasynyń meńgerýshisi

«Altyn jolaq» - Raýan Qabıdoldın - aqyn, «Ortalyq Qazaqstan» oblystyq gazetiniń menshikti tilshisi

«Úzdik aıtysker» - Tilegen Ádilov - Qaraǵandy oblysynyń aıtysker aqyny

«Jyldyń murajaı qyzmetkeri» - Bıbigúl Qudabaeva - Oblystyq beıneleý óneri murajaıynyń jetekshisi

«Jyldyń úzdik sýretshisi» - Lıazzat Tynbaeva - Balqash qalasynyń mádenı-oıyn-saýyq ortalyǵynyń sýretshi-dızaıneri, «Jas sýretshiler» QB múshesi




Joǵary qaraı