Aýa raıy
Astana 18 °S
Almaty 16 °S
valıýta baǵamy
USD 386.82
EUR 428.67
RUB 5.86
CNY 54.95

Internetke qazaqstandyqtardyń jeke derekteri qalaı tarap ketkendigi anyqtalýda

2019 jyldyń 5 shilde 2019 00:02 3667

NUR-SULTAN. QazAqparat - Qazaqstandyqtardyń jeke málimetteriniń ınternette taralýynyń sebebi anyqtalyp jatyr. Sondaı-aq máselemen quqyqqorǵaý organdary aınalysýda. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev aıtty, dep habarlaıdy QazAqparat.

«Búgin jeliden azamattardyń jeke derekterin Internette taratý týraly aqparatty kórdim. Óte mańyzdy másele. Derekkózi men taralý sebepterin anyqtaýdy tapsyrdym. Quqyqqorǵaý organdary qazirgi ýaqytta bul máselemen aınalysýda. Tehnologııalardyń damýyna oraı, jeke derekterge qol jetkizýdi qorǵaý - búginde búkil álemdik qoǵamdastyq aldynda ótkir turǵan máseleniń biri. Sizder kommertsııalyq nemese memlekettik aqparattyq júıelerdi buzýǵa qatysty birqatar oqıǵalardy estigen bolarsyzdar. Sol sebepti, derbes derekterdi qorǵaý boıynsha bizdiń Komıtetimizge Eýropadaǵy Data Protection Agency-ke uqsas fýnktsııalardy berý týraly bastama kótergen bolatynbyz», - dep jazdy ol Facebook-te.  

A.Jumaǵalıevtiń atap ótýinshe, bul fýnktsııa azamattardyń jeke derekterin óńdeýmen aınalysatyn aqparattyq júıelerdiń ıelerine tekserý júrgizýge quqyq beredi.

«Sonymen birge, jeke derekterdi qorǵaýda tıisti sharalar qoldanbaǵany úshin júkteletin jaýapkershilikti qataıtý kerek. Mundaı sharalar qazir álem boıynsha qabyldanýda», - dedi ol.

Aıta keteıik, 4 shilde kúni «Kıber shabýyldardy zertteý jáne taldaý ortalyǵy» zańdy tulǵalar birlestigi (KShZTO) Facebook-te ınternetke 11 mıllıon qazaqstandyqtyń jeke bas derekteri taraǵandyǵy jóninde jazdy.

«Qazaqstannyń 11 mıllıon azamatynyń jeke málimetteri ınternet jelisinde qoljetimdi boldy. Ótken aptada KShZTO mamandary jeke málimetterdiń ǵalamtorǵa jaıylyp ketýiniń eń iri derekteriniń birin baıqady. 11 mıllıon adam týraly tolyq aqparattyq baza ınternet jelisinde ashyq qoljetimdilikte boldy - barlyǵy da eldiń kámeletke tolǵan halqy. Qalaǵan kez kelgen adam júıege ońaı qol jetkize ala aldy nemese ony ózine tolyǵymen júkteı aldy. Bazadaǵy málimetter jańa jáne jarty jyl buryn ǵana aktýalızatsııalanǵan. Aqparattyń jalpy qoljetimdilikte naqty qansha ýaqyt bolǵany ázirge belgisiz. Degenmen, ondaǵy barlyq aqparat  Google jáne Yandex izdeý júıeleri arqyly ındeksatsııalanyp úlgerdi. Derekterdiń taralyp ketýiniń sebebi anyqtalýda.  Tıisti organdar habardar etildi jáne onyń mán-jaıy jaqyn ýaqytta anyqtalatynyna úmittenemiz. Osy habar jarııalanyp jatqan ýaqyttaǵy jaǵdaı boıynsha, bazaǵa qoljetimdilik jabyq tur», - delingen jarııalanǵan postta.  

 

 

 

Joǵary qaraı